Єлизаветинська Біблія❧Книга пророка Ісаї, розділ 12

1

И҆ рече́ши въ де́нь ѻ҆́ный: благословлю̀ тѧ̀, гд҇и, ѩ҆́кѡ разгнѣ́валсѧ є҆сѝ на мѧ̀, и҆ ѿврати́лъ є҆сѝ ѩ҆́рость твою̀ (ѿ менє̀), и҆ поми́ловалъ мѧ̀ є҆сѝ.

2

Сѐ, бг҃ъ мо́й сп҃съ мо́й, ѹ҆пова́ѧ бѹ́дѹ на него̀ и҆ не ѹ҆бою́сѧ: занѐ сла́ва моѧ̀ и҆ похвала̀ моѧ̀ гд҇ь, и҆ бы́сть мѝ во сп҇нїе.

3

И҆ почерпи́те во́дѹ со весе́лїемъ ѿ и҆стѡ́чникъ спасе́нїѧ.

4

И҆ рече́ши въ де́нь ѻ҆́ный: хвали́те гд҇а, воспо́йте и҆́мѧ є҆гѡ̀, возвѣсти́те во ѩ҆зы́цѣхъ сла҄внаѧ є҆гѡ̀, помина́йте, ѩ҆́кѡ вознесе́сѧ и҆́мѧ є҆гѡ̀.

5

Хвали́те и҆́мѧ гд҇не, ѩ҆́кѡ высѡ́каѧ сотворѝ: возвѣсти́те сїѧ҄ по все́й землѝ.

6

Весели́тесѧ и҆ ра́дѹйтесѧ, живѹ́щїи въ сїѡ́нѣ, ѩ҆́кѡ вознесе́сѧ ст҃ы́й ї҆и҃левъ посредѣ̀ тебє̀.