Єлизаветинська Біблія❧Книга пророка Ісаї, розділ 39

1

Въ то̀ вре́мѧ посла̀ мерода́хъ валада́нъ сы́нъ валада́новъ, ца́рь вавѷлѡ́нскїй, писа҄нїѧ и҆ послы̀ и҆ да́ры є҆зекі́и: слы́ша бо, ѩ҆́кѡ болѣ́лъ є҆́сть до сме́рти и҆ воста̀.

2

И҆ ѡ҆бра́довасѧ ѡ҆ ни́хъ є҆зекі́а ра́достїю вели́кою, и҆ показа̀ и҆̀мъ до́мъ а҆рѡма́тѡвъ и҆ мѵ́ра, и҆ ста́кти и҆ ѳѷмїа́ма, и҆ сребра̀ и҆ зла́та, и҆ всѧ҄ до́мы сосѹ́дѡвъ сокро́вищныхъ, и҆ всѧ҄ є҆ли҄ка бѧ́хѹ во сокро́вищихъ є҆гѡ̀: и҆ не ѡ҆ста̀ ничто́же, є҆гѡ́же не показа̀ и҆̀мъ є҆зекі́а въ домѹ̀ свое́мъ и҆ во все́й ѡ҆́бласти свое́й.

3

И҆ прїи́де и҆са́їа про҇ро́къ ко є҆зекі́и царю̀ и҆ речѐ къ немѹ̀: что̀ глаго́лютъ сі́и мѹ́жїе, и҆ ѿкѹ́дѹ прїидо́ша къ тебѣ̀; И҆ речѐ є҆зекі́а: ѿ землѝ дале́кїѧ прїидо́ша ко мнѣ̀, ѿ вавѷлѡ́на.

4

И҆ речѐ и҆са́їа: что̀ ви́дѣша въ домѹ̀ твое́мъ; И҆ речѐ є҆зекі́а: всѧ҄, є҆ли҄ка въ домѹ̀ мое́мъ, ви́дѣша, и҆ нѣ́сть въ домѹ̀ мое́мъ, є҆гѡ́же бы не ви́дѣли, но и҆ ѩ҆̀же въ сокро́вищихъ мои́хъ.

5

И҆ речѐ є҆мѹ̀ и҆са́їа: послѹ́шай словесѐ гд҇а саваѡ́ѳа:

6

сѐ, дні́е грѧдѹ́тъ, гл҃етъ гд҇ь, и҆ во́змѹтъ всѧ҄, ѩ҆̀же въ домѹ̀ твое́мъ, и҆ є҆ли҄ка собра́ша ѻ҆тцы̀ твоѝ да́же до днѐ сегѡ̀, въ вавѷлѡ́нъ пре́йдѹтъ, и҆ ничесо́же ѡ҆ста́вѧтъ:

7

речѐ гд҇ь, ѩ҆́кѡ и҆ ѿ ча҄дъ твои́хъ, и҆̀хже роди́лъ є҆сѝ, по́ймѹтъ и҆ сотворѧ́тъ ка́женики въ домѹ̀ царѧ̀ вавѷлѡ́нска.

8

И҆ речѐ є҆зекі́а ко и҆са́їи: бл҃го сло́во гд҇не, є҆́же гл҃а: да бѹ́детъ нн҃ѣ ми́ръ и҆ пра́вда во дни҄ моѧ҄.