Ostroh BibleПерша книга хронік, розділ 5
Шрифт:
Запис:
1
Сн҃ове же рꙋви́мовы пръвен꙽ца і҆и҆л҃ева ꙗ҆́ко то́и бы́сть пръвенецъ е҆го·
2
И҆ внегда е҆мꙋ възыитѝ на ло́же ѿц҃а е҆го. дано̀ бы́сть прьве́нъство е҆го сн҃омъ і҆ѻ́сифовымъ сн҃а і҆и҆л҃ева. и҆ нѣ́сть то́и вмѣнен̑҇ в꙽ перве́н꙽ство·
3
Ꙗ҆́ко і҆ѹ́да си́ленъ бы́сть крѣпостїю въ бра́тїи свое́и. и҆ во́ждъ в꙽мѣни́сѧ ѿ него и҆зрастѐ прьве́нъство и҆ѻ́сифово·
4
Сн҃ове б̂о рꙋви́мовы прьве́нца і҆и҆л҃ева, е҆но́хъ, и҆ фамꙋсъ, а҆сром̑, и҆ харми·
5
Сн҃ове и҆ѻ҆и́левы. семе́и, и҆ ване́ѧ сн҃ъ е҆го. сн҃ове го́говы сн҃а семе́и, сн҃ъ е҆го·
6
Ми́ха сн҃ъ е҆го. риси́нъ сн҃ъ е҆го ве́кра сн҃ъ е҆го·
7
Ве́ра сн҃ъ е҆го, е҆гоже плѣне́на и҆зведѐ ѳаглафаласа́ръ цр҃ь а҆сѷрїискїи. се́и бы́сть кнѧ́ѕь в колѣ́нѣ рꙋви́мовѣ·
8
Є҆гда́ же сочета́хꙋсѧ бра́тїѧ же е҆го и҆ все племѧ̀ е҆го по семъѧ́мъ свои́мъ и҆ по ро́дꙋ и҆хъ, и҆мѣѧ҆хꙋ ѿ бра́тїа е҆го кн҃ѕѧ. и҆ѻ҆и́лѧ и҆ заха́рїю·
9
И҆ ва́леж̑ сн҃ъ а҆зꙋ́зовъ сн҃ъ сам꙽мы, сн҃ъ и҆ѻ҆и́лева то́и ѻ҆бита̀ въ а҆рои́рѣ да́же до нава́на, и҆ веел̑҇маѻ́на·
10
И҆ проти́вꙋ въсто́чныѧ страны̀ ѻ҆бита̀ да́же до в꙽хо́дꙋ пꙋсты́ни и҆ рѣкѝ е҆фра́та. мно́го б̂о число̀ скота̀ держа́хꙋ в зем̑ли галаа́дъстеи·
11
Въ дн҃и же саѹ́ла възведо́ша бра́нь проти́въ а҆гарѧ́ном̑ и҆ поби́ша и҆хъ. и҆ ѻ҆бита́ша в жи́лищихъ и҆хъ въ все́и странѣ̀ пред̑ лицем̑ въсто́кꙋ галаа́дъскомꙋ·
12
Сн҃ве же га́довы ѿ страны̀ и҆хъ ѻ҆бита́ша въ землѝ васа́ни до селха·
13
И҆ѻ҆и́ль главо́ю бы́сть и҆ сафа́мъ в꙽торы́и. и҆а҆нїи кни́жникъ васа́ньскїи·
14
И҆ бра́тїѧ и҆хъ по домо́мъ и҆ племе́немъ свои҆мъ. и҆хаи́ль мосол꙽лам̑, и҆ сове́и, и҆ ѻ́ра. и҆ ѻ҆ханъ, и҆ ѻ҆вїѧ́, и҆ ѻ҆ви́дъ се́дмь·
15
Тїи сн҃ове а҆вихаи́левы·
16
сн҃ове рꙋвїины, и҆а҆га́ди, сн҃ове галаа́довы, сн҃ове махаи́левы. сн҃ове і҆е҆с꙽се́и, сн҃ове и҆е҆даи, сн҃а вꙋ́зова·
17
Бра́та сн҃ꙋ а҆вдїи́лева, сн҃а гꙋнїи́на бы́ша кнѧ́ѕи до́мꙋ ѿч҃ества и҆х꙽·
18
И҆ ѻ҆бита́ша въ галаа́дѣ и҆ въ васа́нѣ и въ мѣста и҆хъ, и҆ въ всѣхъ под̑град̑ныхъ саро́ньскихъ даже до предѣл꙽·
19
Вс̂и сїи сочте́ны бы́ша въ дн҃и и҆ѻ҆а҆ѳа́ма цр҃ѧ і҆ѹ́дина, и҆ въ дн҃и і҆е҆ровоа́ма цр҃ѧ і҆и҆л҃ева·
20
Сн҃ове же рꙋви́мовы, и҆ га́довы, и҆ по́лъ пле́мени манасїи́на. бы́ша сн҃ове си́лни и҆ мꙋжїе носѧ́ще щи́ти и҆ ме́чи, и҆ напрѧза́ющи лꙋ́ки. ѹ҆че́ни же къ ѻ҆полче́нїемъ, и҆ бы́сть их̑. ҂м҃, и҆ ҂д҃, и҆ з҃. со́тъ, и҆ ѯ҃. и҆же и҆схожда́хꙋ къ бра́ни·
21
Брани́шасѧ проти́въ а҆гарѧ́номъ. и҆ е҆ѳꙋро́мъ. и҆ нафисом̑. и҆ наваѻ҆номъ·
22
И҆ ѹ҆крѣпи́шасѧ над̑ ни́ми, и҆ преда́шасѧ в рꙋцѣ и҆хъ а҆гарѧ́не. и҆ вс̂ѧ ѻ҆бита́нїѧ и҆хъ. занѐ г҃а възва́ша е҆гда ѻ҆плъча́хꙋсѧ. и҆ ѹ҆слы́ша их̑. занѐ ѹ҆пова́хꙋ на́нь·
23
И҆ плени́ша коры́сти и҆хъ. вельблю́довъ. ҂н҃, и҆ ѻ҆ве́цъ, ҂с҃, и҆ ҂н҃, и҆ ѻ҆сло́въ, ҂в҃. и҆ дш҃ъ чл҃ческихъ, ҂р҃·
24
Ра́ненїи же мно́ѕи падо́ша. занѐ бы́сть ѿ г҃а бра́нь. и҆ въ мѣсто и҆хъ да́же до пресе́ленїѧ·
25
Сн҃ове же полъ пле́мени манасїе́ва всели́шасѧ въ землѝ ѿ васа́на да́же до ваа́л꙽е҆рмо́на и҆ саи́ръ. и҆ горꙋ̀ а҆е҆рмо́ньскꙋ. и҆ сїи въ лива́нѣ ѹ҆мно́жишасѧ·
26
И҆ тїѝ бы́ша кнѧ́ѕи до́мꙋ племе́ни и҆хъ. говеръ и҆ е҆си, и҆ е҆лии҆ль. и҆ газрїель. і҆ е҆ремїѧ и҆ ѻ҆дꙋи҆ѧ. и҆ е҆дїе́ль, мꙋж́и си́лни въ крѣ́пости. и҆ мꙋж́и и҆мени́ти въ домꙋ ѿц҃ъ свои҆хъ·
27
Ѡ҆ста́виша же б҃а ѿц҃ъ свои҆хъ. и҆ поплъзнꙋшасѧ по бо́ѕѣхъ люд̑ских̑ землѧ̀ ѻ҆́ноа. и҆хже бы́сть потреби́лъ г҃ь пред̑ ни́ми·
28
И҆ възд̑ви́же б҃ъ і҆и҆л҃евъ дх҃ъ фꙋла цр҃ѧ асѷрїиска. и҆ дх҃ъ ѳеглаѳафаласа́ръ цр҃ѧ а҆с꙽сѷрьска. и҆ плѣни рꙋви́ма и҆ га́да и҆ по́лъ племе́ни манасїи҆на. и҆ въведе и҆хъ въ а҆л꙽ла́нъ и҆ въ а҆во́ръ и҆ а҆ра́и. и҆ на рѣкꙋ гоиза́ню да́же до дн҃е сего·
Джерела
