Ostroh Bible❧Перша книга царів (Третя книга царств), розділ 6

1

И бы́сть в꙽ четы́ридесѧ́тное в четве́ртосо́тное лѣто, и҆схода сн҃овъ і҆и҆л҃евых̑ ѿ е҆гѷпта. в꙽ лѣто, четве́ртое въ мс̑҇ць вто́рыи. црс̑҇твꙋю҆щꙋ цр҃ю соло́монꙋ над̑ і҆и҆л҃ем꙽, созда̀ хра́мъ гв҃и·

2

И҆ с̂е храм̑ е҆гоже созда̀ соло́монъ цр҃ь гв҃и. бѧше, м҃, лакот̑ долгота е҆го. и҆ к҃, лако́тъ широта е҆го. и к҃е, лако́тъ высота е҆го·

3

И҆ кома́ра ꙗ҆́же́ б̂ѣ пре лицемъ е҆го, к҃, лако́тъ долгота̀ е҆го. толи́ко же ꙗ҆́ко в꙽ высинꙋ̀ до́ма. в꙽ ширинꙋж̑, і҃ лакот̑·

4

Кома́ра бысть и҆ сїѧ пред̑ лицем̑ хра́мꙋ. и҆ созда̀ храмъ и сконча̀ и҆̀. и҆ сътвори храмꙋ ѻ҆́кна преклоне́ны, с꙽кровены ѻ҆крс̑҇тъ стѣны храм̑ныѧ, притво́ры ѻ҆́коло цр҃кви всеѧ̀. сътворѝ ѹ҆ дави́ра, и҆ сътвори закро́вы ѻ҆́коло·

5

Закро́въ и҆ нижнїи странѣ̀, е҃, лакот̑ ширина б̂ѣ. и҆ сре́днеи, ѕ҃, лако́тъ ширина̀, и҆ третеи, з҃, лакот̑ ширина̀ е҆го, поне́же ѹ҆твръженїе хра́мꙋ сътворѝ, ѻ҆́крс̑҇тъ внѣ̀ѹ́дꙋ хра́ма ꙗ҆́ко да не прїимают̑сѧ стѣнѣ храма·

6

И҆ хра́мꙋ ѕиждемꙋ сꙋщꙋ ка́менїемъ несѣченымъ е҆дина́цѣмъ ꙗ҆́ко приноша́шесѧ, мла́тъ же, и҆ тесли́ца, и҆ всѣхъ дѣ́лных̑ желѣзъ не слы́шасѧ въ хра́мѣ е҆гда зда́ша.

7

І҆ и҆ две́ри закро́вꙋ сътвори, ꙗ҆́же сꙋть ниж̑нѧѧ страны̀ хра́ма з десны́ѧ, і҆ и҆звїе́ныи бѧше восход̑, въ сред̑нїи, и҆ ѿ среди́на г҃, ча́сти бѧше въход̑·

8

И҆ созда̀ храм̑ и҆ соверши е҆го, и҆ ѻ҆ста́ви ѻ҆́коло всего̀ хра́ма до́щками. и҆ сворѝ ке́дрїемъ и҆ сътвори вѧза́нїѧ ѻ҆́крс̑҇тъ всего̀ хра́ма, е҃, лако́тъ въ высотꙋ̀ е҆го и҆ сн̂ѧ вѧза́нїе, дре́вомъ ке́дровым̑·

9

И҆ бысть слово гн҃е къ соло́монꙋ гл҃ѧ·

10

Хра́мъ сїи е҆сть и҆же т̂ы ѕи́ждеши. аще хо́диши въ за́повѣдехъ мои҆хъ и҆ сꙋдбы̀ моѧ сътвори́ши, и҆ съхрани́ши вс̂ѧ повелѣнїа моѧ, ѻ҆браща́ющисѧ въ нихъ, ѹ҆ста́влю слово мое к тебѣ̀, е҆же гл҃ах дв҃дꙋ ѿц҃ꙋ твое҆мꙋ·

11

И҆ вселю́сѧ по́средѣ сн҃овъ і҆и҆л҃евъ, и҆ не ѻ҆ста́влю люді́и моих̑ і҆и҆л҃ѧ·

12

И҆ созда̀ соло́монъ храмъ и҆ сконча и҆̀·

13

И҆ созда̀ стѣ́ны хра́мꙋ внꙋтръ древомъ ке́дровомъ ѿ землѧ̀ до стѣны̀ и҆ ѿ стѣны до верха̀ въ ѻ҆́коло ѻ҆ста́ви ꙗ҆́ко съдръжати древомъ внꙋтръѹ҆́дꙋ хра́мꙋ, и ѹ҆крѣплѧ́ти внꙋтръ страны̀ пе́вгїем̑·

14

И҆ созда̀, к҃, лако́тъ ѿ конца̀ стѣны̀ странꙋ̀ е҆ді́нꙋ ѿ землѧ до верха̀, и҆ сътвори внꙋтръ·

15

ѿ ѻ҆лтарѧ̀ до ст҃аѧ ст҃ыхъ, м҃, лако́тъ, б̂ѣ цр҃кви пред̑ лицем̑ ѻ҆лтарѧ̀·

16

По́средѣ храма внꙋтръ, т̂ꙋ же бѧше лѣ́по поставлѧ́ти кїѻ́та гн҃ѧ, и҆ бѧше к҃, лакот̑ в꙽ долготꙋ, и҆ к҃, лакот̑ в꙽ широтꙋ. и҆ к҃, лакот̑ высота е҆го, и҆ ѻ҆бъѧт̑ и҆̀ зла́томъ и҆ ѹ҆твръди·

17

И҆ сътворѝ ѻ҆лта́рь ке́дровый проти́вꙋ ѻ҆лтарѧ̀ ѻ҆бъѧ́тъ и҆̀ златомъ и҆ весь хра́мъ ѻ҆бъѧ́тъ зла́том̑ до сконча́нїа всемꙋ̀ хра́мꙋ·

18

И҆ сътвори въ ѻ҆лтарю̀, дв̂а херꙋви́ма древомъ кипарисном̑, і҃, лако́тъ мѣ́рою вели́чество, і҃, лакотъ ко́ждо ѻ҆ себѣ̀·

19

Пѧ́ть лакот̑ кры́лѣ бѧста херꙋви́мꙋ е҆ди́номꙋ. и҆ е҃, лакот̑ крылѣ херꙋви́мꙋ второ́мꙋ. і҃, лакот̑ ѿ крила̀ до крила е҆мꙋ.

20

Та́ко мѣра бѣ̀, херꙋви́ма втора́го в тꙋже мѣрꙋ и҆ тако совръшены мѣры ѻ҆́ба·

21

И҆ высота̀ б̂ѣ херꙋви́ма кое҆гождо б̂ѣ, і҃, лако́тъ·

22

Та́коже и҆ второ́мꙋ, и҆ ѻ́ба херꙋви́ма бѣста посредѣ̀ хра́ма внꙋтрънѧго, и҆ простира́хꙋ кры́ла их̑, досѧза́ше крыло̀ е҆ді́но до стѣны̀ е҆ді́ноѧ хра́мꙋ, и҆ крыло дрꙋга́го херꙋві́ма досѧза́ше до стѣны̀ вторыѧ, и҆ кры́ла е҆ѧ̀ и҆же посредѣ хра́ма каса́шесѧ крыло̀ съ крылом̑·

23

И҆ ѻ҆бъѧ́та бѣста херꙋви́ма зла́томъ. и҆ вс̂ѧ стѣны хра́ма ѻ҆́коло, и҆зъваꙗ҆́нна писа̀ подо́бна херꙋви́мома, и҆ фѷни́комъ внꙋтръѹ҆́дꙋ, и҆ вн̂ѣѹ҆́дꙋ·

24

И҆ помо́стъ и҆зъвнꙋ и҆ внѣ̀ ѻ҆бъѧ̀ зла́томъ·

25

И҆ две́ри ѻ҆лтарю̀ сътворѝ древомъ лѣ́пымъ, пра́ги пѧтери́цею, и҆ дво́ѧ две́ри дре́вомъ пе́вговым̑ и҆зваѧ́н꙽на на ни́хъ подо́бїѧ херꙋви́момъ древомъ фѷни́ковымъ, и҆ позоло́тою ѹ҆строѝ, и҆ снѧ́ть зла́том̑ и҆ бѧше златом̑ ѹ҆строе́но до херꙋвимовъ, и҆ до фѷник̑҇·

26

И҆ тако сотворѝ и҆ вра́томъ цр҃кви и҆ пра́ги дре́вомъ лѣпым̑ на четы́ри ѹ҆́глы·

27

И҆ вс̂ѧ двери дре́вомъ пев꙽говым꙽ ѹ҆красѝ. засови́ты две́ри пе́рвыѧ, и҆ ѿвръзенїе и҆́хъ къ себѣ. и҆ вторы́е две́ри засови́ты ѿвръза́юща къ себѣ·

28

На ни́х же сотвори и҆зваѧ́н꙽ни херꙋви́ми и҆ фѷники и҆ ѹ҆строе́ны бѣхꙋ позла́тою и҆ преима́ны златом̑, и҆ свѣшены до́лꙋ·

29

И҆ созда̀ дворецъ внꙋтренїи, тремѝ стѣна́ми нете́санымъ дре́вомъ. и҆ е҆ді́на стѣна̀ те́сана древа ке́дръска въѻ҆́коло·

30

И҆ созда дворецъ до́мꙋ госпо́дню, и҆ вънꙋтреѣѧ. и҆ кома́ра. ꙗ҆же б̂ѣ проти́вꙋ хра́мꙋ·

31

И҆ посла́въ цр҃ь соло́монъ. въ тѵ́ръ приведѐ хира́ма ѿ тѵ́ра, сн҃а жены̀ вдови́ца. и҆ то́и б̂ѣ ѿ колѣ́на неѳали́млѧ, и҆ ѿц҃ъ е҆го б̂ѣ мꙋжъ тирин̑҇. бїѧ́и мѣ́дь. и҆спо́лнъ хꙋдо́жества и҆ ра́зꙋма и҆ вѣ́дѣнїѧ е҆же дѣ́лати всѧ́ко дѣ́ло мѣ́дѧное. и҆ приведо́ша и҆̀ къ цр҃ю соло́монꙋ·

32

И҆ сътворѝ вс̂ѧ дѣла̀, и҆ солїѧ̀ дв̂а сто́лпа кома́рѣ цр҃ко́внѣи, и҃і, лако́тъ высота̀ столпа̀. и҆ ѻ́крс̑҇тъ мѣ́ра е҆го, д҃і, лако́тъ. и҆ тол꙽стота̀ столпꙋ̀ д҃, пе́рс꙽ты. та́коже б̂ѣ и҆ вторы́и сто́лпъ. и҆ дв̂ѣ главѣ̀ сотворѝ, и҆же възложи́ти на ве́рхъ столпо́в꙽. солїѧ́ны ѿ мѣ́ди, е҃, лако́тъ въ высотꙋ̀, възложе́нїе е҆ді́но. и҆ е҃, лако́тъ въ высотꙋ̀ на возложе́нїе дрꙋго́мꙋ·

33

И҆ сотворѝ дв̂ѣ мре́жи. и҆́ма же покрыти главы̀ возложе́нїѧ и҆ дв̂ѣ мре́жи сътворѝ е҆же покры́ти возложе́нїе столпо́въ·

34

И҆ мре́жꙋ возложе́нїѧ е҆ді́наго, и҆ мре́жꙋ возложе́нїѧ втора́го. и҆ дѣ́ло вывешенно дв̂ѣ стро́ки солїѧ́нныхъ. мѣ́дѧных̑ сомрежены, дѣло вывешен̑҇но строка̀ над̑ строко́ю, та́коже сътворѝ возложе́нїю второ́мꙋ·

35

И҆ возложе́нїѧ на сто́лпх̑ѣ, подо́бна криновꙋ цвѣтꙋ ꙗ҆́ко и҆ въ кома́ре·

36

И҆ поста́ви сто́л꙽па въ кома́ре цр҃ко́внѣи. и҆ поста́ви сто́л꙽пъ е҆дин̑҇. и҆ нареч̑҇ и҆́мѧ е҆мꙋ і҆ꙗ҆́км̑ꙋ, и҆ поста́ви сто́л꙽пъ вторы́и, и҆ нареч̑҇ и҆́мѧ е҆мꙋ вало́зъ. и҆ на главѣ̀ столъпо́ма, дѣ́ло кри́нова цвѣтꙋ. и҆ сков̑҇ча̀ дѣло столпо́въ, ꙗ҆́коже над̑ кома́рою д҃ ла́ктѣ, и҆ под̑ставки под̑ ѻ́ба столпа̀, и҆ совы́ше стра́нъ возложе́нїе бѣ̀. под̑ставки и҆ солїѧ́нных̑ строк̑҇ с҃, ѻ҆́коло на главѣ̀ вторы́ѧ тол꙽стоты·

37

И҆ сътворѝ мо́ре лїѧ́но, е҃. лакот̑, ѿ кра́ѧ до кра́ѧ е҆го, крꙋ́гло ѻ҆́коло е҆го, е҃, лако́тъ высота̀ е҆го. и҆ ѻ́коло е҆го, л҃. ла́ктеи, и҆ под̑по́ры е҆мꙋ бѧ́хꙋ и҆ спо́ди въѻ́коло, і҃. лако́тъ, и҆ състоѧ̀ мо́ре ѻ́коло в҃і, воло́въ под̑ мо́емъ, г҃, зрѧ́щи на сѣверъ. и҆ г҃, зрѧ́щи на ю́гъ, и҆ г҃. на за́падъ, г҃ же, на восто́къ. и҆ всѣмъ бѧ́хꙋ соза́ди къ себѣ и҆ мо́ре бѧ́ше верхꙋ̀ и҆х꙽. и҆ ѹ́стїе е҆го бѧ́ше ꙗ҆ко ѹ́стїе поти́ра прозѧба́ющаго кри́на, и҆ тол꙽стота̀ е҆го вели́ка·

38

И҆ сътворѝ і҃ мѣхоно́ѳъ мѣ́дѧнъ, е҃, лако́тъ мѣхоно́ѳъ е҆ді́нъ. и҆ д҃ ла́кти широта̀ е҆го, и҆ ѕ҃ лако́тъ высота̀ е҆го, и҆ с̂е дѣ́ло мѣхоно́ѳовъ и҆ спое́нїе и҆хъ, и҆ спое́нїе срѣди и҆сходѧ́щихъ. и҆ во спое́нїе и҆хъ бѧ́хꙋ по́средѣ и҆сходѧ́щихъ. подо́бїе львов̑҇ и҆ воло́въ и҆ херꙋви́мов̑҇. та́ко же бѧ́хꙋ и҆ внѣ̀ содержа́щихъсѧ, и҆ свы́шеи под̑ и҆ львы̀ и҆ под̑ волми ѹ҆тверже́нїѧ·

39

дѣло сохожде́нїа, и҆ д҃ ко́ла мѣдѧны мѣхоноѳꙋ кое҆мꙋждо. и҆ пред̑держа́нїѧ мѣдѧна, и҆ д҃ ча́сти и҆хъ, и҆ ра́ма их̑ под̑ ѹ҆мыва́лницею. ра́ма же солїѧ́ныѧ ко ѻ҆бъѻ҆нꙋ странꙋ̀, мꙋжа прилежа́ще, и҆ ѹ҆ста̀ е҆го внѣ главы̀, и҆ вы́ше е҆ді́наго ла́ктѧ, и҆ ѹ́стїе е҆го крꙋ́гло на ѻ҆смь лако́т꙽, и҆ на ѹ́стїю е҆го мѣхоно́ѳы, и҆ мѣхоно́ѳы е҆го четвероѹ҆го́лны, а҆ не крꙋглы, и҆ д҃ колеса под̑ мѣхоно́ѳами, и҆ рꙋцѣ во колесе́хъ, во мѣхоно́ѳꙋ, и҆ высота̀ е҆ді́наго ко́ла ла́коть и҆ пол̑҇. и҆ дѣло ко́лъ возовы́хъ, рꙋцѣ и҆хъ и҆ хрибты̀ и҆хъ и҆ вс̂ѧ вещи их̑ лїѧ́ны четы́ри рама на четырехъ ѹ́глехъ мехоно́ѳы е҆ді́ноѧ, и҆ ѿ мѣхоно́ѳы ра́ма и҆хъ. и҆ на главѣ̀ мѣхоноѳы полъ ла́ктѧ вели́чество ихъ, крꙋ́гло же ѻ҆́крст꙽ главы̀ мехоноѳовы, и҆ нача́ла рꙋ́къ е҆го. и҆ споенїѧ е҆го·

40

И҆ ѿвръза́шесѧ въ нача́лѣ рꙋкъ е҆го и҆ спое́нїѧ е҆го·

41

Подо́бїѧ херꙋви́мов̑҇ и҆ льво́въ. и҆ ѳѷни́ковъ стоѧ́щи и҆ содержа́щисѧ. ко́ждо противꙋ лица̀ е҆го. внꙋт́ръ ѻ҆́крс̑҇тъ·

42

Потомꙋ же сътворѝ, і҃. мѣхоно́ѳъ по чинꙋ̀ е҆ді́номꙋ, и҆ по мѣре е҆ді́нои въ всѣхъ·

43

И҆ сътворѝ і҃ лїѧ́ныхъ столповъ мѣ́дѧныхъ. м҃, мѣръ въмеща́ющи ко́ждо со́пль·

44

Число̀ д҃ ла́ктѣ столпъ е҆ді́нъ. на мѣхоно́ѳѣ е҆ді́номъ·

45

И҆ поста́ви і҃ мѣхоно́ѳовъ, е҃ по десно́и странѣ̀ въ хра́мѣ, на восто́къ. и҆ е҃ по лѣвои странѣ̀ въ хра́мѣ. и҆ мо́ре во дрꙋгꙋю странꙋ̀ хра́ма ѻ҆деснꙋю на восто́ки. въ ѹ́глѣ полꙋ́денном̑. и҆ сътворѝ хирам̑ коно́бы, и҆ тепли́ца г҃, и҆ ѳїѧ́лы·

46

И҆ сконча̀ хира́мъ вс̂ѧ дѣла̀ творѧ̀. ꙗ҆́же творѧ́ше цр҃еви соло́монꙋ·

47

Въ хра́мѣ гн҃и столпа̀ дв̂а. и҆ о҆бъви́тїѧ столпо́въ над̑ гла́вныхъ дв̂а мре́жи дв̂ѣ, е҆же покрыва́ти ѻ҆́ба ѻ҆бви́тїѧ, и҆зваѧ́ныхъ. ꙗ҆́же на столпѣхъ сꙋть. ши́пковъ мѣ́дѧныхъ, у҃. ѻ҆бѣма̀ мре́жема дв̂ѣ строцѣ ши́пковъ мре́жи е҆ді́нои, покрива́ти ѻ҆́ба ѻ҆б꙽ви́тїѧ, на ѻ́бѣ х̑ столпѣхъ, и҆ мѣхоно́ѳъ і҃ лїѧ́ныхъ со́пль пра́зныхъ і҃, на мѣхоно́ѳѣ. и҆ мо́ре е҆ді́но, и҆ волов̑҇ в҃і, и҆ спод̑ подъ мо́рем̑ и҆ коноб꙽, и҆ тепли́цы г҃, и҆ ѳїѧ́лы и҆ вс̂ѧ сосꙋ́ды, и҆же сътворѝ хира́м꙽ цр҃ю соло́монꙋ въ хра́мѣ гн҃ѣ, и҆ стол̑҇по́въ м҃ и҆ и҃, до́мꙋ цр҃евꙋ, и҆ домꙋ гн҃ю, вс̂ѧ дѣла̀ цр҃ева, ꙗ҆́же сътворѝ хирам̑ мѣ́дѧна солїѧ́на·

48

И҆ множествꙋ мѣ́дьномꙋ не бѣ̀ числа̀. и҆м꙽же творѝ вс̂ѧ дѣла̀ с̂и мно́га ѕѣ́ло, не б̂ѣ конца̀ числꙋ̀ мѣ́ди. и҆же сътворѝ при ѻ҆бита́нїю і҆ѻ҆рда́на·

49

И҆ солїѧ̀ и҆хъ цр҃ь въ тол꙽стотѣ̀ зем̑лѧ̀ и҆ межи кохо́ѳътом̑, и҆ межи геи҆ра́ма·

50

И҆ да́сть цр҃ь соло́монъ вс̂ѧ сосꙋды, ꙗ҆́же сътворѝ въ храм̑ гн҃ь, и҆ ѻ҆лтар̑҇ златыи и҆ трапе́зꙋ, на не́иже хлѣби прино́снїи, и҆ зла́ты свщ̑҇ѣники, е҃, ѻ҆деснꙋ́ю, е҃, ѻ҆шꙋ́юю пред̑ лицемъ дави́ра, ст҃аѧ ст҃ыхъ зла́томъ спо́ены, и҆ свѣти́ла и҆ свѣща, и҆ вс̂ѧ цѣ́ла зла́та, и҆ пред̑две́рїе и҆ гво́здїе, и҆ ѳїѧ́лы, и҆ блю́да, и҆ кади́лницы зла́ты, спо́енїи·

51

И҆ две́рца две́ри хра́мꙋ внꙋтрънемꙋ, ст҃аѧ ст҃ым̑, и҆ две́ри хра́мꙋ цр҃ко́вномꙋ зла́ты·

52

И҆ скончасѧ вс̂е дѣло, и҆же сътворѝ соло́монъ въ хра́мѣ гн҃и·

53

И҆ вънесѐ соло́монъ ст҃аѧ дв҃да ѿц҃а свое҆го и҆ вс̂ѧ ст҃аѧ соло́монова сребро̀ и҆ зла́то и҆ сосꙋды, на сокро́вище да́сть въ хра́мъ гн҃ь·