Ostroh Bible❧Перша книга Самуїлова (Перша книга царів), розділ 1

1

И бысть чл҃къ ѿ е҆ѯарма́ѳема си́ѳъскаго, ѿ горы е҆фрѣмлѧ. и҆мѧ е҆мꙋ е҆лка́на, сн҃ъ и҆е҆ремїи҆ль сн҃а и҆лі́и҆на. сн҃а ѳеке́лѧ въ а҆си́ве, ѿ а҆рмаѳе́ма ѿ горы̀ е҆фрѣмлѧ·

2

Ѹ҆ сего̀ дв̂ѣ женѣ̀ бѣста, и҆мѧ е҆ді́нои а҆нна. и҆мѧ вторѣи фена́на. и҆ бѧ́хꙋ фена́нѣ дѣти. а҆ннѣ же не бѧ́ше ѻ҆троча́та·

3

И҆ въсходѧ́ше чл҃къ ѿ дн҃и до дн҃и ѿ гра́да свое҆го. е҆ѯармаѳе́ма, поклони́тисѧ. и҆ пожрѣти г҃ꙋ б҃ꙋ саваѻ́ѳꙋ в сило́мъ. и҆ т̂ꙋ бы́ша дв̂а сн҃а и҆лі́и҆на. ѻ҆фни, и҆ финеѻ́съ жръцы̀ гн҃и·

4

И҆ бы́сть дн҃ь, и҆ пожре е҆лка́на. и҆ да́сть фена́нѣ женѣ свое́й и҆ сн҃омъ е҆ѧ̀. и҆ дще́ремъ е҆ѧ̀ ча́сть.

5

А҆н꙽нѣ же да́сть ча́сть е҆ді́нꙋ. ꙗ҆́ко не бѣ е́й ча́да. н̂о то́кмо а҆́ннꙋ люблѧ́ше паче фена́ны. и҆ г҃ь затворѝ ложе́сна е҆ѧ̀. и҆ не да́сть е́й ча́да·

6

И҆ ѻ҆скорбѧ́ше е҆ѧ̀ нена́висница е҆ѧ̀ и҆ смꙋща́шесѧ и҆ ѻ҆немоща̀ печа́льми свои҆ми. и҆ сѣтова́ше сего ра́ди. ꙗ҆́ко затворѝ г҃ь ѹ҆тро́бꙋ е҆ѧ̀. не да́ти е́й ча́да·

7

Та́ко творѧ́ше ел̑҇ка́на ѿ го́да до го́да. сїѧ же внегда̀ приходи́ти е́й в до́мъ гн҃ь. ѹ҆корѧ́ше е҆ѧ̀ та́ко и҆ сѣтова́шесѧ и҆ пла́кашесѧ и҆ не ꙗ҆дѧ́ше·

8

И҆ реч̑҇ е́й е҆лка́на мꙋж́ъ е҆ѧ̀, а҆н꙽но. чт̂о т̂и е҆сть ꙗ҆́ко пла́чешисѧ и҆ почт̂о не ꙗ҆сѝ, и҆ почт̂о бїеши срд̑це свое. нѣсмь л̂и а҆зъ тебѐ до́брѣе пач̑҇ і҃. чад̑·

9

И҆ въста́вши а҆н꙽на по ꙗ҆де́нїю и҆хъ и҆́де в сило́мъ. и҆ ста̀ пред̑ гм҃ъ. и҆лі́и же жре́цъ сѣдѧ́ше на прс̑҇тлѣ, при пра́зе две́ри хра́ма гн҃ѧ·

10

И҆ т̂а ѹ҆миле́ною дш҃ею поклони́сѧ г҃ꙋ. и҆ пла́чꙋщи пропла́ка·

11

Помоли́сѧ мл҃твою къ г҃ꙋ гл҃юще а҆дана́и г҃ь е҆л꙽ло саваѻ́ѳъ. а҆ще призрѧ̀ при́зриши, на смиренїе рабы̀ твое҆ѧ. и҆ помѧне́ши м̂ѧ и҆ дасѝ рабѣ̀ твое́й сѣ́мѧ мꙋ́жеско. т̂о дам̑ и҆̀ пред̑ тобо́ю в да́ръ, до дн҃и смр҃ти е҆го. вина̀ и҆ пїан꙽ства не пиет̑. и҆ желѣ́зо не в꙽зы́идет̑ на главꙋ̀ е҆го·

12

И҆ бы́сть е҆гда̀ ѹ҆мно́жи молѧ́щисѧ пред̑ гм҃ъ. и҆лі́и ж̑ жре́цъ възира́ше на ѹ҆ста̀ е҆ѧ̀·

13

И҆ т̂а гл҃аше въ срд̑цы свое҆м꙽. толи́ко ѹ҆стнѣ е́й двиза́стасѧ. а҆ гла́съ е҆ѧ̀ не слы́шашесѧ. і҆ и҆ мнѧ́ше ю҆̀ и҆лі́и пїа́нꙋ сꙋщꙋ·

14

И҆ реч̑҇ е́й и҆лі́и. доко́лѣ пїа́на е҆си ѿи҆ми вино̀ твое і҆ и҆ди ѿ мѣста гн҃ѧ.

15

И҆ ѿвѣща̀ а҆́нна, и҆ реч̑҇. н̂и господи́не мои н̂о жена̀ в жесто́къ дн҃ь, а҆зъ е҆смь вина̀ и҆ пїѧ́нъства не пи́хъ. н̂о и҆злїѧ́хъ пред̑ гм҃ъ дш҃ꙋ мою·

16

Не да ж̑ рабы̀ твое҆ѧ дщере́мъ порꙋга́нїѧ. ꙗ҆́ко ѿ мно́жества ѹ҆ны́нїѧ мое҆го, и҆ ѿ мно́жества сѣтова́нїѧ мое҆го стоѧ́хъ да́же досе́лѣ·

17

И҆ ѿвѣща и҆лі́и и҆ рече к не́и, и҆дѝ съ ми́ромъ б҃ъ і҆и҆л҃евъ да́ждь т̂и всѧ́ко проше́нїе твоѐ. е҆гоже про́сиши ѿ него̀·

18

И҆ реч̑҇ а҆́н꙽на да ѻ҆брѧ́щет꙽ раба̀ твоѧ̀ блгд̑ть пред̑ ѻ҆чи́ма твои́ма. і҆ и́де жена̀ пꙋте́мъ свои҆мъ. и҆ вни́де въ ѻ҆би́тель свою. и҆ ꙗ҆́сть съ мꙋж́емъ свои҆мъ и҆ пит̑ и҆ лицѐ е҆ѧ̀ не и҆спадѐ ктомꙋ̀·

19

И҆ ѹ҆тренева́ше заѹ҆́тра. и҆ поклони́шасѧ г҃ꙋ і҆ и҆до́ша пꙋте́мъ свои҆мъ. и҆ вни́де е҆лка́на въ до́м꙽ свой, въ е҆ѯаръмаѳе́мъ. и҆ разꙋмѣ̀ е҆лка́на женꙋ̀ свою̀ а҆́ннꙋ. и҆ помѧнꙋ̀ ю҆̀ г҃ь, и҆ зачат̑·

20

И҆ бы́сть въ́ времѧ дн҃їи. и҆ родѝ а҆́н꙽на сн҃ъ. и҆ наречѐ и҆́мѧ е҆мꙋ само́иль. и҆ рече ꙗ҆ко ѿ г҃а б҃а саваѻ́ѳа спросих̑ и҆̀·

21

И҆ взы́иде чл҃къ сїи е҆лка́на. и҆ весь до́мъ е҆го. въ сило́мъ пожрѣти жрътвꙋ дне́внꙋю. и҆ мл҃твы свое́ѧ. и҆ вс̂ѧ десѧти́ны вда́сть землѧ̀ свое́ѧ а҆́нна же жена̀ е҆го не взы́и҆де с ни́мъ. ꙗ҆́ко речѐ мꙋж́еви свое҆мꙋ, до́ндеже взы́идетъ ѻ҆троча̀. а҆́ще ѿдою̀ е҆̀. и҆ ꙗ҆́ви́тсѧ лицꙋ̀ гн҃ю. и҆ пребꙋдетъ т̂ꙋ до́ вѣка·

22

И҆ рече е́и҆ е҆лка́на мꙋжъ е҆ѧ̀. творѝ бл҃гое пред̑ ѻ҆чи́ма твои҆ма сѣдѝ до́ндеже а́ще ѿдои́ши е҆̀. и҆ да поста́витъ г҃ь слово твоѐ, и҆зшед̑ше и҆зъ ѹ҆́стъ твои҆хъ, и҆ сѣ́де жена̀. и҆ доѧ́ше сн҃ъ свои до́ндеже ѿдои́тъ и҆̀·

23

И҆ взы́иде с нимъ ꙗ҆́ко ѿдоѝ е҆̀, съ тремѝ те́лцы. и҆ съ хлѣбы е҆́фи мꙋкѝ пшени́чны. и҆ мѣхъ вина̀. и҆ вънидо́ша в до́мъ гн҃ь в сило́мъ. и҆ ѻ҆троча̀ с ни́ми. и҆ принесѐ и҆̀ пред̑ г҃а·

24

И҆ пожрѐ ѿц҃ъ е҆го жр́ътвꙋ е҆же творѧ́ше, ѿ дн҃е и҆ въ дн҃ь гв҃и. и҆ принесо́ша ѻ҆троча̀ къ и҆лі́и. и҆ закла̀ ю҆́нец̑҇. и҆ рече а҆́н꙽на ѽ гн҃е жива̀ дш҃а моѧ. а́зъ е҆смь жена̀ ꙗ҆же ѻ҆ семъ ста́вши пред̑ тобо́ю помоли́тисѧ г҃ꙋ·

25

ѻ҆ ѻ҆троча́ти се́мъ моли́хсѧ. и҆ да́сть г҃ь проше́нїе моѐ е҆гоже проси́хъ ѹ҆ него.

26

І҆ а́з же даю̀ и҆̀ гв҃и въ всѧ̀ дни живота̀ е҆го. на помаза́нїе гв҃и. и҆ поклони́сѧ т̂ꙋ гв҃и·