Ostroh BibleПерша книга Самуїлова (Перша книга царів), розділ 10
Шрифт:
Запис:
1
И въземъ само́илъ сосꙋдъ съ е҆леѻ́мъ. и҆ възлїѧ на главꙋ̀ е҆го, и҆ лобыза и҆̀. и҆ рече пома́за л̂и тебѐ г҃ь на црс̑҇тво лю́демъ своим̑ и҆же въ і҆ил҃и·
2
и т̂ы пр́ьвыи бꙋ́деши въ людех̑ гн҃их̑, и҆ сп҃сеши ѧ҆̀ ѿ рꙋки врагъ их̑ ѻ҆́крс̑҇тъ·
3
Се̂ т̂и зна́менїе ꙗ҆́ко пома́за т̂ѧ г҃ь на достоа́нїе свое въ кнѧ́ѕѧ. и҆ ꙗ҆́ко ѿи҆́деши днс̑҇ь ѿ менѐ, и҆ ѻ҆брѧ́щеши дв̂а мꙋж́а при гробѣхъ рахи́линых̑. ѹ҆ предѣлехъ венїаминих̑. в силомѣ въ вакала́ѳе положени вели́ки, и҆ речета т̂и, ѻ҆брѣте л̂и ѻ҆слѧ́та, их̑же ходи́ста и҆ска́ти. и҆ с̂е ѿц҃ъ тво́и ѿвръжесѧ гл҃омъ ѻ҆слѧ́тъ. и҆ въспыта̀ ѻ҆ васъ гл҃ѧ. чт̂о сътворю̀ ѻ҆ сн҃ꙋ свое҆мъ·
4
И҆ ѿи́деши ѿтꙋ́дꙋ, и҆ по тѣхъ прїидеши до дꙋ́ба фаво́рѧ, и҆ ѻ҆брѧ́щеши т̂ꙋ тр̂и мꙋж́а въсходѧ́ща къ г҃ꙋ въ веѳи́ль. и҆ е҆ді́наго водѧ́ща тро́е козлѧ́тъ. а҆ дрꙋга́го носѧща тр̂и врѣтища хлѣ́ба. а҆ тре́тїи носѧ́ще мѣхъ вина̀·
5
И҆ въпро́сѧт꙽ т̂ѧ ꙗ҆́же ѻ҆ мирѣ, и҆ дадѧ́т꙽ т̂и дв̂а нача́лнаѧ хлѣ́ба, и҆ прїми ѿ рꙋкъ и҆хъ·
6
И҆ по сих̑ да възы́деши на хо́лмъ бж҃їи. и҆деже е҆сть събра́нїе и҆ноплеме́нникъ, ꙗ҆́ко т̂ꙋ е҆сть жи́тїе их̑·
7
и҆ бꙋ́детъ е҆гда̀ взы́деши тꙋ̀ во́ град̑, и҆ срѧ́щеши ли́къ прро̑҇къ и҆сходѧ́щъ ѿ ва́мы и҆ пред̑ ни́ми свири́ли, ти́мпа́ны, и҆ сопѣ́ли, и҆ гꙋ́сли. и҆ тїи проповѣ́дающе·
8
И҆ сни́детъ на́ тѧ дх҃ъ гн҃ь, и҆ прро̑҇чествꙋ́еши с ни́ми. и҆ ѻ҆брати́шисѧ въ мꙋж́а и҆но́го·
9
И҆ бꙋдет̑ е҆гда̀ прїи́дꙋтъ зна́менїѧ с̂и на́ тѧ, творѝ вс̂е е҆ли́ко а҆́ще ѻ҆брѧ́щетъ рꙋка̀ твоа, ꙗ҆́ко б҃ъ е҆сть с тобо́ю·
10
И҆ сни́деши пре́жде менѐ въ галга́лъ. и҆ с̂е а҆́зъ сни́дꙋ к тебѣ възнестѝ вс̂есъж꙽же́ныхъ, и҆ пожрѣти жр́ътвꙋ ми́рнꙋ, з҃, дн҃їи. пожде́ши до́ндеже прїидꙋ к тебѣ, и҆ покажꙋ̀ т̂и что̀ сътвори́ши·
11
И҆ бы́сть е҆гда̀ възврати́сѧ саѹ́л꙽ ѿ совокꙋпле́нїа, разыйтисѧ съ само́иломъ. и҆ преложи е҆мꙋ б҃ъ срд̑це на и҆́но, и҆ прїидо́ша вс̂ѧ зна́менїа сїѧ въ дн҃ь ѻ҆́нъ·
12
И҆ възы́детъ ѿтꙋдꙋ на хо́лмъ. и҆ с̂е ли́къ прро̑҇чески проти́вꙋ е҆мꙋ, и҆ взы́де на́нь дх҃ъ бж҃їи, и҆ прорица́ше средѣ их̑·
13
И бы́ша вс̂и ви́дѣвшей е҆го вчера̀ и҆ ѻ́номъ дн҃и, и҆ ви́дѣша и҆ с̂е то́й посредѣ̀ пророкъ прорица́ѧ·
14
И҆ рѣша лю́дїе ко́ждо къ и҆́скренемꙋ своемꙋ, чт̂о сѐ быв̑҇шее сн҃ꙋ ки́совꙋ, е҆да̀ и҆ саѹ́лъ е҆сть въ прро̑҇цѣхъ·
15
И҆ ѿвѣща̀ нѣ́кто и҆хъ и҆ рече, кт̂о ѿц҃ъ е҆мꙋ не ки́съ л̂и, сего ра́ди бы́сть въ при́тъчю, а҆́ще и҆ саѹ́лъ въ прро̑҇цѣхъ·
16
И҆ скон꙽ча прро̑҇чествꙋа, и҆ прїиде тꙋ на хо́лмъ·
17
И речѐ ѹ҆́й е҆го к немꙋ, и҆ къ ѻ҆тро́чищꙋ е҆го ка́мо и҆дѣта, и҆ рѣста ѻ҆слѧт̑ и҆ска́ти, и҆ вѣ́девѣ, ꙗ҆́ко нѣсть их̑, и҆ въходи́хомъ къ само́илꙋ·
18
И҆ рече ѹ҆́й саѹ́ловъ възвѣсти м̂и нн҃ѣ чт̂о тѝ речѐ само́илъ·
19
И҆ рече саѹл̑҇ ѹ҆́е҆ви свое҆мꙋ, вѣ́стїю възвѣстѝ м̂и ꙗ҆ко ѻ҆брѣтошасѧ ѻ҆слѧ́та. гл҃а же црс̑҇каго не възвѣстѝ е҆мꙋ, е҆же реч̑҇ самои҆лъ·
20
И҆ заповѣ́да само́илъ всм̑ѣ лю́демъ прїити къ г҃ꙋ в маси́ѳъ·
21
И҆ рече само́илъ къ сн҃омъ і҆и҆л҃евымъ, си́це речѐ г҃ь б҃ъ і҆и҆л҃евъ гл҃ѧ·
22
а҆зъ е҆смь и҆зведы́и ѿц҃а ва́ша сн҃ы і҆и҆л҃евы ѿ землѧ̀ е҆гѷпет̑ски. і҆ и҆зѧх̑ в̂ы ѿ рꙋкѝ фараѻ́на цр҃ѧ е҆гѷпет̑ска, и҆ ѿ всѣхъ цр҃ь ѻ҆скръблѧ́ющих̑ в̂ы·
23
И҆ в̂ы днс̑҇е ѹ҆ничижи́ста б҃а ва́шего. иже то́й е҆сть сп҃са́ѧ в̂ы ѿ всего̀ ѕл̂а ва́шего и҆ скр́ъби, и҆ рѣсте н̂и. н̂о цр҃ѧ да поста́ви над̑ на́ми·
24
И҆ нн҃ѣ ста́ните в̂ы са́ми пред̑ гм҃ъ по хорꙋгвам̑ ва́шимъ, и҆ по племе́немъ вашим̑, и҆ ты́сѧщами ва́шими·
25
И҆ приведѐ само́илъ вс̂ѧ колѣ́на і҆и҆л҃ева. и҆ падѐ жре́бїи на хорꙋгвѝ венїа҆ми́ни·
26
И҆ вънесе хорꙋго́въ венїами́ню в колѣна. и҆ ѻ҆брꙋчъ колѣномъ ма́терїиномъ, и҆ розложи́ша по мꙋ́жехъ. и҆ ѻ҆брꙋчен꙽ бысть саѹ́лъ сн҃ъ кисовъ, і҆ и҆ска́хꙋ е҆го и҆ не брѣта́шесѧ·
27
И҆ въпраша́ше само́илъ е҆ще г҃а гл҃ѧ, а҆́ще прїи́дет̑ сѣмо мꙋжъ е҆щѐ, е҆гоже м̂и г҃ь нареч̑҇. и҆ речѐ г҃ь с̂е се́й съкрове́нъ е҆сть въ ков꙽че́зѣ·
28
И҆ текъ само́илъ приведе и҆̀ ѿтꙋдꙋ, и҆ поста́ви и҆̀ посредѣ людїи и҆ възне́съсѧ над̑ всѣми люд̑ми. паче подо́бїѧ и҆ выш꙽ше·
29
И҆ рече само́илъ къ всѣмъ люде́мъ ви́дите л̂и е҆гоже и҆збра̀ г҃ь. ꙗ҆ко нѣсть ни е҆ді́нъ ѿ вас̑҇ подо́бенъ е҆мꙋ. и҆ ра́довашасѧ вс̂и людїе и҆ рѣша, да живе́тъ цр҃ь·
30
И҆ рече само́илъ къ люде́мъ ѻ҆правда́нїа црс̑҇твїѧ, и҆ написа́въ кни́гꙋ и҆ положи пред̑ гм҃ъ. и҆ ѿпꙋстѝ само́ил̑҇ вс̂ѧ лю́ди, і҆ и҆до́ша ко́ждо въ своа с̂и, и҆ саѹ́лъ и҆́де в дом̑ сво́и, въ гаваѻ́ны. і҆ и҆до́ша с ни́мъ сн҃ове си́лных̑, и҆хже г҃ь ѻ҆чистѝ срд̑ца съ саѹ҆́лом̑·
31
А҆ сн҃овеж̑ лꙋві́ини рѣша. чт̂о сп҃сетъ нас̑҇ то́й и҆ беществова́ша и҆̀, и҆ не и҆знесо́ша е҆мꙋ да́ровъ·
Джерела
