Ostroh BibleПерша книга Самуїлова (Перша книга царів), розділ 6
Шрифт:
Запис:
1
И б̂ѣ киѻ҆́тъ гн҃ь въ селѣхъ и҆ноплеме́нникъ, з҃ мс̑҇ць, и҆ въсмердѣ́сѧ землѧ̀ мꙋ́хами·
2
И҆ призва́ша и҆ноплеме́нницы, жерца и҆ волъхвы и҆ ѻ҆бааники и҆хъ гл҃юще, чт̂о сътвори́мъ кїѻ҆́тꙋ гн҃ю, скажи́те нам̑. и҆ како по́слемъ и҆̀ въ мѣ́сто е҆го·
3
Ѡ҆ни́ же рѣша им̑, а҆́ще ѿпꙋща́ете в̂ы кїѻ҆́тъ завѣта б҃а і҆и҆л҃ева, т̂о да не по́слете е҆го т꙽ща̀, н̂о ѿда́юще ѿдади́те е҆мꙋ за мꙋ́ки да́ры, и҆ тогда̀ ѻ҆ста́витсѧ ва́мъ і҆ и҆сцѣ́литесѧ, да не ѿстꙋ́питъ рꙋка̀ е҆го ѿ вас̑҇·
4
И҆ гл҃аша чт̂о е҆мꙋ за мꙋ́ки ѿдамы̀, и҆ рѣша и҆мъ. по чисме́ню вое҆во̑ и҆ноплеме́нническъ, е҃, сѣде́нїи зла́тых̑, и҆ пѧ́ть мꙋ́хъ зла́тыхъ, ꙗ҆ко прегрѣшенїѧ въ вас̑҇, и҆ въ кнѧ́ѕѣхъ ва́шихъ и҆ в людехъ ва́шихъ·
5
И҆ та́ко сътвори́те подобїе сѣда́нїи ва́ших̑, и҆ подобїе мꙋхъ ва́шихъ, расто́чшим̑ зе́млю и҆ въздади́те сла́вꙋ б҃ꙋ і҆и҆л҃евꙋ, ꙗ҆́ко да ѻ҆блегчи́тъ рꙋ́кꙋ свою ѿ ва́съ, и҆ ѿ бого́въ ва́шихъ и҆ ѿ землѧ̀ ва́шеѧ·
6
И҆ почт̂о ѻ҆тѧгча́ете срд̑це ва́ше, ꙗ҆коже ѻ҆тѧгчѝ е҆гѷпетъ и҆ фараѻ́нъ срд̑це сво́е, до́ндеже погꙋбѝ и҆хъ тогда̀ ѿпꙋстѝ и҆хъ, и҆ ѿи҆доша·
7
И҆ нн҃ѣ возмѣте и҆ сътвори́те колесницꙋ но́вꙋ е҆ді́нꙋ и҆ дв̂ѣ кра́ве пр́ьвород̑нѣ, и҆мѣю́ща телѧ́та на ни́хже не бѧ́ше ꙗ҆́рмо. и҆ въпрѧзите кра́вы в колесницꙋ, а҆ телѧ́та възврати́те въспѧ́тъ въ до́мъ·
8
И҆ възе́мше кїѻ҆́тъ гн҃ь и҆ въстави́те и҆҇ на колесни́цꙋ, и҆ сосꙋды зла́тыа ѿдади́те е҆мꙋ за мꙋ́ки, и҆ положите въ ѻ҆бложе́нїе въ стра́нѣ ѹ҆ча́стїе е҆мꙋ и҆ ѿпꙋ́сти́те и҆̀ да и҆́детъ·
9
Посе́м же ѹ҆́зрите а҆́ще бꙋ́детъ на пꙋтѝ предѣла свое҆го, въ веѳъсамꙋсъ т̂о сїи сътворѝ на́мъ ѕло́бꙋ вели́кꙋю сїю, и҆ а́ще н̂и, т̂о ѹ҆разꙋмѣ́емъ ꙗ҆́ко нѣсть рꙋка̀ е҆го прикаса́ющисѧ на́съ, н̂о приключе́нїе с̂е бы́сть на́мъ·
10
И҆ сътвори́ша и҆ноплеме́нницы та́ко. и҆ пое́мша дв̂ѣ кра́ве прьворо́днѣ. и҆ въпрѧго́ша ѧ҆̀ в колесни́цꙋ. и҆ телѧ́та ею̀ затвори́ша въ хра́мѣ·
11
И҆ възложи́ша кїѻ́тъ на колесни́цꙋ, и҆ да́ры ѻ҆бложи́ста мꙋ́хи зла́тыѧ и҆ подо́бнаѧ сѣда́нїю и҆хъ·
12
И҆ ѹ҆пра́вистасѧ кра́вы на пꙋть, прѧ́мо пꙋте́мъ и҆же въ веѳса́мꙋ и҆до́ста. и҆ не съвраща́ющисѧ, н̂и на́ десно, н̂и на шꙋ́е. и҆дꙋще и҆ рекꙋще, и҆ вое҆во́ды и҆ноплеме́нникъ. и҆дѧ́хꙋ въ слѣдъ е҆го до предѣлъ веѳса́мъскихъ·
13
И҆ въ веѳсами́се жнѧ́хꙋ жа́твы пшени́ца въ ѹ҆до́лїѝ, и҆ възведо́ста ѻ҆́чи своѝ ви́дѣша киѻ́тъ гн҃ь, и҆ възвесели́шасѧ ви́дѧще. і҆ и҆зыидо́ша на срѣте́нїе е҆мꙋ̀·
14
И҆ колесни́ца вни́де въ село̀ е҆ѳса́м꙽ско, и҆ ста̀ т̂ꙋ. и҆ быс̑҇ т̂ꙋ камы́къ ве́лїи, і҆ и҆с꙽сѣ́кше дре́ва колесни́чнаѧ, и҆ кра́вы. възнесо́ша на вс̂ѧсъж꙽жега́емаѧ г҃ꙋ·
15
Левѷти же възнесо́ша киѻ́тъ гн҃ь, и҆ да́ры ѻ҆бложи́ста и҆же с не́ю бы́ша. и҆ ѹ҆ них̑ сосꙋ́ди зла́тїи и҆ положи́ша ѧ҆̀ при ка́мени сем̑ вели́цѣмъ. и҆ мꙋжи веѳсамꙋ́ски възнесо́ша вс̂ѧсъж꙽жега́емаѧ·
16
и҆ пожро́ша жрътвꙋ в то́и дн҃ь г҃ꙋ·
17
И҆ пѧ́ть вое҆во́дъ и҆ноплеме́нникъ зрѧ́хꙋ. и҆ възврати́шасѧ въ а҆к꙽каро́нь въ дн҃ь то́и·
18
И҆ сїи седѣ́нїѧ зла́тыѧ, и҆же възда́ша и҆ноплеме́нницы за мꙋ́кꙋ г҃ꙋ. а҆задьска е҆ді́на, га́зска е҆ді́на, а҆скало́ньска е҆ді́на, ге́ѳ꙽ска е҆ді́на, а҆к꙽каро́ньска е҆ді́на·
19
И҆ зла́тыѧ мꙋхи по чисме́нъ всѣ́хъ град̑ и҆ноплеме́нническъ пѧтѝ вое҆во́дъ ѿ гра́да ѹ҆тверъжде́на. и҆ до ве́си фериѕе́ѻвы, и҆ до ка́мени вели́каго. на не́мже положи́ша киѻ́тъ завѣта гн҃ѧ и҆же е҆сть и҆ до сего дн҃и. на селѣ̀. веѳса́мы·
20
И҆ ѹ҆бѝ б҃ъ въ мꙋже́хъ веѳсамꙋ́скихъ и҆же възрѣша в꙽ киѻ́тъ гн҃ь. и҆ ѹ҆бѝ в ни́хъ, ҂н҃, и҆ о҃ мꙋжїи. и҆ пла́кашесѧ людїе. ꙗ҆́ко сътворѝ г҃ь в лю́дех̑ ꙗ҆́звꙋ вели́кꙋ ѕѣ́ло·
21
И҆ рѣша мꙋжи и҆же ѿ веѳсамꙋса. кт̂о мо́жетъ пои҆тѝ пред̑ гм҃ъ ст҃ымъ си́мъ. и҆ къ комꙋ̀ взы́идетъ киѻ́тъ завѣта гн҃ѧ, ѿ нас̑҇·
22
И҆ посла́ша послы̀ къ живꙋщим̑ в карїа҆ѳїа҆ри́мѣ гл҃ще. възврати́ша и҆ноплемен̑҇ницы киѻт̑ гн҃ь и҆ сни́дѣте възнесете и҆̀ та́мо к себѣ̀·
Джерела
