Ostroh Bible❧Друга книга хронік, розділ 23

1

Въ лѣто же сед̑мое, ѹ҆крѣпи́сѧ і҆ѻ҆да́и. прїѧтъ сот̑ники и҆ а҆зарїю и҆же е҆сть сн҃ъ і҆ѻ҆роа́мль, і҆ и҆зма́елѧ сн҃а і҆ѻ҆на́нѧ, и҆ а҆за́рїю сн҃а ѻ҆ви́дова, и҆ а҆масїю сн҃а а҆даи҆е҆ва, і҆ е҆лисафа́на сн҃а захарїина, и҆ внїиде с ни́м꙽ в до́мъ гн҃ь·

2

И҆же ѻ҆бходѧще і҆ѹ҆де́ю собрахꙋ левѷты ѿ всѣхъ гра́довъ и҆ѹ́диныхъ, и҆ нача́лницы ѻ҆би́телеи і҆и҆л҃евых̑·

3

И҆ прїидоша въ і҆ерс̑҇лим̑, и҆ завѣщаша вс̂и събра́вшисѧ, завѣт꙽ цр҃ьскїи, в꙽ домꙋ̀ бж҃їи и҆ показа и҆мъ цр҃ѧ, рече же к нимъ і҆ѻ҆да́и, с̂е сн҃ъ цр҃евъ да въцр҃итсѧ. ꙗ҆ко гл҃алъ е҆сть г҃ь на домъ двд҃въ. и҆ с̂е е҆сть слово е҆же сътвори́сте нн҃ѣ. тре́тїа часть ѿ васъ да и҆зыидетъ въ сꙋбо́тꙋ сщ҃ен꙽никовъ и҆ левѷтовъ и҆ въ вра́та вход̑ныѧ. и҆ третїѧ часть къ домꙋ̀ цр҃евꙋ, и҆ тре́тїѧ ча́сть къ вра́томъ сред̑ним. и҆ вс̂и прочїи лю́дїе да бꙋдт̑ꙋ въ дворѣхъ до́мꙋ гн҃ѧ·

4

Никтоже и҆́нъ да вни́детъ въ до́мъ гн҃ь.

5

Токмо сщ҃ен꙽ницы и҆ левѷти і҆ и҆же слꙋжат̑ ѿ левѷтъ. тїи то́кмо вни́дꙋтъ ꙗ҆́ко ѻ҆сщ҃ен꙽ни сꙋть, и҆ вс̂и про́чїи лю́дїе въздръжат̑ стра́жꙋ гн҃ю·

6

Левѷти же ѻ҆быидꙋтъ цр҃ѧ, и҆мѣющи е҆ді́нъ ко́ждо ѻ҆рꙋжїа своѧ въ рꙋкꙋ свое҆ю̀. и҆ а́ще кт̂о въходѧщъ бꙋдет̑ въ цр҃ковъ да ѹ҆бїетсѧ. и бꙋдꙋтъ же съ цр҃емъ въходѧ́щеи і҆ и҆сходѧщеи с ним̑ сътвори́ша б̂о левѷти и҆ весь і҆ѹ́да. по вс̂ѧ и҆же повелѣ і҆ѻ҆да́и жрецъ. и҆ прїѧ́ша кождо мꙋ́жы и҆же подъ ни́ми бѣ́хꙋ. ѿ нача́ла сꙋботы, и҆ до и҆схода сꙋботы. зане не разорѝ и҆ѻ҆дае жрец̑҇ слꙋ́жбы по всѧ̀ дн҃и ѹ҆чине́ное·

7

дасть і҆ѻ҆да́е сщ҃енникъ со́тникомъ, по чи́нꙋ поста́вленымъ, ме́чи и҆ щи́ты, и҆ бро́нѧ цр҃ѧ дв҃да ꙗ҆́же ѻ҆сщ҃а в домꙋ̀ гн҃и. и҆ поста́ви же вс̂и лю́ди дръжа́щїи ме́чи ѻ́стры ѿ десны́а страны̀ цр҃кви, даже до лѣ́выѧ страны̀ цр҃кви ѻ҆лтарѧ̀ и҆ домꙋ цр҃ева ѻ҆крс̑҇тъ. і҆ и҆зведо́ша сн҃а цр҃ева. и҆ наложи́ша е҆мꙋ дїадимꙋ и҆ свѣдѣтельство зако́нꙋ и҆ поста́виша е҆го ц҃рем̑ и҆ пома́за е҆го і҆ѻ҆да́и жрецъ, и҆ сн҃ове е҆го и҆ возопи́ша е҆мꙋ и҆ реко́ша. живѝ цр҃ю. и҆же е҆гда̀ ѹ҆слы́ша гоѳолїѧ глас̑҇ людїи текꙋщих̑ і҆ и҆сповѣда́ющих̑ и҆ хвалѧ́щихъ цр҃ѧ. и҆ вни́де къ цр҃ю въ цр҃квъ гн҃ю. і҆ е҆гда же ви́дѣ цр҃ѧ стоа́ща на степе́ни е҆го восхо́да, начал̑҇ницы же и҆ народи ѻ́крс̑҇тъ е҆го. всѝ лю́дїе зем̑стїи радꙋю҆щисѧ и҆ звꙋча́хꙋ трꙋ́бы. и҆ пою́щих̑ въ ѻ҆рга́ны мꙋсикїю и҆ хвалѧ́щих̑ хва́лꙋ·

8

Растерзаж̑ ри́зы своа гоѳолїа и҆ възопї и҆ рече. ловле́нїе ловленїе. и҆зыиде же і҆ѻ҆да́и а҆рхїере́и къ сотникомъ и҆ нача́лникомъ во́иномъ рече им̑. и҆зведѣте ю҆̀ во́нъ цр҃кви і҆ и҆зыидѣте въ слд̑ѣ е҆ѧ̀, и҆ да ѹ҆бїетсѧ внѣ̀ мечемъ. повелѣ б̂о сщ҃ен꙽никъ да не ѹ́мретъ в꙽ домꙋ̀ гн҃и. и҆ да́ша е́й поко́и на мало до́ндеже вънидо́ша въ вра́та ко́нник̑҇ до́мꙋ цр҃ева. ѹ҆би́ша е҆ѧ̀ т̂ꙋ·

9

И҆ завѣща̀ и҆ѻ҆да́и завѣтъ проме́жꙋ е҆го всѣхъ лю́дїи и҆ цр҃ѧ. даб̂ы бы́ли лю́дї гн҃ѧ·

10

И҆ внидо́ша же вс̂и лю́дїе землѧ̀ в꙽ до́мъ ваа́ловъ и҆ разориша е҆го, и҆ ѻ҆лта́ри е҆го і҆ и҆до́лы е҆го съкрꙋши́ша и҆ матѳа́на же жерца̀ ваа́лова ѹ҆би́ша̑ пред̑ ѻ҆лта́ремъ е҆го·

11

И҆ нача̀ і҆ѻ҆да́и жрецъ дѣ́ла въ домꙋ̀ гн҃и. под̑ рꙋ́кꙋ сщ҃е́нниковъ и҆ левѷтовъ. и҆ поста́ви повсѧ̀дн҃евное слꙋженїе жер꙽цевъ, и҆ левѷтовъ. и҆́хже раздѣли дв҃дъ въ домꙋ̀ гн҃и, и҆ се́й принесе вс̂ѧсъж꙽женїѧ гв҃и. ꙗ҆́ко пи́санно е҆сть въ зако́нѣ моѷсїѻ́вѣ·

12

Въ ра́дости и҆ пѣнїѝ, по расмотренїю двд҃вꙋ. и҆ поста́виша же две́рники въ вра́тѣхъ до́мꙋ гн҃ѧ. и҆ да не вни́дет̑ в ню̀ нечи́стъ въ всѧ́кои вещи·

13

И҆ прїѧ҆ша же сотъники и҆ крѣпкїѧ мꙋж́а, и҆ нача́лники людїи, и҆ всѝ лю́дїе землѝ. и҆ сътвори́ша сни́ти цр҃ю ѿ до́мꙋ гн҃ѧ. и҆ въни́де по́средѣ вра́тъ внꙋтрънихъ въ до́мъ цр҃евъ. и҆ посади́ша е҆го на прс̑҇тлѣ цр҃ьстѣмъ·

14

И҆ възвесели́ша же сѧ вс̂и лю́дїе земъстїи. и҆ град̑ ѹ҆поко́исѧ. и҆ гоѳолїѧ ѹ҆бїена е҆сть мече́мъ·