Ostroh Bible❧Друга книга хронік, розділ 36

1

И възѧ́ша лю́дїе землѧ̀ і҆ѻ҆а́хаза сн҃а і҆ѻ҆сїина и҆ пома́за̑ша е҆го. и҆ поста́виша е҆го цр҃ѧ въ мѣ́сто ѿц҃а е҆го въ і҆ерс̑҇лимѣ. к҃г, лѣта бысть і҆ѻ҆а́хазъ е҆гда̀ црс̑҇твова́ти нача̀. и҆ тр̂и мс̑҇цы црс̑҇твова̀ въ і҆ерс̑҇лимѣ·

2

І҆ и́мѧ мт҃ри е҆го а҆мита́ль, дще́рь і҆е҆римїѹ҆̀ ѿ ло́вны, и҆ сътворѝ лꙋкавое пред̑ гм҃ъ, по всемꙋ̀ ꙗ҆́же сътвори́ша ѿц҃ы их̑·

3

И҆ плѣнѝ и҆ѻ҆а҆ха́за и҆ ѻ҆кова̀ е҆го, фараѻ́нъ неѻ҆ха́и въ девла́ѳе, въ землѝ е҆ѳа́мли, е҆же не црс̑҇твовати е҆мꙋ въ і҆ерс̑҇ли́мѣ·

4

И҆ преведе е҆го цр҃ь въ е҆гѷпетъ. и҆ возложѝ да́нь на землю і҆и҆л҃евꙋ, р҃, тала́н꙽тъ сребра̀, и҆ тала́нтъ зла́та. и҆ поста́ви фараѻ́нъ неѻ҆хаи в꙽ него̀ мѣ́сто цр҃ѧ е҆лїа҆ки́ма бра́та е҆го над̑ і҆ѹ҆де́ею і҆ерс̑҇ли́момъ. и҆ превратѝ и҆́мѧ е҆го і҆ѻ҆а҆ким̑, і҆ѻ҆а҆ха́за же пред̑него цр҃ѧ бра́та і҆ѻ҆а҆ки́мова взѧ́тъ фараѻ́нъ неѻ҆ха́и, и҆ въведе е҆го въ е҆гѷпетъ и҆ ѹ́мре т̂ꙋ. сре́бро же и҆ зла́то дава́хꙋ е҆мꙋ·

5

Тогда̀ нача̀ землѧ̀ дава́ти да́нь. е҆же дава́ти сребро̀ во ѹ҆ста̀ фараѻ́нова, и҆ ко́ждо по си́лѣ даа́хꙋ сребро̀, и҆ зла́то ѿ людїи землѧ фараѻ́нꙋ неѻ҆ха́ю·

6

И҆ к҃е, лѣтъ бысть і҆ѻ҆а́ким̑ е҆гда̀ црс̑҇твова́ти нача̀. и҆ а҃і, лт̑ѣ, црс̑҇твова̀ въ і҆ерс̑҇лимѣ·

7

І҆ и́мѧ мт҃ри е҆го зехо́ра дщѝ нирїѹ҆̀ ѿ ра́мы. сътвори́ же лꙋка́вое пред̑ гм҃ъ по всемꙋ̀ е҆ли́ко сътвори́ша ѿц҃ы е҆го·

8

И҆ въ дн҃и же е҆го прїиде навъходоносоръ цр҃ь вавѷлоньскїи на́ землю, и҆ б̂ѣ и҆ е҆мꙋ слꙋжа тр̂и лѣта и҆ ѿстꙋпѝ ѿ него·

9

И҆ посла̀ г҃ь на ни́хъ по́ѧ҆сники хал꙽де́искїѧ, и҆ по́ѧсники сѷрьскїѧ, и҆ по́ѧ҆сники моа́витьскїѧ, и҆ сн҃овъ а҆м꙽моновыхъ, и҆ самарїиских̑. и҆ не сътвори́ша ничто́же по словесѝ гн҃и, е҆же гл҃а ѹ҆сты̀ про̑҇ркъ е҆го. ѻ҆ба́че же ꙗ҆́рость гн҃ѧ б̂ѣ на і҆ѹ́дѣ е҆же ѿринꙋти е҆го ѿ лица̀ е҆го, грѣхъ ради манасїи҆ных̑ въ все́мъ ꙗ҆́же сътворѝ. и҆ въ кро́ви неви́ннѣи е҆же и҆злїѧ і҆ѻ҆а҆ки́мъ. и҆ напо́лни і҆ерс̑҇лимъ кро́ви неви́н꙽ныѧ. н̂о тогда̀ не восхотѣ̀ е҆щѐ и҆скорени́ти и҆хъ·

10

И҆ посе́мъ възы́иде навъходоносоръ цр҃ь вавѷлоньскїи. и҆ ѻ҆кова е҆го ѻ҆ковами мѣ́дѧными, и҆ приведе е҆го въ вавѷлонъ, и҆ ча́сть сосꙋ́дов꙽ до́мꙋ гн҃ѧ пренесѐ въ вавѷлонъ. и҆ поста́ви ѧ҆̀ въ цр҃кви свое́и въ вавѷлонѣ·

11

И҆ про́чаѧ же слове́съ і҆ѻ҆а҆ки́мовыхъ, и҆ вс̂ѧ ꙗ҆́же содѣла́лъ е҆сть. се сїѧ пи́сана съдръжа́тсѧ въ кни́ѕѣ цр҃еи і҆ѹ́диныхъ·

12

И҆ ѹ́мре і҆ѻ҆а҆кимъ съ ѿц҆ы свои́ми. и погребе́нъ бы́сть въ ганозо́ни, со ѿц҃ы е҆го·

13

И҆ црс̑҇твоваж̑ і҆е҆хонїѧ сн҃ъ е҆го в него̀ мѣ́сто, и҃і, лѣтъ. бы́сть і҆е҆хо́нїѧ е҆гда̀ црс̑҇твова́ти нача̀. г҃, мс̑҇цы, и҆ і҃, дн҃їи црс̑҇твова̀ въ і҆ерс̑҇лимѣ, и҆ сътворѝ лꙋка́вое пред̑ гм҃ъ·

14

Є҆гда же лѣтꙋ крг̑҇ꙋ вратѧ́шесѧ. посла̀ навъходоносо́ръ цр҃ь, и҆же и҆зведо́ша е҆го въ вавѷлонъ въкꙋпѣ со предра́гими сосꙋды до́мꙋ гн҃ѧ·

15

И҆ цр҃ем̑ поста́ви седекїю ѹ҆́ѧ е҆го над̑ і҆ѹ́дою і҆ерс̑҇лимомъ. к҃а, лѣто бы́сть седекїѝ е҆гда̀ црс̑҇твова́ти нача̀. и҆ а҃і, лѣтъ црс̑҇твова̀ въ і҆ерс̑҇лимѣ·

16

И҆ сътвори лꙋка́вое въ ѻ҆́чїю г҃а б҃҃а свое҆го. и҆ н̂и ѹ҆срами́сѧ лица і҆е҆ремїи про̑҇рка гл҃ющаго к немꙋ ѿ ѹ́стъ гн҃ихъ. ѿ цр҃ѧ же навходоносо́ра ѿт̑и҆де и҆же заклѧ̀ е҆го по́ бѕ҃ѣ, и҆ ѻ҆жестѝ вы́ю свою̀ и҆ срд̑це ѹ҆крѣпѝ да не ѻ҆брати́тсѧ къ г҃ꙋ б҃ꙋ і҆и҆л҃евꙋ. н̂о и҆ вс̂и нача́лницы і҆ѹ́дины и҆ сщ҃ен꙽ником̑ и҆ лю́ди землѧ̀ престꙋпи́ша безако́н꙽но по всѣхъ поноше́нїихъ ꙗ҆зы́ком̑. и҆ ѻ҆сквръниша до́мъ гн҃ь и҆же ѻ҆ст҃и себѣ̀ въ і҆ерс̑҇лимѣ·

17

И҆ посыла́ше г҃ь б҃ъ ѿц҃ъ и҆хъ к ни́мъ ѹ҆сты̀ про̑҇ркъ е҆го ѹ҆треню́юще, и҆ посла̀ вѣстники е҆го·

18

Того ради да прости́тъ лю́ди и҆ жили́ще своѐ. и҆ тїи поноша́хꙋ посло́мъ бж҃їимъ. и҆ ѹ҆ничижахꙋ словеса̀ е҆го·

19

І҆ и҆грахꙋ про̑҇рки е҆го дондеже сни́детъ гнѣ́въ гн҃ь на лю́ди е҆го·

20

И҆ бысть ни е҆ді́но помне́нїе, и҆ наведѐ на ни́хъ цр҃ѧ халде́иска·

21

И҆ побѝ младе́нца и҆хъ мечемъ, въ домꙋ̀ ст҃нѧ е҆го. не пощадѣ седекїа ю́ных̑, и҆ дв҃ц꙽ не поми́лова, и҆ ста́рца их̑ и҆зведѐ. и҆ всѣхъ преда́сть въ рꙋки их̑·

22

И҆ вс̂ѧ сосꙋды до́мꙋ гн҃ѧ ꙗ҆́ко бо́лшаѧ та́ко и҆ ме́ншаѧ, и҆ сокровища цр҃кви и҆ вс̂ѧ сокро́вища цр҃ева. и҆ началъство, вс̂ѧ приведѐ въ вавѷлонъ·

23

И҆ зажъго́ша до́мъ бж҃їи. и҆ разори́ша стѣнꙋ̀ і҆ерс̑҇лимꙋ. и҆ вс̂и столпы̀ и҆хъ съжго́ша·

24

И҆ чт̂о предра́го бысть, и҆с꙽тни́ли сꙋть сосꙋдовъ. и҆ преселѝ про́чаѧ въ вавѷлонъ, и҆ бѣша е҆мꙋ и҆ сн҃ом̑ е҆го въ рабы̀, да́же до црс̑҇тва мид̑скаго·

25

да съвръшит̑сѧ слово гн҃е ѿ ѹ́стъ і҆е҆ремїинъ. до́ндеже праз̑нова̀ землѧ̀ сꙋбо́ты своѧ̀. е҆́же събот꙽ствова́ти вс̂ѧ дн҃и запꙋстѣнїѧ е҆ѧ̀. сꙋботъствова же до съвръше́нїѧ, сед̑мьдесѧт̑ лѣтъ·

26

Моли́тва манасїѧ цр҃ѧ і҆ѹ҆де́иска. е҆гда̀ плѣненъ дръжашесѧ въ вавѷло́нѣ·

27

Ги҃ вс̂едръжи́телю, б҃е ѿц҃ъ на́шихъ, а҆враа́мовъ, і҆ и҆саа́ковъ, і҆ и҆а́ковль, и҆ сѣмени их̑ правед̑наго, сътвори́выи нб҃о и҆ зе́млю, со всею̀ лѣпото́ю и҆хъ·

28

И҆ сопныи мо́ре сло́вом̑ повелѣнїа твое҆го, затворивыи без̑днꙋ и҆ запечатлѣвъ ю҆̀ стра́шнымъ и҆ сла́внымъ и́менемъ твои҆мъ, е҆гож̑ вс̂ѧ боѧ́тсѧ и҆ трепещꙋтъ ѿ лица̀ сла́вы твое́а. ꙗ҆ко непостоа́нна велелѣпота̀ сла́вы твое́ѧ, и҆ не сътрьпим̑ гнѣвъ, е҆же на грѣшникы преще́нїѧ твое҆го, бесчи́слена же и҆ неи҆слѣдованна ми́лость ѻ҆бѣща́нїа твое҆го. ты̀ б̂о е҆си г҃ь вы́шнїи млс̑҇рдъ, долготръпели́въ и҆ мно́гомлс̑҇тив꙽, и҆ ка́асѧ ѻ҆ ѕло́бахъ чл҃чьскыхъ. т̂ы г҃и по мно́жествꙋ ми́лости твое́ѧ ѻ҆бѣща̀ покаа́нїемъ ѻ҆ставленїе съгрѣши́вшимъ к тебѣ, и҆ мно́жествомъ щедротъ твои҆хъ наречѐ покаа́нїе грѣшникомъ въ сп҃сенїе·

29

Ты ѹ҆бо г҃и б҃е праведныхъ, нѣ́си положи́л꙽ покаа́нїе праведнымъ твои҆мъ, а҆враа́мꙋ, і҆ и҆саа́кꙋ, і҆ и҆а́ковꙋ, не съгрѣши́вшим̑ пред̑ тобо́ю, н̂о положил̑҇ е҆си покаа́нїе мнѣ̀ грѣшномꙋ, зане съгрѣших̑ т̂и паче числа̀ пѣска̀ мор̑҇ска́го ѹ҆мно́жишасѧ безаконїѧ моа г҃и ѹ҆мно́жишасѧ, и҆ нѣсмь достоин̑҇ възрѣти, и҆ ви́дѣти высотꙋ нбс̑҇нꙋю ѿ мно́жества непра́вд꙽ моих̑ свѧ́занъ е҆смь мно́гими ю҆́зами желѣзъными, ꙗ҆́ко не възвѣстѝ ми главы̀ моеѧ̀, и҆ нѣсть м̂и въсклоне́нїѧ, зане прогнѣвахъ ꙗ҆́рость твою, лꙋка́вое пред̑ тобою сътвори́въ, и҆ не сътворихъ во́лѧ твое҆ѧ, и҆ не съхранихъ повелѣнїи твои҆хъ. и҆ нн҃ѣ покланѧ́ю колѣнѣ срд̑ца мое҆го, молю̀ ю҆́же ѿ тебе блс̑҇гть. съгрѣшихъ г҃и съгрѣшихъ, и҆ безако́нїѧ моа аз̑ съвѣмъ. н̂о прошꙋ̀ и҆ молюсѧ тебѣ ѿра́ди ми г҃и ѿра́ди м̂и, и҆ не погꙋбѝ менѐ съ безако́ньми мои́ми, ниже въ вѣкъ враждовавъ съблюде́ши ѕол̑҇ мои҆хъ, и҆ не ѻ҆сꙋдѝ менѐ въ преи҆спод̑нихъ земли, зане т̂ы е҆си б҃е б҃ъ ка́ющихсѧ, да и҆ на мнѣ ꙗ҆ви́ши вс̂ю блгс̑҇ть твою, ꙗ҆́ко недостои́на сꙋща сп҃се́ши м̂ѧ, по мно́ѕѣи млс̑҇ти твое́и. и҆ восхвалю̀ т̂ѧ всегда̀ вс̂ѧ дн҃и живота̀ мое҆го. ꙗ҆́ко тебѐ поют̑ вс̂ѧ си́лы нбс̑҇ныа и҆ твоа̀ е҆сть сла́ва во́ вѣки, а҆ми́нь·

30

Коне́цъ вто́рыхъ кни́гъ паралипоме́нонъ. и́мать в себѣ̀ глв̑҇а л҃ѕ·