Ostroh BibleДруга книга Самуїлова (Друга книга царів), розділ 3
Шрифт:
Запис:
1
И бы́сть бра́нь на мно́го междꙋ до́мом̑ саѹ́лемъ. и҆ межи до́мом̑ дв҃двомъ. до́м же дв҃двъ възвыша́шесѧ и҆ крѣплѧ́шесѧ. и҆ дом̑ саѹ́ль и҆дѧ́ше і҆ и҆знемога́ше·
2
И҆ роди́шасѧ дв҃дви въ хевро́нѣ сн҃овъ, ѕ҃. и҆ б̂ѣ прьворо́дныи е҆мꙋ сн҃ъ, а҆м꙽мо́нъ. ѿ а҆хиноа҆мїи і҆и҆л҃ьтѧныни. и҆ вторы́и е҆мꙋ сн҃ъ, далꙋи҆ѧ. ѿ а҆вигѣѧ́ карми́льскїѧ. и҆ тре́тїи а҆весало́мъ сн҃ъ маа҆ѻ҆ха́ны дще́ре ѳоли́мины, цр҃ѧ гасꙋ́рьска. д҃ и, ѿ ѹ҆ри́нїѧ сн҃ъ а҆г꙽ги́ѳы, е҃ и, сафатїѧ ѿ витаа́лы. ѕ҃ и. е҆сѳъроа́мъ, ѿ а́глы жены̀, дв҃двы. сїѝ роди́шасѧ дв҃домъ въ хевро́нѣ·
3
И҆ е҆гда бы́сть бра́нь междꙋ до́момъ саѹ́лемъ. и҆ междꙋ до́момъ дв҃двымъ. и҆ бѧ́ше а҆вени́ръ держа̀ до́мъ саѹ́ловъ·
4
И҆ саѹ́лова под̑ло́жница б̂ѣ, е҆йже бѣ̀ и́мѧ ре́сѳа дщѝ и҆ѻ҆а́ва. и҆ поѧ́тъ ю҆̀ а҆вени́ръ. и҆ рече гевосте́и, сн҃ъ саѹ́ль къ а҆венирꙋ, чт̂о с̂е ты̀ вни́де къ под̑ло́жни́цы ѿц҃а мое҆го·
5
И҆ съжалѝ с̂и ѕѣло а҆вени́ръ ѻ҆ словесѝ се́мъ, е҆же рече е҆мꙋ и҆ гевосте́и. и҆ рече е҆мꙋ а҆вени́ръ е҆да̀ пе́сѣѧ̀ глава̀ е҆смь а҆зъ. да с̂и сътвори́хъ вс̂ѧ дне́сь. не сътворих̑ л̂и днесь млс̑҇ти до́мꙋ саѹ́лю ѿц҃а твое҆го и҆ братїи твое́и и҆ зна́емым̑ т̂и и҆ не въста́хъ л̂и а҆зъ на до́мъ дв҃двъ и҆ ты̀ взыска̀ непра́вды въ мн̂ѣ, жены̀ сеѧ̀ ра́ди дне́сь·
6
Си́ же да сътвори́тъ б҃ъ а҆вени́рꙋ. и҆ си да приложѝ е҆мꙋ, ꙗ҆́коже бо клѧ́тсѧ г҃ь двд̑ꙋ та́ко сътворю̀ е҆мꙋ в꙽ сїи дн҃ь·
7
И҆ приꙗ҆́ти црс̑҇тво ѿ до́мꙋ саѹ́лѧ. и҆ възъдви́гнꙋти прс̑҇толъ дв҃двъ въ і҆и҆л҃и. и҆ на і҆ѹ́дꙋ, ѿ да́на даже до верса́вїѧ.
8
И҆ не възмо́же ктомꙋ̀ гевꙋсте́и ѿвѣща́ти а҆вени́рꙋ словесѝ ѿ бо́ѧзни е҆го·
9
И҆ посла̀ а҆вени́ръ къ дв҃дꙋ послы̀ въ ѳела́мъ хевро́ньскїи. и҆дѣже б̂ѣ а҆бїе гл҃ѧ. положѝ завѣтъ свой со мно́ю, и҆ с̂е рꙋка моѧ с тобо́ю. възврати́ти м̂и к тебѣ весь і҆и҆л҃ь·
10
И҆ рече дв҃дъ добрѣ а҆зъ положꙋ̀ с тобо́ю завѣтъ. н̂о то́кмо словесе е҆ді́наго прошꙋ̀ ѹ҆ тебѐ гл҃ѧ. не и҆́маши ви́дѣти лица мое҆го. а҆ще не приведе́ши мельхо́лы дще́ри саѹ́лѧ. приходѧ́щꙋ ти ви́дѣти лицѐ мое·
11
И҆ посла̀ дв҃дъ къ гевосте́ю сн҃ꙋ саѹ́лю гл҃ѧ. пꙋстѝ женꙋ̀ мою мельхо́лꙋ, юже бѣхъ прїꙗ҆́лъ ѻ҆брѣ́занїѧ дѣлѧ кра́ѧ и҆ноплеме́нник꙽·
12
И҆ пꙋстѝ и҆ гевосте́и, и҆ поꙗ҆́тъ ю҆̀ ѿ мꙋжа е҆ѧ, ѿ ѳан꙽тїи́лѧ сн҃а селимо́нѧ·
13
І҆ и҆дѧ́ше мꙋжъ е҆ѧ с не́ю пла́часѧ даже до вара́ма. и҆ рече к немꙋ̀ а҆вени́ръ, и҆дѝ и҆ възврати́сѧ·
14
И҆ рече къ ста́ръцемъ і҆и҆л҃евымъ гл҃ѧ. вчера̀ и҆ ѻ҆ном̑ дн҃и и҆ска́сте дв҃да црс̑҇твова́ти над̑ ва́ми·
15
И҆ нн҃ѣ сътвори́те ꙗ҆́коже г҃ь гл҃а ѻ҆ дв҃дѣ гл҃ѧ. в рꙋ́цѣ раба̀ мое҆го дв҃да сп҃сꙋ лю́ди моѧ і҆и҆л҃ѧ, ѿ рꙋкѝ и҆ноплеме́нникъ. и҆ ѿ рꙋкѝ вра́гъ их̑·
16
И҆ гл҃а а҆вени́ръ, въ ѹ́ши венїа҆ми́нꙋ і҆ и҆де а҆вени́ръ гл҃ати въ ѹ́ши дв҃двѣ въ хевро́нѣ. вс̂ѧ ꙗ҆́же ѹ҆го́дна бѣша пред̑ ѻ҆чи́ма і҆и҆л҃евыма. и҆ пред̑ ѻ҆чи́ма всего до́мꙋ венїа҆ми́нѧ·
17
И҆ прїиде а҆вени́ръ къ дв҃дꙋ въ хевро́нъ. и҆ с ни́мъ, к҃, мꙋжъ. и҆ сътворѝ двд̑ъ пи́ръ а҆вени́рꙋ и҆ мꙋжем꙽ е҆го и҆же с ним̑·
18
И҆ рече а҆вени́ръ къ дв҃дꙋ. въста́невѣ нн҃ѣ і҆ и́девѣ. и҆ да съберꙋтсѧ къ господи́нꙋ с̂и цр҃ви весь і҆и҆л҃ь. и҆ положꙋ̀ с тобо́ю завѣтъ и҆ црс̑҇твова́ти и҆́маши всѣмѝ, и҆хже жела́етъ дш҃а т̂и и҆ посла̀ дв҃дъ а҆вени́ра, і҆ и́де с ми́ром̑·
19
И҆ сѐ ѻ҆́троцы дв҃двы, и҆ ѻ҆а́въ и҆дѧ́хꙋ ѿ и҆схо́да. и҆ коры́сть мно́гꙋ несѧ́хꙋ съ собо́ю. и҆ а҆вени́ръ ѹ҆жѐ не бѣ съ дв҃домъ въ хевро́нѣ. ꙗ҆́ко ѿсла́нъ бѧ́ше и҆ ѿпꙋще́нъ с ми́ромъ·
20
И҆ѻ҆ав̑҇ же и҆ все во́инъство е҆го прїиде. и҆ възвѣсти́ша и҆ѻ҆а́вꙋ гл҃юще. приходѝ а҆вени́ръ сн҃ъ ни́ровъ къ дв҃дꙋ, и҆ посла̀ и҆̀ и҆ ѿи́де с ми́ромъ·
21
И҆ въниде і҆ѻ҆а́въ къ дв҃дꙋ, и҆ рече чт́о с̂е е҆си сътвори́лъ. сѐ б̂о приходѝ а҆вени́ръ к тебѣ, и҆ почт̂о пꙋсти́лъ е҆си е҆го и҆ ѿи́де с ми́ромъ·
22
И҆л̂и не вѣ́си ѕло́бы а҆вени́ра сн҃а ни́рова. ꙗ҆́ко сълꙋкавствова́ѧ к тебѣ и҆дѧ́ше. разꙋмѣти хотѧ̀ и҆сход̑ твой и҆ въхо̑ твой, и҆ ѹ҆вѣдѣти вс̂ѧ ꙗ҆́же твори́ши ты̀·
23
И възврати́сѧ и҆ѻ҆а́въ ѿ дв҃да, и҆ посла̀ послы̀ въслѣ́дъ а҆вени́ра, и҆ въз꙽врати́ша и҆̀, ѿ кла́дѧзѧ седрам̑ска и҆ дв҃дъ не вѣ́дѧше·
24
И҆ възврати́сѧ а҆вени́ръ въ хевро́нъ. и҆ ѹ҆врати и҆ѻ҆а́въ стра́нными вра́ты. гл҃ати к немꙋ лꙋка́вно. и҆ ѹ҆да́ри и҆̀ под̑ срд̑це и҆ ѹ́мре въ кро́ви, а҆висаи́ли, брата и҆ѻ҆а́влѧ·
25
И҆ слы́ша дв҃дъ по си́хъ и҆ рече чи́стъ е҆смь а҆зъ и҆ црс̑҇тво мое ѿ г҃а. и҆ ѿ н҃нѣ и҆ до́ вѣка, ѿ кро́ве а҆вени́рѧ сн҃а ни́рова·
26
да сни́детъ на главꙋ̀ и҆ѻ҆а́влю, и҆ на ве́сь до́мъ ѿц҃а е҆го, да не ѻ҆скꙋдѣ́етъ ѿ до́мꙋ и҆ѻа́влѧ, и҆злива́ѧи сѣмѧ и҆ прокаже́ныи·
27
И҆ держа́и щи́тъ, и҆ да па́даю҆тъ ѻ҆рꙋжїемъ ѹ҆мале́ныи хлѣба да бꙋдетъ е҆мꙋ·
28
І҆ѻ҆а́в же і҆ а҆ве́са бра́тъ е҆го ѹ҆би́ша а҆вени́ра, понеж̑ ѹ҆бѝ а҆саи́лѧ бра́та и҆хъ в гаваѻ́ни на́ брани·
29
И҆ рече дв҃дъ къ и҆ѻ҆а́вꙋ и҆ къ всѣмъ лю́демъ е҆го раздерѣте ри́зы ва́ша, и҆ препоꙗ҆ши́тесѧ вре́тищи, и҆ рыда́ите ѻ҆ а҆вени́рѣ, сам̑ же цр҃ь дв҃дъ и҆дѧ́ше въ слѣ́дъ ѻ҆дра̀·
30
И погребо́ша а҆вени́ра въ хевро́нѣ, и҆ въздви́же цр҃ь гласъ свой, и҆ пла́касѧ над̑ гро́бомъ е҆го, и҆ вси лю́дїе пла́кашасѧ по а҆вени́рѣ·
31
И҆ пла́касѧ цр҃ь а҆вени́ра, и҆ рече а҆ще по сме́рти а҆ва́ли ѹ҆спѐ а҆вени́ръ·
32
То рꙋцѣ твоѝ не свѧ́жетасѧ, ни но́ѕѣ твоѝ не спине́тасѧ, н̂о ꙗ҆ко па́даютъ пред̑ сн҃ъми непра́вды та́ко падѐ, и҆ приложи́ша вси лю́дїе пла́катисѧ е҆го·
33
И҆ прїидо́ша вс̂и лю́дїе вече́рѧть. съ дв҃домъ ꙗ҆́сти хлѣ́бъ. е҆ще сꙋщꙋ дн҃и и҆ клѧ́тсѧ дв҃дъ гл҃ѧ с̂е да сътвори́тъ м̂и г҃ь, и҆ си́це да приложи́тъ. ꙗ҆́ко а҆́ще не за́идетъ сл҃нце не и́мамъ вкꙋси́ти хлѣба, н̂и иного чого̀·
34
И҆ ѹ҆го́дно бы́сть сло́во с̂е пред̑ всѣми, всѧ е҆ли́ко сътворѝ цр҃ь пред̑ людмѝ·
35
И҆ разꙋмѣша вс̂и лю́дїе, и҆ весь і҆и҆л҃ь в то́и дн҃ь. ꙗ҆́ко не бы́сть ѿ цр҃ѧ ѹ҆бїиства а҆вени́рꙋ сн҃ꙋ ни́ровꙋ·
36
И рече цр҃ь ѻ҆́трокомъ свои҆мъ. не вѣсте л̂и ꙗ҆́ко властели́нъ вели́къ падѐ в сїи́ дн҃ь въ і҆и҆л҃и·
37
І҆ ꙗ҆́ко а҆зъ е҆сми съѻ҆бѣщник̑҇ дне́сь и҆ въста́вленъ на цр҃ѧ. мꙋжи же сїѝ сн҃ове сарꙋи́ли, злѝ м̂и сꙋть. да възда́сть г҃ь творѧ́щимъ лꙋка́внаѧ, по ѕло́бѣ и҆хъ·
Джерела
