Ostroh Bible❧Дії святих апостолів, розділ 25

1

Фи́стъ же ѹ҆бо прїем꙽ власть, по трехъ дн҃ехъ възы́де въ і҆ерс̑҇ли́мъ ѿ кесарїѧ. сказа́ша же е҆мꙋ а҆рхїере́е и҆ пе́рвїи і҆ѹ҆де́ѻ҆мъ на па́вла, и҆ молѧхꙋ е҆го просѧще блгд̑ть нань, ꙗ҆́ко да по́слетъ е҆го въ і҆ерс̑҇ли́м꙽, лови́твꙋ творѧще ꙗ҆́ко да ѹ҆бїютъ е҆го на пꙋтѝ. фи́стъ же повелѣ стрещѝ павла въ кесарїи́, са́м же хотѧ̀ въско́рѣ и҆зы́ти. и҆же ѹ҆бо си́лни въ ва́съ, рече, съ мно́ю шедше а҆ще е҆сть каѧ непра́вда въ мꙋжѝ се́мъ, да гл҃ютъ нань. пребыв же ѹ҆ нихъ не мно́жае десѧти дн҃їи, сни́де въ кесарїю́·

2

на ѹ҆трѣѝ сѣдъ на сꙋдищи, повелѣ па́вла привестѝ. приведе́нꙋ же бывшꙋ е҆мꙋ, ѻ҆́крс̑҇тъ ста́ша и҆же ѿ і҆е҆рлс̑҇и́ма съшедъшиѝ і҆ѹ҆де́е, мно́ги и҆ тѧ́жки вины̀ приносѧще на па́вла, и҆хже не можа́хꙋ и҆зъѧ҆ви́ти, ѿвѣщава́ющꙋ е҆мꙋ, ꙗ҆ко ни въ за́конѣ і҆ѹ҆де́истѣ н̂и въ цр҃кви н̂и на кесарѧ что̀ съгрѣшихъ. фи́стъ же хотѧ ѹ҆годное і҆ѹ҆деѻ҆мъ сътворити, ѿвѣща́въ па́влови речѐ. хо́щеши л̂и въ і҆ерс̑҇ли́мъ възшед̑ та́мо ѻ҆ си́хъ сꙋдъ прїа́ти ѿ менѐ; рече же па́велъ, на сꙋдищи кесаре́вѣ стоа̀ е҆смь, и҆дѣже м̂и достои҆тъ сꙋдъ прїа́ти. і҆ѹ҆де́а ничи́мже ѻ҆бидил̑҇ е҆смь, ꙗ҆́коже и҆ т̂ы добрѣ вѣ́си. а҆ще ѹ҆бо непра́вдꙋа и҆л̂и досто́иное сме́рти сътворих̑ чт̂о, не ѿме́щꙋсѧ ѹ҆́мрети. а҆ще ли же ничтоже е҆сть ѻ҆ мн̂ѣ е҆же сїи на мѧ клеве́щꙋтъ, никтоже м̂ѧ мо́жетъ тѣмъ вы́дати, кесарѧ̀ нарица́ющꙋ. тогда фи́стъ състѧза́всѧ съ совѣтникы, ѿвѣща̀, кесарѧ̀ л̂и наре́клъ е҆си; къ кесарю да и́деши. дн҃ем же минꙋ́вшимъ нѣ́кои҆мъ·

3

зач̑҇, м҃и·

4

А҆гри́па цр҃ь и҆ верникїи снидо́ша в кесарїю цѣловати фи́ста. ꙗ҆коже мно́ги дн҃и пребы́ста т̂ꙋ, фи́ст꙽ сказа̀ цр҃ю ꙗ҆же ѻ҆ па́влѣ, гл҃ѧ, мꙋж꙽ нѣ́кїи е҆сть ѻ҆ста́вленъ ѿ фили́ѯа ѹ҆́жникъ, ѻ҆ не́мже бывшꙋ м̂и въ і҆ерс̑҇ли́мѣ, ꙗ҆ви́ша а҆рхїере́е и҆ старцы і҆ѹ҆де́истїи, просѧ́ще нань прѧ̀. к ни́мже ѿвѣщах꙽, ꙗ҆ко нѣ́сть ѻ҆бычаи ри́млѧномъ выдати кое҆го чл҃ка на поги́бель, пре́же даже ѻ҆клевета́емыи предъ лицемъ не и҆́мать клеве́щꙋщихъ е҆го, и҆ мѣсто ѿвѣта прїи́мет꙽ ѻ҆ свое҆мъ съгрѣше́нїи. съшед̑шим же сѧ и́мъ зд̂ѣ, закоснѣнїа ни е҆ді́наго же сътворихъ, на ѹ҆трѣѝ сѣдъ на сꙋдищи, повелх̑ѣ привести мꙋжа. ѻ҆крс̑҇тъ е҆го став̑҇ше клевет̑ницы̀, ни е҆ді́нꙋ винꙋ нанесо́ша и҆хже непщева́хъ а҆з꙽. стѧза́нїа же нѣ́каа ѻ҆ свое́и разли́чнѣй вѣрѣ и҆мѧ́хꙋ к немꙋ, и҆ ѻ҆ нѣ́кое҆мъ і҆с҃ѣ ѹ҆ме́ршемъ, е҆гоже па́велъ гл҃аше жи́ва сꙋща·

5

Недоѹ҆мѣѧ же сѧ а҆зъ е҆же ѻ҆ семъ възыска́нїи, і҆ и҆стѧза́нїи. гл҃ах̑ а҆ще хо́щетъ и҆ти въ і҆ерс̑҇ли́мъ, и҆ та́мо сꙋдъ прїима́ти ѻ҆ сих꙽. па́влꙋ же и҆спроси́вшꙋ блюде́нꙋ быти е҆мꙋ до разсꙋженїѧ а҆вгꙋста,.

6

Повелѣхъ блюстѝ е҆го дондеже послю̀ е҆го къ кесарю̀·

7

А҆гри́ппа же къ фи́стꙋ рече, хотѣх꙽ а҆зъ и҆ са́мъ чл҃ка сего слы́шати. ѻ҆́нже рече, ѹ҆трѣ ѹ҆слы́шиши е҆го·

8

На ѹ́трѣи же пришед̑шꙋ а҆гри́ппѣ и҆ верникїю́ съ мно́гою го́рдостїю, и҆ вшедшим̑ в сꙋде́бнѣи полатѣ, съ ты́сѧщникы, и҆ с наро́читыми мꙋжи гра́да, и҆ повелѣ́вшꙋ фи́стꙋ, приведоша па́вла. и҆ рече фи́стъ, а҆гри́ппо царю, и҆ вс̂и пришед̑шеѝ с нами мꙋжїе, ви́дите сего̀, ѻ҆ немже вс̂е мно́жество і҆ѹ҆де́и сꙋжа́хꙋ м̂и, въ і҆ерс̑҇ли́мѣ же и҆ зд̂ѣ, въпїю́ще, ꙗ҆ко не подоба́етъ жи́ти е҆мꙋ ктомꙋ. а҆з же разꙋмѣвъ ничтоже досто́ино е҆мꙋ сме́рти сътво́рша, и҆ самомꙋ же семꙋ нарица́ющꙋ сева́ста сꙋдих̑ посла́ти е҆го. ѻ҆ нем̑же и҆звѣстнѣе чт̂о писа́ти господи́нꙋ не и҆́мамъ, тѣмже и҆ приведохъ е҆го пред̑ вами, наипа́че пред̑ тѧ а҆гри́ппо царю, ꙗ҆́ко да разсꙋжд̑енїю бывшꙋ, и҆́мам꙽ чт̂о писа́ти. без꙽слове́сно б̂о мни́т ми сѧ посыла́ющꙋ ю́жника. а҆ ꙗ҆́же на́нь вины̀ не сказати·