Ostroh Bible❧Книга пророка Даниїла, розділ 7

1

Въ прьвое лѣто валтаса́ра цр҃ѧ халдѣ́иска, данїи́лъ сонъ ви́дѣ. и҆ видѣнїѧ главы е҆го на ло́жи е҆го. и҆ сон̑҇ в꙽писа̀. а҆зъ данїи́лъ видх̑ѣ въ видѣнїи мое҆мъ но́щїю, и҆ с̂е д҃ вѣтри нбс̑҇нїи налего́ша на́ море вели́кое. и҆ четыре звѣрїе вели́цїи и҆схожда́хꙋ и҆з мо́рѧ разли́чь себе·

2

Прьвыи а҆ки льви́ца и҆мꙋщи кры́лѣ, кры́лѣ же е҆ѧ а҆кѝ ѻ҆рлꙋ̀. и҆ зрѧ́хъ дон꙽деже прострѐ кры́лѣ своѝ, и҆ въз꙽дви́жесѧ ѿ землѧ̀, и҆ на ногꙋ чл҃чꙋ ста̀, и҆ срд̑це чл҃че дастьсѧ е́й·

3

И҆ с̂е звѣръ вторы́и подо́бен̑҇ медвѣ́дицы, и҆ в ча́сти е҆ді́нои ст̂а, и҆ трѝ ре́бра въ ѹ҆стѣхъ е́й средѣ зꙋбъ еѧ̀. и҆ си́це гл҃ахꙋ е́и, въста́ни, и҆ ꙗ҆́ждъ плоти мно́ги·

4

Въ слѣдъ сего ви́дѣхъ, и҆ с̂е звѣръ и́нъ а҆ки ры́сь, томꙋ же кры́ла четы́ре п꙽тича над̑ ним̑ четыре же главы звѣрїи. и҆ вла́сть да́стьсѧ е҆мꙋ·

5

Въ слѣдъ сего ви́дѣхъ, и҆ с̂е звѣръ четве́ртыи горд꙽ и҆ стра́шенъ, и҆ крѣпокъ и҆зли́ха. зꙋ́бы же е҆го желѣзни и҆ ве́лїи и҆ но́гти мѣдѧни, ꙗ҆ды́и и҆ ѻ҆тон꙽чеваѧ ѻ҆ста́нокъ же нога́ма попира́ше. то́и же разлꙋча́ѧсѧ и҆зли́ха па́че всѣхъ звѣрїи преж꙽нихъ, и҆ ро́гъ і҃ е҆мꙋ. и҆ смотрѣх же в розѣ́хъ е҆мꙋ, и҆ с̂е ро́гъ дрꙋгїи ма́лъ възы́иде пред̑ ни́ми, трїе же ро́зи пре́днїи стръгнꙋшасѧ е҆мꙋ ѿ лица̀ е҆го. и҆ с̂е ѻ҆́чи а҆ки ѻ́чи чл҃чи в ро́зѣ то́мъ, и҆ ѹ҆ста гл҃юща вели́ка. зрѧ́хъ, до́ндеже прс̑҇тли поста́вишасѧ, и҆ ве́тхїи дн҃ьми сѣдѧ́ше, и҆ ѻ҆де́жда е҆го бѣла а҆ки снѣ́гъ. и҆ вла́си главы е҆го а҆ки во́лна чи́ста. прс̑҇тлъ е҆го пла́мы ѻ́гненъ. колеса̀ е҆го ѻ́гнь палѧ̀. рѣка̀ ѻ́гнена теча́ше и҆сходѧ́щи пред нимъ. тысѧща тысѧщь слꙋжа́хꙋ е҆мꙋ, и҆ тмы̀ тем꙽ пред̑стоꙗ҆́хꙋ пред нимъ. сꙋ́дище сѣ́де, и҆ кни́ги ѿврьзо́шасѧ. ви́дѣхъ тогда̀ ѿ гла́са словесъ вели́кихъ ꙗ҆́же ро́гъ ѻ́нъ гл҃аше. до́ндеже ѹ҆би́сѧ звѣр꙽ и҆ поги́бе тѣло е҆го, и҆ да́стьсѧ въ ж꙽же́нїе ѻ́гнено. и҆ про́чихъ ѕвѣрїи преста́висѧ вла́сть, и҆ продлъженїе жи́тїѧ да́стьсѧ и҆мъ до лѣта и҆ времене·

6

Ви́дѣхъ въ снѣ̀ но́щїю, и҆ се на ѻ́блацехъ нбс̑҇ныхъ ꙗ҆́ко сн҃ъ чл҃чь иды́и бѧ́ше, и҆ до ве́тхаго дн҃ьми дои҆де, и҆ пред̑ нимъ приведе́сѧ е҆мꙋ. и҆ томꙋ сѧ да́сть вла́сть, и҆ чтс̑҇ь, и҆ црс̑҇тво. и҆ всѝ лю́дїе, пле́мена, ꙗ҆зы́цы томꙋ̀ порабо́таютъ. и҆ влас̑҇ е҆го, вла́сть вѣчнаѧ, ꙗ҆́же не ми́мои҆детъ, и҆ црс̑҇тво е҆го не расы́плет̑сѧ·

7

Възгорѣсѧ дх҃ъ мои. а҆зъ данїилъ въ ѹ́жасѣ мое҆мъ, и҆ видѣ́нїѧ главы мое́ѧ смѧтѧ́хꙋ м̂ѧ. и҆ прїидо́хъ къ е҆ді́номꙋ стоѧ́щихъ ѹ҆ него, наѹ҆чи́тисѧ всемꙋ семꙋ. и҆ повѣда м̂и и҆стовое, и҆ сказа́нїе слове́съ възвѣстѝ м̂и. сїи ѕвѣрїе ве́лїи четы́ре, четыре црс̑҇тва въста́нꙋтъ на зем̑ли ꙗ҆́же во́змꙋтсѧ, и҆ преимꙋтъ црс̑҇тво вы́шнѧго, и҆ во́змꙋтъ е҆̀ до вѣка, и҆ до́ вѣка вѣкъ. и҆ вопраша́хъ коне́чнѣ ѻ҆ ѕвѣри четве́ртѣмъ, ꙗ҆́ко бѣа́ше разли́чь ѿ всего ѕвѣри, и҆ гръдъ и҆зли́ха. зꙋ́бы е҆го желѣзни и҆ но́гти е҆го мѣдѧни, ꙗ҆ды́и и҆ ѻ҆тон꙽чева́ѧ, ѻ҆ста́нокъ же нога́ма попира́ше. и҆ ѻ҆ десѧти ро́зѣхъ е҆го и҆же на главѣ̀ е҆го. и҆ ѻ҆ дрꙋзм̑ѣ въше́дшим̑, и҆ стрѧ́сшемъ прьвыѧ трѝ. ро́гъ же то́и е҆мꙋже ѻ҆́чи, и҆ ѹ҆ста̀ гл҃юща вели́ко, и҆ видѣнїе е҆го бо́ле прочїих꙽. зрѣхъ, и҆ ро́гъ тои творѧ́ше рать съ ст҃ыми, и҆ ѹ҆крепѣ к нимъ. до́н꙽деже прїидетъ ве́тхїи дн҃ьми, и сд̑ꙋ дасть ст҃ымъ вы́шнѧго. и҆ вре́мѧ приспѣ̀, и҆ црс̑҇тво прїѧша ст҃їи. и҆ рече, ѕвѣръ четве́ртыи, црс̑҇тво четве́ртое е҆сть на землѝ, е҆же преспѣ́етъ вс̂ѧ црс̑҇тва, и҆ поꙗ҆́сть вс̂ю зе́млю, и҆ попере́тъ ю҆̀ и҆ посѣчет̑ ю҆̀.

8

И҆ десѧть же ро́гъ е҆мꙋ, десѧть цр҃ь въста́нетъ. и҆ по нихъ въста́нет꙽ дрꙋгїи, и҆же преспѣ́етъ ѕло́бами вс̂ѧ и҆же прежде е҆го, и҆ трѝ цр҃ѧ смири́тъ. и҆ словеса̀ къ вы́шнемꙋ съгл҃етъ, и҆ ст҃ыѧ вы́шнѧго смирит̑ и҆ помы́слитъ премѣнити времена̀ и҆ зако́нъ. и҆ дастьсѧ в рꙋкꙋ е҆го до вре́мене и҆ вре́менꙋ, и҆ полъ вре́мене. и҆ сꙋ́дище сѧ́детъ, и҆ вла́сть е҆го преставѧтъ, ꙗ҆́ко потреби́ти и҆ погꙋби́ти до конца̀. црс̑҇тво же и҆ влас̑҇ и҆ вели́чество црс̑҇тва и҆же под̑ всѣмъ нб҃семъ, дастьсѧ ст҃ымъ вы́шнѧг̑҇. црс̑҇тво же е҆го, црс̑҇тво вѣчное. и҆ вс̂ѧ вла́сти томꙋ рабо́тати начнꙋтъ и҆ послꙋшати·

9

до здѣ̀ сконча́нїе словеси·

10

А҆зъ данїилъ, на долзѣ ра́зꙋми моѝ смꙋща́хꙋ мѧ, и҆ ѻзречь моѧ̀ премѣни́сѧ на мн̂ѣ, и гл҃ъ въ срд̑цы мое҆мъ снабдх̑ѣ·