Ostroh BibleКнига Еклезіястова, розділ 1
Шрифт:
Запис:
1
Сꙋ́ета сꙋе́тъствїи, реч̑҇ соборник̑҇ сꙋ́ета сꙋе́т꙽ствїи, всѧческаѧ сꙋ́ета. чт̂о из̑ѻ҆билїе чл҃кꙋ въ всем̑ трꙋдѣ е҆го е҆же трꙋдит̑сѧ под̑ слн҃чною·
2
Род̑ минꙋет̑ и҆ ро́дъ прихо́дит̑, а҆ землѧ̀ въ вѣки стоит̑·
3
И въсходит̑ сл҃нце и҆ въ мѣсто свое влечетъсѧ, сїе въсїѧва́етъ і҆ и҆де́тъ къ ю́гꙋ, ѻ҆бъхо́дитъ къ сѣверꙋ, и҆ ѻ҆бхо́дитъ ѻ҆́крс̑҇тъ. и҆де́тъ дх҃ъ, и҆ ѻ́крс̑҇тъ е҆го ѻ҆браща́етсѧ дх҃ъ·
4
Вс̂и пото́цы и҆́дꙋтъ въ мо́ре, и҆ море нѣсть насыща́ѧсѧ·
5
Но въ мѣсто а́може пото́цы и҆́дꙋтъ, и҆ та́мо тїи сѧ въз꙽вра́ща́ютъ и҆тѝ·
6
Всѧ̀ словеса̀ трꙋдна, не възможет̑ мꙋжъ гл҃ати и҆ не насы́титсѧ ѻ҆́ко зрѣти, ни и҆спо́лнитсѧ ѹ҆́хо слыша́нїѧ·
7
Чт̂о бы́вшее то́е бꙋдꙋщемꙋ, и҆ чт̂о сътвореное тое твори́момꙋ·
8
И҆ нѣсть всѐ но́во под̑ слнч҃ною, и҆же възъгл҃етъ и҆ речетъ. сїе но́во е҆сть ѹ҆жѐ бы́сть въ вѣцехъ бы́вшихъ прежде на́съ. нѣсть па́мѧть прьвымъ, и҆ послѣднимъ бы́вшимъ. нѣсть и҆мъ па́мѧть съ бꙋдꙋщими на послѣде. а҆зъ собо́рникъ бы́хъ цр҃ь і҆и҆л҃евъ въ і҆ерс̑҇лі́мѣ, въда́хъ срд̑це мое възыска́ти, и҆ съсѣти́ти въ мꙋдрости, ѻ҆ всѣхъ быва́ющихъ под̑ нб҃семъ·
9
Ꙗ҆́ко попече́нїе лꙋкаво даде б҃ъ сн҃омъ члчс̑҇кимъ пещи́сѧ ѻ҆ немъ. ви́дѣхъ всѧческа́ѧ сътворе́нїѧ, сътворе́ннаѧ под̑ нб҃семъ. и҆ с̂е всѧ̀ сꙋть сꙋ́ет꙽ства, і҆ и҆зволе́нїе дх҃а·
10
Разъвраще́нно не можетъ ѹкраситисѧ, и҆ лише́нїе не мо́жет̑ сѧ съчестѝ. гл҃ахъ а҆зъ въ срд̑цы моем̑, е҆же гл҃ати сѐ азъ възвеличихсѧ. приложи́хсѧ мꙋдрости па́че всѣхъ, и҆же бы́ша преже мене въ і҆ерс̑҇ли́мѣ. и҆ срд̑це мое въдах̑ вѣ́дѣти премꙋдрос̑҇ и҆ разꙋмъ. и҆ срд̑це мое ви́дѣ много мꙋдрости и҆ ра́зꙋма. прит̑ча и҆ хи́трости разꙋмх̑ѣ а҆́зъ, ꙗ҆́ко и҆ сѐ е҆сть и҆зволе́нїе дх҃а. ꙗ҆́ко въ мно́жествѣ мꙋдрости мно́жество ра́зꙋма, и҆ приложи́выисѧ ра́зꙋмꙋ, приложит̑ бо́лѣзнь·
Джерела
