Ostroh BibleКнига Еклезіястова, розділ 10
Шрифт:
Запис:
1
Мꙋ́хи ѹ҆мръшїи съгноѧ́ют꙽ е҆ле́ѧ сладость. честнѣи ма́ло мꙋдрости, па́че сла́вы безꙋмїѧ вели́ка. срд̑це мꙋ́драго ѻ҆деснꙋ́ю е҆го, а҆ срд̑це безꙋмнаго ѻ҆шꙋ́юю е҆го·
2
И́ въ пꙋтьж̑ безꙋмныи ꙗ҆́ко и҆́детъ, срд̑це е҆го лиша́етсѧ и҆ ꙗ҆́же помышлѧ́етъ, вс̂ѧ безꙋмна сꙋть·
3
А҆ще дх҃ъ владѣю҆щаго възыидетъ на́ тѧ, мѣста свое҆го не ѻ҆ста́ви, ꙗ҆́ко и҆сцѣленїе ѹ҆ста́витъ грѣхи велики·
4
Є҆сть лꙋкав꙽ство е҆же ви́дѣхъ под̑ слн҃цемъ, е҆же невольно и҆зыиде ѿ лица владѣю҆щаго·
5
данъ безꙋмныи на высотах̑ великихъ, и҆ богатїи въ смиренных̑ сѧдꙋтъ·
6
Ви́дѣхъ рабы̀ на конех̑, и҆ кнѧѕи идꙋщи ꙗ҆́ко рабы на землѝ. копа́ѧ ꙗ҆́мꙋ впадетъ в ню̀, и҆ ѻ҆треблѧ́ющаго ѻ҆градꙋ ѹ҆грызнетъ и҆̀ змїѧ. і҆ и҆зима́ѧи камы поболи́тъ ѿ них̑, секїи дрова̀ бѣдꙋ прїемлет̑ в нихъ. а҆ще спадетъ сѣчи́во, и҆ сам̑ лицем꙽ смѧтесѧ, и҆ си́ла ѿнеможет̑, и҆зъѻ҆би́лїе же мꙋж́ꙋ мꙋ́дрость·
7
А҆́ще сѣкнетъ змїѧ не въ шептѣ, и нѣсть ѻ҆билїѧ ѻ҆бава́ющемꙋ. словеса ѹ҆стъ мꙋдрых̑ блгд̑ть, ѹ҆стныж̑ безꙋмнаго потоплѧют̑ е҆го·
8
Начало словесъ е҆го безꙋмїе, и҆ послд̑ѣнѧѧ ѹ҆стъ е҆го гордость лꙋка́ва. безꙋмныи ѹ҆мно́жит꙽ словеса̀·
9
Не разꙋмѣ чл҃къ чт̂о бывшее, и҆ что бꙋдꙋщее чт̂о зади е҆го и҆ кт̂о възвѣстит̑ е҆мꙋ. ѹ҆спѣхъ безꙋмных̑ ѹ҆трꙋдитъ их̑, и҆же не разꙋмѣ и҆ти въ́ град̑·
10
Го́ре тебѣ гра́де в нем̑же цр҃ь тво́и ю҆́нъ, и҆ кнѧ́ѕи твоѝ рано ꙗ҆дѧт̑. бл҃жена т̂ы зе́мле и҆же цр҃ь тво́и сн҃ъ свобод̑ныѧ, и҆ кнѧ́ѕи твоѝ въ времѧ ꙗ҆дѧтъ въ силе и҆ не постыдѧт̑сѧ·
11
Въ лѣности смирит̑сѧ стропъ, и҆ въ празнествѣ рꙋкꙋ прока́плетъ храмина. въ смх̑ѣ тво́рѧтъ хлѣбъ и҆ вино и҆ е҆ле́и, е҆́же веселити живыѧ. и҆ сребра̀ послꙋшают̑ всѧческаѧ. въ со́вѣсти ѹ҆бо свое́и не клѣни цр҃ѧ, и҆ въ клѣти ложницы свое́и не клѣни бога́таго, ꙗ҆́ко птица нбс̑҇наа донесет̑ глас̑҇ тво́и, і҆ и҆мѣ́ѧи кры́лѣ возвѣстит̑ слово твое·
Джерела
