Ostroh BibleКнига Еклезіястова, розділ 12
Шрифт:
Запис:
1
И ѻ҆ста́ви ꙗ҆́рость ѿ срд̑ца твоег̑҇ и҆ преведѝ лꙋкавство ѿ плоти твоеѧ·
2
Ꙗ҆́ко ю́ность и҆ безꙋмїе сꙋета. и҆ помѧнѝ сътворшаго т̂ѧ въ дн҃ь ю́ности твоеѧ, дондеже не прїидꙋтъ днїе ѕлобы твоеѧ. и҆ приспѣ́ютъ лѣта в нихже речеши нѣсть м̂и в нихъ хотѣнїѧ, до́ндеже не померъкнетъ слн҃це и҆ свт̑ѣ и҆ лꙋна̀ и҆ звѣзды, и҆ ѻ҆братѧт̑сѧ ѻ҆блаци поза́ди дожда. въ дн҃ь вънь же подви́жꙋтсѧ стра́жїе до́мꙋ, и҆ развратѧт̑сѧ мꙋжїе си́лы. и҆ ѹ҆празнѧтсѧ ме́лющїи ꙗ҆́ко и҆знемогоша, и҆ помрачат̑сѧ глѧда́ющаѧ въ сква́жнѧхъ, и҆ зарворѧт̑ две́ри на тръжищи, в немощи гласа ме́лющїѧ·
3
И҆ въста́нет̑ на глас̑҇ пти́ца, и смирѧ́тсѧ всѧ дщерѧ пѣсныѧ. и҆б̂о на высотꙋ̀ ѹ́зрѧтъ, и҆ ѹ́жасъ на пꙋтѝ. и҆ процвѣтетъ клѧпышъ и҆ ѻ҆тол꙽стѣ́етъ ѻ҆кри́да, и҆ раз꙽дрꙋшитсѧ всѧкъ кипари́съ. ꙗ҆ко и҆дет̑ чл҃къ в домъ вѣка е҆го, и҆ ѻ҆быидо́ша на тръжищи пла́чющїи. дондеже не преврати́тсѧ ю҆же сребра̀ и҆ не сокрꙋшит̑сѧ и҆скꙋса злат̑наѧ. и҆ сокрꙋшат̑сѧ водоно́сы ѹ҆ и҆сто́чника е҆го, и҆ сло́мит̑сѧ ко́ло въ колїѝ. и҆ въз꙽вратитсѧ прь́сть на́ землю ꙗ҆́коже б̂ѣ, и҆ дх҃ъ въз꙽вратитсѧ къ б҃ꙋ и҆же е҆сть далъ е҆мꙋ·
4
Сꙋ́ета сꙋ́етъствїи рече собо́рникъ, всѧческа́ѧ сꙋ́ета, и҆ ли́ш꙽шее. ꙗ҆́ко бы́сть собо́рникъ мд̑ꙋръ, и҆ ꙗ҆́ко сказа̀ съ чл҃комъ ра́зм̑ꙋ. и҆ ѹ́хо и҆слѣдит̑ красоты̀ при́точныѧ, многа възыска̀ собо́рникъ е҆же ѻ҆брѣсти словеса̀ хотѣнїѧ, и҆ напи́сана пра́востїю словеса̀ и҆́стинны·
5
Словеса̀ мꙋдрыхъ ꙗ҆́ко ѻ҆стны воло́выѧ, и҆ ꙗ҆́ко гвоздїе раждеже́ни, и҆же ѿ сложе́нїѧ да́ни бы́ша ѿ па́стырѧ е҆ди́наго и҆зъѻ҆би́лїе вели́ко ѿ нихъ·
6
Сн҃е мои храни кни́ги мно́ги сътворити нѣсть б̂о конца̀, и҆ ѹ҆ченїи мно́го трꙋда плоти·
7
конецъ же словꙋ все послꙋшаи. б҃а боисѧ и҆ за́повѣди е҆го хранѝ, ꙗ҆́ко того всѧкъ чл҃къ·
8
Ꙗ҆́ко все сътворе́нїе приведетъ б҃ъ на сꙋдъ, въ всѧкомъ презренїю а҆ще л̂и бл҃го а҆ще л̂и лꙋка́во·
9
Коне́цъ кни́зе е҆клесїастове. и҆́мать в себѣ, глв̑҇а, в҃і·
Джерела
