Ostroh Bible❧Книга Естер, розділ 1

1

В лѣто второ́е црс̑҇тва а҆ртаѯе́рѯа вели́кого. въ прьвыи дн҃ь мс̑҇ца ниса́на, со́нъ ви́дѣ мардохе́и сн҃ъ и҆а҆ровъ семе́ие҆въ, ѿ племени венїами́нѧ. чл҃къ і҆ѹ҆деѧни́нъ ѻ҆бита́ѧи въ сꙋсѣ гра́дѣ. чл҃къ вели́къ слꙋжа въ дворѣ цр҃евѣ. бѣ же ѿ плѣне́нїѧ е҆гоже плѣни навходоносо́ръ цр҃ь вавѷло́ньскїи ѿ і҆ерс̑҇лима, съ е҆хонїемъ цр҃ем̑ и҆ѹ҆де́искимъ·

2

И҆ си́цево б̂ѣ видѣнїе сна̀ е҆го и҆же видѣ, и҆ се гла́съ ѹ҆жасныи, и҆ гро́мныи трꙋсъ, и҆ смѧте́нїе на землѝ·

3

И҆ се дв̂а ѕмїа вели́ки гото́ви прїидо́ша межд̑ꙋ собо́ю борю́щесѧ·

4

И҆ бы́сть гла́съ и҆хъ вели́къ, и҆ гла́сомъ и҆хъ ѹ҆готовисѧ всѧ́къ ꙗ҆зы́къ на́ брань, да и҆стребѧ́тъ род̑ пра́вед̑ныхъ·

5

И҆ се дн҃ь тмы̀ и҆ мра́ка, ско́рбь и҆ тѣснота и҆ ѻ҆злобле́нїе и҆ смѧте́нїе велїе на землѝ, и҆ възмꙋти́сѧ всѧ́къ ꙗ҆зы́къ пра́веденъ боѧ́щесѧ зло́бы е҆го, и҆ ѹ҆готови́шасѧ на поги́бель и҆ возопи́ша къ г҃ꙋ. ѿ во́плѧ же их̑ быс̑҇ зна́менїе, а҆кѝ ѿ ма́лаг̑҇ и҆сточ̑҇ника рѣка велїѧ вода мно́га, и҆ свѣтъ и҆ сл҃нце воз̑сїѧ, и҆ смире́ннїи възнесо́шасѧ, и҆ поꙗдо́ша сла́вныхъ·

6

И҆ възбнꙋвъ мардохе́и видѣвыи со́нїе сїе е҆же б҃ъ въсхотѣ̀ сотвори́ти. и҆ дръжа́ше со́нїе сїе въ срд̑цы си, и҆ въ всѧ́комъ словесѝ хотѧше разꙋмѣти е҆̀ даже до нощи, и҆ ѹ҆мол̑҇ча̀ мардохе́и въ дворѣ со гава́ѳомъ и҆ ѳа́рром꙽ двѣма е҆внꙋхома цр҃евома, и҆же стрежа́хꙋ дво́рь. и҆ слы́ша помышле́нїѧ и҆ совѣты и҆хъ и҆спыта̀, и҆ разꙋмѣ̀ ꙗ҆́ко гото́вѧтъ рꙋцѣ свои ѹ҆би́ти цр҃ѧ а҆ртаѯе́рѯа. и҆ сказа̀ цр҃ю ꙗ҆́же ѻ҆на̀ помышлѧ́ютъ, і҆ и҆спыта̀ ѧ҆̀ цр҃ь, і҆ и҆сповѣда́шасѧ, и҆ повѣшени бы́ша. и҆ написа̀ цр҃ь словеса̀ сїѧ на па́мѧть, и҆ мардохе́ѧ написа̀ ѻ҆ словесе́хъ си́хъ. и҆ повелѣ̀ цр҃ь мардохе́ю слꙋжити въ дворѣ̀, и҆ да́сть е҆мꙋ да́ры сего ради. и҆ бѣ̀ а҆ма́нъ, а҆мада́ѳовъ, вꙋге́ѻвъ сла́венъ пред̑ цр҃емъ, и҆ въсхотѣ̀ ѻ҆злоби́ти мардохе́ѧ и҆ людїи е҆го, двꙋхъ ради е҆внꙋховъ цр҃евыхъ·

7

И҆ бы́сть по словесе́хъ сихъ въ днех̑ а҆ртаѯе́рѯа. сїи а҆ртаѯе́рѯъ ѿ синдикїѧ, и҆же ѻ҆блада̀ рк҃з, страна́ми и҆ндѣ́искими·

8

Въ дни же ты́ѧ е҆гда сѣде на столѣ црс̑҇тва свое҆го а҆ртаѯе́рѯъ, в сꙋса́нѣ гра́дѣ. въ тре́тїе же лѣто црс̑҇тва свое҆го, сътворѝ пи́ръ вельмо́жамъ свои҆мъ, и҆ прочимъ ꙗ҆зы́ком̑, прьскимъ и҆ ме́дъскимъ сла́внымъ и҆ нача́лнымъ. и посемъ е҆гда̀ показа̑ бога́т꙽ства и҆ честь црс̑҇тва свое҆го·

9

По показа́нїи же бога́тества црс̑҇тва свое҆го, и҆ красоты̀ весе́лїѧ свое҆го въ р҃п днїи. е҆гда́ же и҆спол꙽нѧ́ше дни пи́рꙋ, сътворѝ цр҃ь всѣмъ лю́демъ е҆ли́коже и҆хъ ѻ҆брѣтѐ в сꙋса́нѣ, ѿ вели́ка даже и҆ до ма́ла. бы́сть же пи́р꙽ по седмь днїи въ дворѣ̀ цр҃евѣ ѹ҆краше́немъ вис꙽со́н꙽ными зеле́ными завѣсами ѹ҆чине́ными на ѹ́жахъ си́нѧтныхъ и҆ чрьвлени́чныхъ, въ крꙋзехъ зла́тыхъ и҆ сре́брѧныхъ. на столпѣхъ ло́жа зла́та и҆ сребрѧна, и҆ намо́щена ка́менїемъ змарагдовым̑ и҆ пини́нъским꙽ и҆ мраморомъ бѣлым̑, и҆ плащени́цы съ пестрота́ми различ̑҇ными, и҆ ꙗ҆́ко и҆зрастающаѧ на них̑ вѣтвїа ши́пковъ·

10

И҆ сосꙋды зла́ты и҆ сре́брѧны и҆ ка́менїи а҆н꙽ѳракїискими и҆ киликїискими предълежа́ща цѣно́ю злата тала́нт꙽, ҂л҃. и҆ вина̀ мно́го е҆гож̑ са́мъ цр҃ь пїѧ́ше. и҆ пи́тїе с̂е не по ѹ҆ставле́нномꙋ зако́нꙋ бы́сть·

11

Та́ко б̂о ѹ҆ста́въ б̂ѣ цр҃евъ на всѣх꙽ старѣ́ишинахъ до́мꙋ свое҆го. и҆ заповѣда̀ и҆кономомъ сотвори́ти во́лю мꙋжем꙽. та́кожде и҆ а҆сти́нь цр҃ца сътворѝ пи́ръ жена́мъ в домꙋ̀ цр҃вѣ е҆гда̀ цр҃ь а҆ртаѯе́ѯъ въ дн҃ь седмыи ѹ҆добрѧ́ше мысль свою во винѣ̀, и҆ реч̑҇ а҆манꙋ, и҆ ваза́нꙋ, и҆ ѳа́рꙋ и҆ вара́зꙋ и҆ заѳал꙽ѳа́вꙋ, и҆ а҆вата́зꙋ, и҆ ѳара́вꙋ, седьми́мъ е҆внꙋхомъ, и҆же слꙋжа́хꙋ пред̑ цр҃емъ. привестѝ а҆сти́нь цр҃цꙋ предъ него, е҆же въцрс̑҇тви́ти е҆ѧ̀, и҆ възложи́ти на ню̀ вѣне́ць цр҃ьскїи, и҆ пока́зати еѧ̀ всѣмъ началъствꙋю҆щимъ ꙗ҆зы́комъ, занѐ прекра́сна бысть, и҆ не послꙋша е҆го а҆сти́нь цр҃ца пои҆тѝ со е҆внꙋхи. и҆ ѻ҆печали́сѧ цр҃ь и҆ прогнѣвасѧ, и҆ гнѣвъ е҆го раждеже́сѧ в немъ. и҆ рече бли́жнимъ свои҆мъ, си́це рече а҆сти́нь, сего рад̑и̑ ѹ҆бо сътвори́те зако́нъ и҆ сꙋдъ ѻ҆ сем̑ и҆ пристꙋпи́ша к немꙋ а҆ркесе́и и҆ сарсоѳе́и и҆ малисе́ар꙽, нача́лницы прь́скїи и҆ ме́д꙽скїи, и҆же видѧхꙋ лицѐ цр҃ево і҆ и҆же сѣдѧ́хꙋ прьвѣе близъ цр҃ѧ. и҆ възвѣстиша е҆мꙋ по зако́нꙋ чт̂о подоба́етъ сътвори́ти цр҃ци а҆сти́ни и҆же не сътворѝ повеле́нїѧ цр҃ѧ а҆ртаѯе́рѯа, не прїиде б̂о со е҆внꙋхи. и҆ рече мꙋхеи пред̑ цр҃емъ и҆ болѧры, не цр҃ѧ е҆ді́наго посрамѝ а҆сти́нь цр҃ца, н̂о и҆ всѧ̀ кнѧ́зѧ и҆ нача́лники и҆же предъ цр҃емъ·

12

І҆ и҆сповѣстьсѧ гл҃ъ цр҃цы ꙗ҆́ко съпроти́висѧ цр҃ю. си́це и҆ днесь мꙋчи́телницы же́ны про́чихъ кн҃ѕеи прьскихъ и҆ ме́д꙽скихъ, ѹ҆слы́шатъ цр҃ю реченнаѧ ѿ неѧ, дръзнꙋтъ та́коже бесчествовати мꙋжїи своих̑ а҆ще лю́бо е҆сть цр҃ю повелѝ црс̑҇кимъ повеле́нїемъ, и҆ да напи́шетъ по ѹ҆ста́вꙋ ме́дъскомꙋ и҆ прьскомꙋ да не бꙋдетъ и҆́нако, ниже да внидетъ ктомꙋ цр҃ца къ немꙋ. и҆ црс̑҇тво еѧ̀ да предасть цр҃ь лꙋ́чшеи еѧ̀. и҆ да бꙋдетъ послꙋшанъ ѹ҆ста́въ ѿ цр҃ѧ, и҆же сътвори́тъ въ всемъ црс̑҇твїи е҆го. и҆ си́це всѧ̀ же́ны възложатъ честь на мꙋжи своѧ̀, ѿ вели́ка да́же и҆ од ма́ла. и҆ годѣ бысть сло́во предъ цр҃емъ, и҆ вла́стьми. и҆ сътворѝ цр҃ь ꙗ҆́коже рече е҆мꙋ мꙋхе́и, и҆ посла̀ кни́ги къ всѣмъ вла́стелемъ своим̑, къ вла́сти и҆ власти по гл҃ꙋ и҆хъ. ꙗ҆́ко да боѧ́тсѧ их̑ же́ны, ѹ҆твердит̑сѧ всѧ́комꙋ мꙋжꙋ вла́сть в домꙋ̀ е҆го, ꙗ҆́коже и҆ ꙗ҆зык̑҇ людїи ко́ждо их̑·