Ostroh Bible❧Книга пророка Єзекіїля, розділ 13

1

И бы́сть слово гн҃е къ мн̂ѣ гл҃ѧ, сн҃е чл҃чь, прорцы̀ на прро̑҇ки прорица́ющаѧсѧ, и речеши прро̑҇комъ прорица́ю҆щимсѧ ѿ срд̑ца и҆хъ, прор꙽цы. и҆ речеши к нимъ·

2

Слы́шите сло́во гн҃е, с̂е гл҃етъ а҆дона́и г҃ь. лю́тѣ прорица́ющимъ ѿ срд̑ца свое҆го, прорица́ющимъ въ слд̑ѣ дꙋха свое҆го, а҆ ѿню́дъ не вѣдѧщемъ. ꙗ҆́ко лиси́ца в пꙋсты́ни, та́ко прро̑҇цы твоѝ бы́ша і҆и҆л҃ю. не ста́ша на твердѣли, ни поста́вишас̑҇ стѣно́ю за домъ і҆и҃лвъ, ни съпроти́вишас̑҇ въ бою въ дн҃ь гн҃ь. ви́дѧще ло́жнаѧ, и҆ въл꙽хвꙋ́ющеи сꙋѧ́ѧ гл҃ющеи, гл҃етъ г҃ь. а҆з же г҃ь нѣсмь ихъ посла́лъ, и҆ начаша въставлѧ́ти сло́во·

3

не ло́жное л̂и ѹ҆бо видѣнїе ви́дѣсте, и҆ въл꙽хвова́нїѧ сꙋ́ѧѧ рекосте, и҆ гл҃ете рекꙋще, г҃ь, г҃ь. а҆з же нѣсмь гл҃алъ·

4

Сего ради рцы̀, с̂е гл҃етъ а҆дона́и г҃ь·

5

понеже словеса̀ лжа сꙋть, и҆ бъл꙽хвова́нїѧ ваша сꙋ́ѧ. того ра́ди с̂е азъ на вы гл҃етъ а҆дона́и г҃ь. и҆ прострꙋ рꙋкꙋ свою на прро̑҇ки ви́дѧщаѧ лжꙋ̀, и҆ ѿвѣщава́ющаѧ сꙋѧѧ. въ наказа́нїе людїи мои҆хъ не бꙋдꙋтъ, и въ писа́нїи домꙋ і҆и҆лева не в꙽пи́шꙋтсѧ, и҆ въ зе́млю і҆и҆л҃евꙋ не внидꙋтъ. и҆ ѹ҆вѣдѧтъ ꙗ҆́ко а҆зъ а҆дона́и г҃ь. имже прельсти́ша лю́ди моѧ, гл҃ще ми́ръ ми́ръ, и҆ не бѧ́ше ми́ра. сїи же съгражд̑а́ютъ стѣнꙋ̀, а҆ ѻ҆ни пома́заютъ ю҆̀, а҆ще сѧ паде́тъ. гл҃и къ помаза́ющимъ, паде́тсѧ. и҆ бꙋдꙋтъ тꙋча потоплѧ́ющи, и҆ дамъ ка́менїе стрѣльное въ свꙋзы и҆хъ и҆ падꙋтсѧ, и҆ вѣтръ възъдви́жꙋщь разме́щет̑, и҆ рас꙽сѧдет̑сѧ и҆ падетсѧ стѣна. и҆ не рекꙋтъ л̂и к ва́мъ, где е҆сть помазанїе ва́ше е҆же пома́засте·

6

Того ради с̂е гл҃ет̑ а҆дона́и г҃ь. и҆ навергꙋ бꙋрю разорѧ́ю҆щꙋ съ ꙗ҆́ростїю, и҆ тꙋча потоплѧ́ю҆щи гнѣвомъ мои҆мъ бꙋдетъ, и҆ каменїе стрѣльное навергꙋ ꙗ҆́ростїю въ сконча́нїе. и҆ ра́скопа́ю стѣнꙋ ю́же пома́засте, и҆ паде́тсѧ. и҆ положꙋ ю҆̀ на землѝ, и҆ ѿкры́етсѧ ѻ҆снова́нїе еѧ и҆ падетсѧ, и҆ сконча́етсѧ съ ѻ҆бличе́нїемъ. и҆ позна́ете ꙗ҆́ко аз̑ г҃ь. и҆ скон꙽ча́ю ꙗ҆́рость свою до стѣны̀ и҆ до помазающихъ ю҆̀. и҆ реко́хъ к вам̑ нѣсть стѣны, ни помазаю҆щих̑ еѧ̀. прро̑҇цы і҆и҆л҃евы прорица́ющеисѧ къ і҆ерс̑҇лимꙋ, и҆ ви́дѧщеи миръ е҆го·

7

и҆ ми́ра не бꙋдет̑, гл҃етъ а҆дона́и г҃ь·

8

И҆ ты сн҃е чл҃чь, ѹ҆твердѝ лицѐ свое на дщери людїи свои҆хъ, на прорица́ющаѧсѧ ѿ срд̑ца свое҆го. и҆ прорцы̀ до нихъ, и҆ речеши. с̂е гл҃етъ а҆дона́и г҃ь. го́ре с꙽шева́ющимъ въз꙽гла́вїица̑ под̑ всѧкїи ло́коть рꙋкѝ, сътворѧю҆щимъ покри́вала на всѧ главы̀ всего телесѝ, ꙗ҆́коже разврати́ти дш҃а. дш҃а разврати́ша людїи моих̑, и҆ дш҃а потварѧ́хꙋ. и҆ ѻ҆сквернавлѧ́хꙋ мѧ к лю́демъ мои҆мъ, горьсти ради ꙗ҆ч꙽ме́нны и҆ ѹ҆крꙋха ради хлѣба, ꙗ҆ко и҆зби́ти дш҃а и́мже не бѣ̀ лѣпо ѹ҆мрѣти. и҆ ѻ҆живи́ти дш҃а, и҆мже не бѣ лѣпо жи́ти. л꙽жꙋще лю́демъ мои҆мъ, послꙋшающимъ л꙽жѝ·

9

Сего рад̑и̑ се гл҃етъ г҃ь, с̂е а҆зъ на воз꙽гла́вїѧ ва́ша, и҆миже в̂ы раз꙽враща́ете дш҃а тамо. и҆ ѿвръгꙋ ѧ҆̀ ѿ мы́шць ва́шихъ, і҆ и҆спꙋщꙋ дш҃а ꙗ҆́же вы развраща́стѐ на расыпанїе. и҆ растерза́ю въз꙽гла́вїѧ ва́ша, и ѿи҆мꙋ лю́ди моѧ ѿ рꙋки вашеѧ, и҆ ксемꙋ не бꙋдꙋтъ в рꙋкꙋ вашею на раз̑враще́нїе. и҆ позна́ете ꙗ҆́ко а҆зъ г҃ь. понеже развраща́сте срд̑ца пра́ведных̑ в непра́вдꙋ, а҆ а́зъ не развраща́хъ их̑. и҆ ѹ҆крѣплѧ́сте рꙋци безако́нникꙋ, ѿнюдъ не ѿврати́тисѧ ѿ пꙋтѝ е҆го зла́го, и҆ живꙋ бы́ти е҆мꙋ. сего ради не ѹ́зрите лжа̀, и҆ вол꙽хвова́нїа ксемꙋ не имате вол꙽хвова́ти. и҆зба́влю лю́ди моѧ ѿ рꙋкъ вашихъ, и҆ ѹ҆вѣсте ꙗко а҆зъ г҃ь·