Ostroh Bible❧Книга пророка Єзекіїля, розділ 21

1

И бы́сть слово гн҃е къ мнѣ гл҃ѧ. сего ради прорцы̀ сн҃е чл҃чь, и҆ ѹ҆твердѝ лицѐ свое къ і҆ерс̑҇лимꙋ. и҆ призри къ ст҃ынѧмъ и҆хъ, и҆ прорцы̀ ѻ҆ земли і҆и҆л҃евѣ·

2

И҆ речеши к зем̑ли і҆и҆л҃евѣ, с̂е гл҃етъ а҆дона́и г҃ь. с̂е аз̑ на тѧ и҆зм꙽кнꙋ̀ мечь свой и҆з но́жницъ е҆го, и҆ потреблю и҆с те́бе неправди́ва и҆ безако́нника·

3

І҆ и҆зы́идетъ мечь мои и҆з но́жницъ свои҆хъ, на всѧ́кꙋ пло́ть ѿ восто́ка до сѣвера. и҆ ѹ҆вѣсть всѧка пло́ть ꙗ҆ко а҆зъ г҃ь. и҆зм꙽ко́хъ мечь свои и҆з ножницъ е҆го, и҆ ктомꙋ не възвратит̑сѧ. и҆ т̂ы сн҃е чл҃чь, въздохнѝ съкрꙋше́нїем̑ чреслъ твоих̑, и҆ съ бо́лѣзнїю въздо́хнеши пред̑ ѻ҆чи́ма их̑·

4

И҆ бꙋдетъ а҆ще рект̑ꙋ к тебѣ, чесо рад̑и̑ т̂ы в꙽здышеши. и҆ рече́ши, ѻ҆ проповѣда́нїи ꙗ҆́ко грѧдет̑. и҆ съкрꙋши́тсѧ всѧ́ко срд̑це, и҆ ѻ҆слабѣ́ютъ всѧ̀ рꙋки, і҆ и҆з꙽дшет̑ всѧка пло́ть и҆ всѧкъ дх҃ъ, и҆ всѧ стегна ѻ҆сквернавѧ́тсѧ мо́кростїю. с̂е грѧдетъ и҆ бꙋдет̑тъ, гл҃етъ а҆дона́и г҃ь·

5

И҆ бы́сть сло́во гн҃е къ мн̂ѣ гл҃ѧ, сн҃е чл҃чь, прорцы̀ и҆ рече́ши. с̂е гл҃етъ а҆дона́и г҃ь, рцы̀ мече́ви, ме́чю ѻ҆стри́сѧ и҆ разгнѣваисѧ ꙗ҆́коже да и҆с꙽сѣче́ши сѣче́нїе. ѻ҆стри́сѧ ꙗ҆́ко да бꙋдеши въ блища́нїе, и҆ гото́въ на расы́панїе. сѣци похꙋлѝ ѿринѝ вс̂е древо·

6

И҆ дасть и҆̀ ѹ҆гото́ванъ ꙗ҆́ко дръжа́ти за чрены е҆го, наѻ҆стри́сѧ мечь, гото́въ е҆сть, ꙗ҆́коже дати и҆̀ в рꙋцѣ сѣкꙋщихъ·

7

Възопїи и҆ въспла́чисѧ сн҃е чл҃чь, ꙗ҆́ко бысть в лю́дех̑ с̂е, и҆ въ всѣхъ старѣ́ишинахъ і҆и҆л҃евахъ ѹ҆бѣгшихъ меча̀. под̑ мечь быша с людми мои҆ми·

8

Сего ради въсплещꙋ рꙋкама свои҆ма ꙗ҆́ко ѻ҆пра́висѧ. т̂о чт̂о ꙗ҆́ко и҆ ѿринет̑сѧ племѧ̀ и҆ не бꙋдетъ, гл҃етъ а҆дона́и г҃ь·

9

И҆ ты̀ сн҃е чл҃чь прорцы, и҆ въсплещѝ рꙋка́ма, и҆ ѹ҆сꙋгꙋби меч̑҇, тре́тїи мечь ꙗ҆звенымъ е҆сть. ме́чь ꙗ҆зве́нымъ вели́къ·

10

И҆ ѹ҆жасиши ѧ҆̀ ꙗ҆́ко да сѧ съкрꙋши́тъ срд̑це и҆хъ, и҆ ѹ҆мно́жатсѧ не́мощнїи. въ всѣхъ вра́тѣхъ и҆хъ предадѧ́тсѧ на ѹсѣче́нїе ме́чное·

11

Блаѕе ѻ́стръ бы́сть на сѣче́нїе, бла́ѕе на блиска́нїе, проходѝ ꙗ҆́ко молнїи, ѻ҆стри́сѧ ѻ҆десно и ѻ҆ лѣво. а҆може а҆ще лицѐ твое въста́витсѧ. и҆ а́зъ въсплещꙋ рꙋко́ю мое́ю к рꙋцѣ мое́и, и҆ ѻ҆ставлю ꙗ҆́рос̑҇ свою, а҆зъ г҃ь гл҃ахъ·

12

И҆ бы́сть слово гн҃е къ мн̂ѣ гл҃ѧ, сн҃е чл҃чь, ѹ҆чини себѣ пꙋтѝ дв̂а, ꙗ҆́коже внити мечю̀ цр҃ѧ вавило́нъска. ѿ страны̀ е҆ді́ноѧ и҆зы́иде на вла́сти дв̂ѣ, и҆ рꙋкꙋ ѹ҆гото́ваютъ в нача́ле пꙋтием̑. да ѹ҆чиниши ꙗ҆́ко внити мечю на рав꙽ва́ѳъ сн҃ы а҆м꙽мо́нѧ, и҆ на жидов꙽꙽скꙋ и҆ на і҆ерс̑҇лима·

13

Понеже ста́нет̑ средѣ е҆го цр҃ь вавило́ньскъ на прьвм̑ѣ пꙋтѝ, на нача́ле ѻ҆бо́ю пꙋтїю. ꙗ҆́коже влъхвова́ти вол꙽хвова́нїе, ꙗ҆́коже въскипѣти жезло́мъ. и҆ въпраша́ти ваꙗ҆́ныхъ, и҆ вражи́ти въ ꙗ҆́трехъ·

14

И҆ бысть ѻ҆деснꙋю е҆го враже́нїе на і҆ерс̑҇ли́ма. ꙗ҆́ко ѻ҆бъста́вити ѻ҆строг̑҇ и҆ ꙗ҆́ко ѿврьз꙽тѝ ѹ҆ста̀ съ во́племъ, и҆ възвы́шити гласъ съ глаше́нїемъ трꙋбнымъ. и҆ ꙗ҆́ко поста́вити ѻ҆стро́гъ пред̑ вра́ты е҆го, и҆ насы́пати прьсти, и҆ поста́вити стрѣ́лы.

15

И҆ ты же вол꙽хвꙋѧ и҆мъ вол꙽хвова́нїе пред̑ ними, седморѧщи седмори́цам꙽. и҆ то́и въспомина́ѧ непра́вдꙋ е҆го помѧнꙋти·

16

Того ра́ди с̂е гл҃етъ а҆дона́и г҃ь, понеже въспомѧнꙋсте неправды ва́ша, внегда ѿкры́шасѧ нече́стїѧ ва́ша. ꙗ҆́ко ꙗ҆ви́тисѧ грѣхомъ ва́шимъ, въ всѣхъ безако́нїихъ ва́шихъ, и҆ въ всѣхъ хꙋдожествѣхъ вашихъ. понеже въспомѧнꙋсте, в тѣхъ и҆ поги́бнете·

17

И҆ ты̀ сквернавыи старѣ́ишино і҆и҆л҃ев꙽, е҆гож̑ пришел̑҇ дн҃ь въ времѧ неправ̑҇ды. с̂е гл҃ет̑ г҃ь, со́ими клобꙋк꙽, и҆ положѝ вѣнець т̂а не такова̀ бꙋдетъ·

18

Смирѝ высо́кое, и҆ възнесѐ смире́нное. неправдою непра́вдꙋ положꙋ̀ ѧ҆̀, и҆ т̂а не такова̀ бꙋдетъ. до́ндеже прїидет̑ е҆мꙋже досто́итъ, и҆ предам̑ е҆мꙋ·

19

И҆ ты́ сн҃е чл҃чь прорцы̀, и҆ рече́ши. се гл҃етъ а҆дона́и г҃ь къ сн҃омъ а҆м꙽мо́немъ, и҆ къ ѹ҆кори́знѣ и҆хъ. и҆ рече́ши, ме́чь ме́чь и҆зм꙽че́нъ на сѣче́нїе, и҆зм꙽ченъ на сконча́нїе, въста́ни ꙗ҆́коже да блиска́еши въ видѣнїи своем̑ сꙋ́ии҆мъ, и҆ внегда вражи́ши л꙽жа̀·

20

Ꙗ҆́коже преда́ти вы́ѧ ꙗ҆звеных̑ безако́нникъ, и҆хже приспѣ дн҃ь въ вре́мѧ непра́вды. възврати́сѧ в но́жницꙋ свою, не ста́ни в мѣсте семъ е҆мꙋже бысть, на землѝ твое́и ѿсꙋждꙋ т̂и·

21

И҆ възлїю на́ тѧ гнѣвъ свои. въ ѻ҆гнѝ гнѣва моего въз꙽дхнꙋ на́ тѧ·

22

И҆ предам̑ т̂ѧ в рꙋцѣ мж̑ꙋ иноꙗ҆зычен̑҇, творѧ́щимъ расы́панїе. ѻ҆гню бꙋдеши ꙗ҆́дь. и҆ кро́вь твоѧ бꙋдет̑ средѣ землѧ̀ твоеѧ. не бꙋдетъ твоеа па́мѧти занѐ а҆зъ г҃ь гл҃ахъ·