Ostroh Bible❧Книга пророка Єзекіїля, розділ 47

1

И въведе м̂ѧ къ пред̑две́рїю хра́ма. и҆ се вода̀ и҆схожд̑аше ниже непокрове́н꙽наго хра́ма на въсто́къ. ꙗ҆́ко лице хра́мꙋ зрѧ́ше на въсто́къ. і҆ и҆схожда́ше вода̀ ѿ ѹ҆́гла деснаго ѿ ю҆́га къ тре́бникꙋ·

2

І҆ и҆зведе м̂ѧ по пꙋти вра́тномꙋ ꙗ҆́же на сѣ́веръ. и҆ ѻ҆бведе м̂ѧ пꙋтемъ вра́тнымъ внѣѹ҆́дѣ къ вра́томъ дво́рнымъ, ꙗ҆́же зрѧ́тъ на въсто́къ. и҆ се вода̀ и҆схожда́ше ѿ ѹ҆́гла десна́го. ꙗ҆коже и҆схо́дъ мꙋ́жескъ проти́вꙋ, и҆ мѣ́ра в рꙋцѣ е҆го. и҆ размѣри ты́сѧщꙋ мѣрою, и҆ приведе м̂ѧ чресъ во́дꙋ да́же до гле́знъ. и҆ па́ки и҆змѣри ты́сѧщꙋ, и҆ преведе м̂ѧ чресъ во́дꙋ и҆ възы́иде вода̀ по поѧса. и҆ размѣри тысѧщꙋ пото́къ, и҆ не могох̑ преи҆ти. ꙗ҆́ко кипѧ́ше вода̀ а҆ки шꙋмъ пото́чныи е҆гоже не пре́идꙋтъ·

3

И҆ рече къ мнѣ, а҆ще е҆си ви́дѣлъ сн҃е чл҃чь. и҆ веде м̂ѧ, и҆ ѻ҆брати м̂ѧ на брегъ рѣчныи. въ ѻ҆браще́нїи мое҆мъ, и҆ се на́ брезѣ рѣ́чнемъ дꙋ́бїе мно́го ѕѣло ѻ҆́ба полы·

4

И҆ рече къ мнѣ, вода с̂и текꙋщїѧ въ галиле́ю на въсто́къ, и҆схожда́ше къ а҆равїи, и҆ грѧдѧ́ше до мо́рѧ къ водѣ и҆сход̑нѣи, і҆ и҆сцѣлитъ во́ды·

5

И҆ бꙋ́детъ вс̂ѧ дш҃а живо́тъ живо́тных̑, на вс̂ѧ на нѧже на́идетъ т̂а рѣка, жи́ви бꙋ́дꙋтъ. и҆ бꙋ́дꙋтъ ры́бы мно́ги т̂ꙋ ѕѣло, ꙗ҆́ко прїидетъ та́мо ѕѣло вода с̂и, і҆ и҆сцѣлитъ. и҆ жи́въ бꙋ́детъ на негоже а҆ще прїидетъ рѣка, и҆ бꙋдт̑ꙋ жи́ви. и҆ ста́нꙋт꙽ т̂ꙋ ры́бари, ѿ и҆н꙽гад꙽ди до и҆н꙽галѣи҆мъ. сꙋши́ло мре́жамъ бꙋдет̑. ѻ҆ себѣ бꙋдетъ. и҆ ры́бы е҆ѧ̀, ꙗ҆́ко ры́бы мо́рѧ вели́каго мно́жество мно́го ѕѣло·

6

И҆ въ и҆злазъ е҆го, и҆ въ ѻ҆браще́нїи е҆го, и҆ въ превознесе́нїи е҆го. мѣлина е҆го не и҆сцѣлитсѧ, в꙽ соль сѧ в꙽да́сть·

7

И҆ к рѣцѣ възы́идꙋтъ, на́ брезѣ е҆ѧ̀ ѻ҆́ба по́лы все дре́во ꙗ҆до́мое. не ѻ҆бет꙽ша́етъ ѹ҆ неѧ, ни ѻ҆скꙋдѣ́етъ ѹ҆ неѧ плод̑ е҆ѧ. на ко́ждыи мс̑҇цъ принесет̑ прьвое ѿ плода. и҆м꙽же во́ды и҆хъ сїѧ ѿт̑ ст҃ыхъ и҆схо́дѧтъ. и҆ бꙋдетъ плод̑ и҆хъ въ снѣдь, и҆ ли́ствїе е҆го въ здра́вїе·

8

Се̂ гл҃етъ г҃ь б҃ъ, сїа предѣлы да причастите зе́мльныа двѣма на́десѧт꙽ма племен꙽ма сн҃овъ і҆и҆л҃евъ. приложе́нїе прича́стїю. да прича́ститсѧ ко́ждо ꙗ҆́коже и҆ брат̑ е҆го, на ню́ же въз꙽двигох̑ рꙋ́кꙋ мою ꙗ҆́коже да́ти ѿц҃мъ и҆хъ. и҆ паде́тъ землѧ̀ и҆хъ въ причастїе ва́м꙽·

9

Се же предѣ́ли землѧ̀. на сѣ́вер꙽, ѿ мо́рѧ вели́каго, сходѧ́щаго и҆ ѻ҆бходѧ́щаго вхо́дъ, и҆маѳельдамъ, моа́въ, лови́твы е҆фрѣмовы, и҆лїа́мъ, средѣ предѣла дама́скова, и҆ средѣ маѳи а҆ѵ́нань а҆ѷнанѧ. при́сно свы́ше предѣ́лъ а҆ѷринити́дьскь·

10

Сїи предѣ́ли ѿ мо́рѧ ѿ двора е҆на́нова предѣ́ли дама́скови, и҆ е́же к꙽꙽ сѣверꙋ, и҆ предѣ́лъ е҆м꙽ма́мовъ, и҆ предѣ́лъ сѣ́вер꙽скъ. и҆ е́же на въсто́ки межд̑ꙋ а҆ѵ́ринитид̑скою, и҆ междꙋ дама́ском̑, и҆ междꙋ галаа҆дит̑скою, и҆ междꙋ землею і҆и҆л҃евою. і҆ѻ҆рда́нъ дѣ́литъ к мо́рю е҆же на въсто́ки фини́чески. а҆ки и҆ на въсто́ки. и҆ е́же на ю҆́гъ, и҆ на въсто́ченъ. ѿт̑ ю҆́га до финикона до воды̀ марїѻ́ѳъ, и҆ дѵм̑. продол꙽жи къ мо́рю вели́комꙋ. сїю странꙋ ю҆́гъ, и҆ въсто́ченъ. т̂ꙋ странꙋ мо́рѧ вели́каго, да предѣлѧ́етъ да́же и҆ прѧ́мо въхо́дꙋ и҆ма́ѳъ·

11

И҆ да раздѣли́те зе́млю и҆мъ, племенем꙽ і҆и҆л҃евомъ. разложи́те ю҆̀ жре́бїем̑, ва́мъ, и҆ прихо́домъ ѻ҆бита́вшимъ средѣ вас̑҇, и҆же сꙋть роди́ли сн҃ы средѣ вас̑҇. и҆ бꙋдꙋтъ вам̑ ꙗ҆́ко т̂озе́мльцы сн҃омъ і҆и҆л҃евомъ, с ва́ми да ꙗ҆дѧ́тъ въ прича́стїи средѣ племе́нъ і҆и҃лев꙽. и҆ бꙋдꙋтъ въ пле́мени приход̑стѣ въ прихо́дѣхъ с ни́ми т̂ꙋ да да́сте прича́стїе, гл҃етъ г҃ь б҃ъ·