Ostroh Bible❧Книга Ездри, розділ 1

1

Въ лѣто пр́ьвое кѷра цр҃ѧ пр́ьскаго.

2

въ съврьше́нїи сло́ва гн҃ѧ ѿ ѹ́стъ і҆е҆ремїиных̑. въздви́же г҃ь дх҃ъ кѷра цр҃ѧ пр́ьскаго и҆ прострѐ гласъ въ все црс̑҇тво свое. въкꙋпѣ по писа́нїю рекꙋщи, сїе рече кѷръ цр҃ь пр́ьскїи. всѧ̀ црс̑҇тва земнаѧ да́лъ мнѣ̀ г҃ь б҃ъ нбс̑҇ныи. и҆ то́и повелѣ̀ м̂и да съѕи́жд̑ꙋ е҆мꙋ до́мъ въ і҆ерс̑҇лимѣ, и҆же е҆сть въ і҆ѹ҆де́и. а҆ще ѹ҆бо кт̂о е҆сть въ ва́съ всѣхъ лю́дехъ е҆го. бꙋ́детъ г҃ь е҆го с ни́мъ. да възы́идетъ въ і҆ерс̑҇лимъ и҆же е҆сть въ і҆ѹ҆де́и·

3

И҆ съзи́ждетъ до́мъ б҃ꙋ і҆и҆л҃евꙋ. то́и е҆сть г҃ь и҆же ес̑҇ въ і҆ерс̑҇лимѣ. и҆ всѧ́къ ѻ҆ста́выи ѿ всх̑ѣ гра́дъ и҆дѣж́е ѻ҆бита́етъ. да помо́гꙋтъ е҆мꙋ мꙋж́и ѿ мѣ́ста е҆го сре́бромъ и҆ зла́томъ. и҆ съсꙋ́ды и҆ ско́ти. и҆ съ про́чими доброво́лными ѻ҆беща́нїи принесꙋтъ цр҃кви бж҃їи и҆же ес̑҇ въ і҆ерс̑҇лимѣ·

4

И҆ въста́ша кнѧ́ѕи ѿц҃ъ ѿ і҆ѹ́ды и҆ венїами́на и҆ сщ҃ен̑҇ницы и҆ левѷти, и҆ вс̂и и҆́мже въздви́гъ г҃ь б҃ъ дх҃ъ да в꙽зы́идꙋтъ къ създа́нїю цр҃кви гн҃и, и҆же бы́сть въ і҆ерс̑҇лимѣ·

5

И҆ вси же и҆же бѧ́хꙋ ѻ҆́крс̑҇тъ помого́ша и҆мъ въ сре́брѣ и҆ зла́тѣ. съ ко́ньми и҆ ско́ты. съсꙋ́ды, про́чаѧ тѣхъ и҆же доброво́лно принесо́ша. и҆ цр҃ь же кѷръ ѿда́лъ съсꙋды цр҃кви гн҃и. и҆же взѧ̀ наѹ҆ходоносо́ръ ѿ і҆ерс̑҇лима. и҆ положѝ т̂а въ цр҃кви б҃а свое҆го, въздал̑҇ же т̂а кѷръ цр҃ь прь́скїи под̑ рꙋки миѳрида́тꙋ гавари́новꙋ сн҃ꙋ, и҆ пре̑ е҆го ѿда́на санаваса́рꙋ, кн҃ѕю і҆ѹ҆де́искꙋ. и҆ тоже е҆сть число̀ и҆хъ б̂ѣ·

6

ѹ҆мова́лникъ зла́тыхъ, л҃. ѹ҆мова́лникъ сре́брѧныхъ. ҂а҃. кадил̑҇ниц꙽ зла́тыхъ, к҃ѳ. фїа́лъ зла́тыхъ л҃. и҆ фїа́лъ сре́брѧны, с҃. и҆ съсꙋдов꙽ и҆́ныхъ, ҂а҃. и҆ всѧ̀ сосꙋ́ды сїѧ прине́сены зла́тыѧ и҆ сре́брѧныѧ, ҂е҃, и҆ у҃·

7

Вс̂ѧ взѧ̀ санаваса́ръ, е҆гда̀ въсхожа́хꙋ ѿ преселе́нїѧ ва́вѷло́ньскаго въ і҆ерс̑҇лимъ·