Ostroh BibleКнига Ездри, розділ 9
Шрифт:
Запис:
1
И ꙗ҆́ко съвръше́на сꙋть сїѧ. пристꙋпи́ша къ мнѣ̀ кн҃ѕи гл҃юще. нѣсть ѿлꙋче́ни людїе і҆и҆л҃евы и҆ сщ҃еницы и҆ левѷти ѿ людїи зе́мныхъ, н̂о съ нечистота́ми и҆хъ бѧ́хꙋ. и҆же е҆сть ханане́и, и҆ е҆в꙽ве́и, и҆ ферезе́и, и҆ е҆вꙋсеи. и҆ съ а҆мони́тѧны, и҆ моа҆ви́тѧны, и҆ а҆мореа҆ны, и҆же прїѧ́ша ѿ дще́реи и҆хъ себѣ и҆ сн҃омъ свои҆мъ·
2
И҆ смѣси́ша сѣ́мѧ ст҃ое съ люд̑ми зе́м꙽ными·
3
И҆ рꙋки же кн҃ѕїи мно́жае быша въ престꙋпле́нїи. с̂е а҆зъ е҆гдаже слы́шахъ словеса̀ т̂а. раздрах̑ ри́зы своѧ̀ и҆ рида́хъ, терза́хъ вла́сы главы̀ мое́ѧ и҆ брадꙋ. и҆ сѣдох̑ тꙋжа̀·
4
И҆ събра́шасѧ къ мнѣ̀ вс̂и боѧ́щисѧ сло́ва б҃а і҆и҆л҃ева за престꙋпле́нїе и҆же ѿ плѣне́нїа прїидо́ша·
5
И҆ а́зъ сѣдѧх̑ приско́рбенъ да́же до жрьтвы вече́рнѧа и҆ в жрьтвꙋ вече́рнюю въстах̑ ѿ покаѧ́нїа, и҆ вънегда̀ раздра́хъ ри́зы своа̀ и҆ пла́кахсѧ преклоних̑ колѣнѣ моѝ и҆ простро́хъ рꙋцѣ моѝ къ г҃ꙋ б҃ꙋ мое҆мꙋ и реко́хъ·
6
Бж҃е мои стыжд̑ꙋсѧ и҆ срамлю́сѧ въздви́гнꙋти лицѐ моѐ к тебѣ. ꙗ҆́ко безако́нїѧ на́ша ѹ҆мно́жена сꙋть на главах̑ на́шихъ. и҆ безако́нїѧ на́ша възрасто́ша да́же до нб҃си ѿ дн҃їи ѿц҃ъ на́шихъ. въ престꙋпле́нїи на́шемъ е҆смы да́же до дн҃и сего·
7
И҆ въ безако́нїи на́ших̑ преда́ни е҆смы̀. и цр҃и на́ши и҆ сщ҃енницы на́ши въ рꙋ́кꙋ цр҃емъ земли, и҆ въ ме́чь и҆ въ плѣне́нїе и҆ въ расхище́нїе и҆ въ ѻ҆стыдѣ́нїе лица̀ ꙗ҆ко и҆ въ дн҃ь то́и·
8
И҆ нн҃ѣ ꙗ҆́ко въ ма́лѣ м꙽гнове́нїи сътворе́но е҆сть моле́нїе на́ше къ г҃ꙋ б҃ꙋ на́шемꙋ. да сѧ ѻ҆ста́вѧтъ нам̑ ѻ҆ста́н꙽ки. и҆ да сѧ да́сть намъ ми́ръ въ мѣ́стѣ ст҃емъ е҆го. и҆ да просвѣти́тъ ѻ҆́чи на́ши б҃ъ наш̑҇·
9
И҆ да сѧ да́сть намъ живо́тъ ма́лъ въ рабо́тѣ на́шеи. ꙗ҆́ко рабѝ е҆смы̀ и҆ къ работѣ̀ на́шеи не ѻ҆ста́ви насъ б҃ъ на́шъ·
10
И҆ ѹ҆клонѝ на нас̑҇ млрс̑҇дїе пред̑ цр҃емъ прьскимъ да да́сть намъ животъ, въздви́гнꙋти до́мъ б҃ꙋ на́шемꙋ и҆ ѹ҆стро́ити пꙋсты́нѧ е҆го. и҆ дадѐ на́мъ ѹ҆пова́нїе въ і҆ѹ҆де́и і҆ и҆ерс̑҇лимѣ·
11
И҆ нн҃ѣ речемъ г҃и б҃е на́шъ въ сїе, и҆же ѻ҆ставихомъ повеле́нїѧ твоѧ̀. и҆же повелѣлъ е҆си рꙋко́ю рабъ твои҆хъ прро̑҇къ гл҃ющи. землѧ̀ на ню́же в̂ы взы́идете да въздержи́те е҆ѧ̀, землѧ̀ нечи́ста е҆сть по нечистотѣ̀ людїи про́чихъ землѝ, въ ноше́нїи и҆хъ, и҆же и҆спо́лниша ю҆̀ ѿ ѹ́стъ даже до у́стъ скверне́нїе их̑·
12
нн҃ѣ ѹ҆бо дще́ри ва́ши не да́ите сн҃омъ и҆хъ, и҆ дще́ри их̑ не прїемли́те сн҃овом̑ вашимъ, и҆ не и҆́щѣте ми́ра и҆хъ, и҆ бл҃гаѧ и҆хъ, да́же до́ вѣка, да́же ѹ҆крѣпи́тесѧ и҆ ꙗ҆ди́те, и҆же бл҃га сꙋть землѝ. и҆ наслѣ́дїе и҆мѣю҆тъ сн҃ове ва́ши да́же до́ вѣка·
13
И҆ по всх̑ѣ и҆же прїидо́ша на насъ в дѣ́лехъ на́ших̑ строп꙽ти́выхъ. и҆ грѣсѣ на́шемъ вели́ком꙽. ꙗ҆́ко нѣ́сть и҆нъ ꙗ҆́ко б҃ъ наш̑҇ и҆же и҆зба́ви нас̑҇ ѿ безако́нїи на́ших̑·
14
И҆ да́лъ е҆сть на́мъ спс̑҇нїе, мы же ѻ҆брати́хомсѧ разори́ти за́повѣди твоа̀. и҆ съженѧ́емсѧ съ люд̑ми зе́мными·
15
Не прогнѣва́еши ли сѧ на на́съ да́же до сконча́нїѧ. ниже ѻ҆ста́виши л̂и намъ ѻ҆ста́нокъ на спс̑҇нїе·
16
Ги҃ б҃е і҆и҆л҃евъ пра́веденъ е҆си т̂ы. ꙗ҆́ко ѻ҆ста́вихомъ спс̑҇нїе, ꙗ҆́ко и҆ въ дн҃ь сїи·
17
с̂е м̂ы пред̑ тобо́ю е҆смы̀ вс̂и въ безако́нїи на́шемъ. ни бо̀ ста́ти мо́жемъ пред̑ тобо́ю се́го ра́ди·
Джерела
