Ostroh BibleПерша книга Мойсеєва: Буття, розділ 1
Шрифт:
Запис:
1
Иско́ни сътворѝ б҃ъ нб҃о и҆ зе́млю. землѧ́ же б̂ѣ неви́дима и҆ неѹ҆краше́на. и҆ тма̀ ве́рхꙋ без꙽дны.
2
И҆ дх҃ъ бж҃їи ноша́шесѧ ве́рхꙋ воды̀. и҆ реч̑ бъ, да бꙋ́детъ свѣтъ, и҆ бы́сть свѣтъ·
3
И҆ ви́дѣ б҃ъ свѣтъ ꙗ҆ко добро̀·
4
И҆ разлꙋчѝ б҃ъ ме́ждꙋ свѣтом꙽ и҆ ме́ждꙋ тмо́ю·
5
И҆ наречѐ б҃ъ свѣт꙽ дн҃ь, а҆ тмꙋ̀ наречѐ но́щъ, и҆ бы́сть ве́черъ и҆ бы́сть ѹ҆́тро дн҃ь е҆ді́нъ·
6
И҆ ре́че б҃ъ да бꙋдетъ тве́рдь посред̀ѣ воды̀, и҆ бꙋдетъ разлꙋча́ѧ посредѣ воды̀ и҆ воды̀, и҆ бысть та́ко·
7
И҆ сътворѝ б҃ъ тве́рдь. и҆ разлꙋчѝ б҃ъ м́еждꙋ водо́ю, ꙗ҆́же б̂ѣ под̑ тве́рдїю. и҆ посредѣ воды̀, ꙗ҆́же б̂ѣ над̑ тве́рдїю. и҆ наречѐ б҃ъ тве́рдь н҃бо. и҆ ви́дѣ б҃ъ ꙗ҆ко добро̀. и҆ бы́сть ве́черъ, и҆ бысть ѹ҆́тро дн҃ь вторый·
8
И҆ ре́че б҃ъ, да събере́тсѧ вода̀ ꙗ҆́же под̑ нб҃семъ, въ совокꙋпле́нїе е҆ді́но. и҆ да ꙗ҆́ви́тсѧ сꙋша, и҆ бысть та́ко·
9
И҆ събра́сѧ вода̀ ꙗ҆́же под̑ нб҃семъ въ со́нмы своѧ̀, і҆ ꙗ҆́ви́сѧ сꙋша·
10
И҆ наречѐ б҃ъ сꙋшꙋ зе́млю, а҆ соста́вы водны́ѧ наречѐ мо́ре и҆ ви́дѣ б҃ъ ꙗ҆́ко добро̀·
11
И҆ рече б҃ъ, да прорасти́тъ землѧ̀ бы́лїе травно́е, сѣю́ще сѣмѧ по ро́дꙋ и҆ по подобїю, и҆ древо плодови́то творѧ́щее пло́дъ, е҆мꙋже сѣмѧ е҆го въ немъ по ро́дꙋ на землѝ, и҆ бы́сть та́ко·
12
І҆ и҆знесѐ землѧ̀ былїе травно́е, сѣю́ще сѣмѧ по ро́дꙋ и҆ по подо́бїю и҆ дре́во плодови́то творѧ́щее плодъ, е҆мꙋже сѣмѧ е҆го въ не́мъ по ро́дꙋ на землѝ, и҆ ви́дѣ б҃ъ ꙗ҆ко добро̀. и҆ бы́сть ве́черъ и҆ бысть ѹ҆́тро дн҃ь тре́тїи·
13
И҆ рече б҃ъ, да бꙋдꙋтъ свѣти́ла на тве́рди нбс̑҇нѣи, ѻ҆свѣща́ти зе́млю, и разлꙋча́ти ме́ждꙋ дн҃емъ и ме́ждꙋ но́щїю·
14
И҆ да бꙋдꙋтъ въ зна́менїѧ и҆ въ времена̀, и҆ въ дн҃и и҆ въ лѣта·
15
И҆ да бꙋдꙋтъ въ просвѣще́нїе на тве́рди нбс̑҇нѣи, ꙗ҆ко свѣти́ти по зем̑лѝ и҆ бысть та́ко·
16
И҆ сътворѝ б҃ъ дв̂ѣ свѣти́лѣ вели́цѣ свѣти́ло вели́кое, въ нача́токъ дн҃и. свѣти́ло же ме́нъшее, въ нача́токъ но́щи и҆ ѕвѣзды.
17
И҆ поста́ви и҆х꙽ б҃ъ на тве́рди нбс̑҇нѣи, ꙗ҆́ко свѣти́ти по землѝ, и҆ владѣти дн҃ем꙽ и҆ но́щїю·
18
И҆ разлꙋча́ти ме́жд̑ꙋ свѣтом̑ и҆ межд̑ꙋ тмо́ю·
19
И҆ ви́дѣ б҃ъ ꙗ҆́ко добро̀, и҆ бысть ве́черъ, и҆ бысть ѹ҆́тро дн҃ь четве́ртыи·
20
И҆ ре́че б҃ъ, да и҆зведꙋтъ во́ды, га́ды дш҃ъ живы́хъ, и҆ пти́цы лѣта́юща на землѝ по тве́рди нбс̑҇нѣи, и҆ бы́сть та́ко·
21
И҆ сътворѝ б҃ъ ки́ты вели́кїа, и҆ всѧ́кꙋ дш҃ꙋ живо́тных̑ гад̑. ꙗ҆́же и҆зведоша во́ды по ро́дꙋ и҆хъ, и҆ всѧ́кꙋ пти́цꙋ перна́тꙋ по ро́дꙋ·
22
И҆ ви́дѣ б҃ъ ꙗ҆́ко добро̀·
23
И҆ блс̑҇ви ѧ҆̀ б҃ъ гл҃ѧ, расти́тесѧ и҆ множи́тесѧ, и҆ напо́лните во́ды ꙗ҆́же въ мо́рѣхъ, и҆ пти́цы да ѹ҆мно́жатсѧ на землѝ·
24
И҆ бысть ве́черъ и҆ бысть ѹ҆́тро дн҃ь пѧ́тыи·
25
И҆ ре́че б҃ъ, да и҆зведет̑ землѧ̀ дш҃ꙋ жи́вꙋ по ро́дꙋ, четвероно́га и҆ га́ды, и҆ ѕвѣрѧ землѝ по ро́дꙋ. и҆ бы́сть та́ко, и҆ сътворѝ б҃ъ, ѕвѣ́рѧ зе́мныа по ро́дꙋ и҆ ско́ты по ро́дꙋ и҆хъ, и҆ вс̂ѧ га́ды землѝ по ро́дꙋ их̑·
26
И҆ ви́дѣ б҃ъ ꙗ҆ко добро̀.
27
И҆ рече б҃ъ, сътвори́мъ чл҃ка по ѻ҆́бразꙋ на́шемꙋ, и҆ по подо́бїю·
28
И҆ да ѻ҆блада́етъ ры́бами мор꙽ски́ми, и҆ пти́цами нбс̑҇ными, и҆ ѕвѣ́рми и҆ ско́ты, и҆ все́ю земле́ю, и҆ всѣми га́ды пресмыка́ющимисѧ по землѝ.
29
И сътворѝ б҃ъ чл҃ка·
30
По ѻ҆́бразꙋ бж҃їю сътворѝ е҆го·
31
Мꙋжа и҆ женꙋ сътворѝ и҆х꙽·
32
И҆ блс̑҇ви их̑ б҃ъ гл҃ѧ, расти́тесѧ и множи́тесѧ и҆ напо́лните зе́млю, и҆ ѻ҆блада́ите е́ю·
33
І҆ ѻ҆блада́ите ры́бами мор꙽ски́ми и҆ ѕвѣ́рми и҆ пти́цами нбс̑҇ными, и҆ всѣми ско́ты, и҆ все́ю земле́ю, и҆ всѣми га́ды пресыка́ющимисѧ по землѝ·
34
И҆ реч̑҇ б҃ъ, с̂е да́хъ ва́мъ всѧ́кꙋ травꙋ̀ сѣмен꙽нꙋю сѣю҆ще сѣмѧ и҆же е҆сть ве́рхꙋ землѧ̀ всеѧ̀·
35
И҆ всѧ́ко дре́во и҆же и҆́мать в себѣ̀ плд̑о сѣмене сѣменна, ва́мъ бꙋдетъ въ снѣдь·
36
И҆ всѣмъ ѕвѣремъ зем꙽ным̑, и҆ всѣмъ пти́цам꙽ нбс̑҇нымъ, и҆ всѧ́комꙋ га́дꙋ пресмыка́ю҆щемꙋсѧ по землѝ, и҆́же и҆́мать в себѣ̀ дш҃ꙋ живо́тнꙋ, и҆ всѧ́кꙋ травꙋ̀ зеле́нꙋ въ снѣдь, и҆ бысть та́ко·
37
И҆ ви́дѣ б҃ъ всѧ̀ е҆ли́ка сътворѝ, и҆ с̂е добра̀ ѕѣло·
38
И҆ бысть вечеръ, и҆ быс̑҇ ѹ҆тро дн҃ь шесты́и·
Джерела
