Ostroh BibleПерша книга Мойсеєва: Буття, розділ 10
Шрифт:
Запис:
1
Сѝ же сꙋть бы́тїѧ сн҃въ но́евыхъ, си́ма ха́ма, и҆а҆фе́та, и҆ роди́шасѧ и҆мъ сн҃ве по потопѣ·
2
Сн҃ве а҆фе́товы, геме́ръ, и҆ магг̑҇о и мада́и, І҆ ѻ҆и҆а́нъ, и҆ е҆ли́са, и҆ ѳова́лъ, и҆ мосох̑, и҆ ѳи́расъ·
3
Сн҃ве же геме́ровы а҆схана́зъ, и҆ рива́ѳъ, и҆ ѳорма́гъ·
4
Сн҃ве же и҆ѻ҆и҆а́ни, е҆ли́са и҆ ѳарси́съ, кри́тьстїи, и҆ ро́дъстїи. ѿ си́х꙽ раздѣли́шасѧ ѻ҆строви стра́нъ всѣхъ въ землѝ их̑, ко́ждо по ꙗ҆́зы́комъ и҆ рожд̑енїѧх̑, и҆ въ странах̑ и҆хъ·
5
Сн҃ве же ха́мовы, хꙋ́съ, и҆ месъраи҆мъ, фꙋ́дъ, и҆ ханаа́нъ·
6
Сн҃ве хꙋ́совы, сава̀, и҆ еви́ла, и҆ сава́та и҆ регма̀, и҆ саваѳа́ка·
7
Сн҃ве же регма́новы, сава̀ и҆ дадан̑҇, хꙋ́съ же родѝ невро́да, се́и начатъ гига́нтъ бы́ти на землѝ, се́и бѣ̀ и҆сполинъ, лове́цъ пре́дъ гм҃ъ бг҃омъ·
8
Сего ра́ди рекꙋтъ ꙗ҆ко невро́дъ и҆споли́нъ предъ гм҃ъ·
9
И҆ бы́сть нача́ло црс̑҇тва е҆го, вавилон̑҇, и҆ ѻ҆ре́хъ, и҆ а҆рхадъ, и҆ халаа҆́нь, на землѝ сенаа́ръ. ѿ землѧ же тоѧ̀·
10
И҆зы́де а҆сꙋръ, и҆ създа̀ н̂иневги́ю посредѣ̀ халахом̑, с̂е е҆сть грд̑а вели́кїи·
11
Месраим̑ же роди лю́дии҆́ма, и҆ неѳали́ма и҆ е҆неметии́ма, и҆ лавии҆́ма, и҆ патросинїи҆́ма и҆ хазмонїи҆́ма ѿню́дꙋже и҆зы́иде филисти́мъ, и҆ гафѳорїи́мъ·
12
Ханаа́нь же родѝ и҆ сидона первеньца̀, и҆ хетъѳе́ѧ, и҆ е҆вꙋсе́ѧ, и҆ а҆море́ѧ, и҆ гергесе́ѧ, и҆ е҆ве́ѧ и҆ а҆рꙋке́ѧ, и҆ а҆сене́ѧ, и҆ а҆ради́ѧ, и҆ самари́ѧ, и҆ маѳи́ю, и҆ посе́мъ разсѣѧ҆шасѧ племена̀ ханане́искаѧ·
13
И҆ бы́ша предѣлы ханане́истїи ѿ сидо́на да́же и҆́ до гера́ра, и҆ га́зы, дои́дꙋще содом̑ и҆ гомо́ръ и҆ до а҆да́мы, и҆ севои́ма, да́же и҆ до да́са. с̂и сн҃ве ха́мовы въ племе́нех̑ свои҆́хъ, и҆ въ ꙗ҆́зы́цехъ свои҆́хъ, и҆ въ се́лехъ свои҆́хъ, и҆ въ странахъ свои҆́хъ·
14
Си́мꙋ бы́вшꙋ томꙋ ѿц҃ꙋ всѣхъ сн҃въ е҆веро́вых̑, бра́тꙋ а҆фе́товꙋ старѣи́шемꙋ·
15
Сн҃ве си́мовы, е҆ла́мъ, и҆ а҆сꙋръ, и҆ а҆рфаѯад̑, лю́дъ, и҆ а҆ра́мъ, и҆ каи҆на́нъ·
16
И҆ сн҃ве а҆ра́мли, ѻ҆́съ, и҆ ѹ҆́ль, гате́ръ, и҆ мосо́хъ, а҆рфаѯа́дъ родѝ каи҆на́на.
17
Каи҆нанъ роди са́лю, Са́лѧ же родѝ еве́ра·
18
и҆ роди́стасѧ е҆ве́рꙋ два̀ сн҃а, и҆мѧ е҆ді́номꙋ фале́къ, въ дн҃и б̂о е҆го раздѣли́сѧ зем̑лѧ·
19
И҆мѧ бра́тꙋ е҆го и҆ектан̑҇, и҆екта́н же родѝ е҆льмода́да, и҆ сале́ѳа и҆ а҆сармо́ѳа, и҆а҆ра́ха, и҆ ѻ҆до́ра, и҆ еви́лѧ, и҆ де́клѧ, и҆ авимеі́лѧ и҆ сове́ва, и҆ ѹ҆фи́ра, і҆ е҆ви́ла, и҆ ѻ҆ва́ва вс̂и сїи сн҃ве и҆екта́новы·
20
И҆ бы́сть въселе́нїе их̑ ѿ маси, даже и҆дꙋще сафи́ра, горы̀ въсточныѧ·
21
Сїи сн҃ве си́мовы въ племене́хъ своих̑, по ꙗ҆́зы́комъ и҆́хъ въ се́лехъ и҆х꙽, и҆ въ стра́нах̑ и҆́хъ. си племена сн҃въ но́евых̑, по родꙋ и҆хъ, по ꙗ҆́зы́комъ и҆́хъ, въ се́лехъ их̑ и҆ въ стра́нах̑ и҆хъ, ѿ си́хъ разсѣѧ҆шасѧ ѻ҆́строви странъ, на землѝ по пото́пѣ·
Джерела
