Ostroh Bible❧Перша книга Мойсеєва: Буття, розділ 12

1

И ре́че г҃ь а҆вра́мꙋ, и҆зыи҆ди ѿ зем̑лѧ твоеѧ̀, и҆ ѿ ро́да твое҆го, и҆ ѿ до́мꙋ ѿц҃а твое҆го, І҆ и҆ди въ зе́млю в꙽ ню́же ти покажꙋ̀, и҆ сътворю̀ тѧ̀ въ ꙗ҆зыкъ ве́лїи, и҆ блс̑҇влю тѧ, и҆ възвели́чю и҆мѧ̀ твоѐ, и҆ бꙋдеши блс̑҇внъ, и҆ блс̑҇влю блс̑҇вѧ́щаѧ тѧ̀, и҆ кленꙋщаѧ҆ тѧ̀ прокленꙋ, и҆ блс̑҇вѧ́тсѧ ѻ҆ тебѣ̀ вс̂ѧ племена̀ зе́мнаѧ.

2

І҆ и҆де а҆вра́м꙽ ꙗ҆́коже гл҃а е҆мꙋ г҃ь, и҆дѧ́ше с ни́мъ и҆ ло́т꙽·

3

А҆вра́м же бѧше лѣтъ ѻ҃е, е҆гда̀ и҆зы́иде ѿ землѧ̀ хараа҆́нѧ·

4

И҆ поѧ̀ а҆вра́мъ женꙋ̀ свою̀ сарꙋ, и҆ ло́та сн҃а бра́та свое҆го, и҆ всѧ и҆мѣ́нїа своѧ̀ е҆ли́ко притѧжа́ша, и҆ всѧ̀ дш҃а ꙗ҆же притѧжа́ша въ хараа҆́ни, и҆зыи҆до́ша и҆ ті́и въ зе́млю хананею́·

5

І҆ ѻ҆бы́иде а҆врам̑ зе́млю всю̀, до мѣ́ста, сихе́м꙽ска, къ дꙋ́бꙋ высо́комꙋ, хананеи́ же тогда̀ живѧ́хꙋ на зем̑ли то́и.

6

И҆ ѧ҆ви́сѧ г҃ь а҆вра́мꙋ, и҆ реч̑҇ е҆мꙋ сѣмени твое҆мꙋ дам̑ зе́млю сїю̀·

7

И꙼ създа̀ т̂ꙋ а҆врам̑ тре́бникъ г̂ꙋ ꙗ҆́вльшемꙋсѧ е҆мꙋ·

8

И҆ въстꙋпѝ ѿтꙋ́дꙋ въ го́рꙋ на въсто́къ лицм̑е прѧ́мо веѳи́ль, и҆ поста́ви хра́мъ свои въ веѳи́ль к꙽ мо́рю къ востоком꙽, и҆ созда̀ т̂ꙋ тре́бникъ г҃ꙋ, и҆ помоли́всѧ во и́мѧ г҃а. ꙗ҆́вльшагосѧ е҆мꙋ·

9

И҆ въздви́жесѧ а҆врам̑, і҆ и́де въ ѻ҆рꙋжїи сквозѣ̀ пꙋсты́ню, и҆ бы́сть глд̑а на землѝ·

10

И҆ прїиде а҆врам̑ въ е҆гѷпетъ, хотѧ̀ жи́ти т̂ꙋ, ꙗ҆́ко соѻ҆долѣлъ бѧше глд̑а на землѝ·

11

Бы́сть же е҆гда̀ приближи́сѧ а҆вра́мъ вни́ти въ е҆гѷпетъ, ре́че а҆врам̑ са́рѣ женѣ̀ свое́и, ви́жд̑ꙋ а҆́зъ ꙗ҆́ко добра̀ е҆си жена̀ в꙽ лицѐ, бꙋдетъ ѹ҆́бо е҆гда̀ ѹ҆ви́дѧт̑ тѧ̀ е҆гѷптѧне, и҆ рекꙋтъ ꙗ҆́ко жена̀ е҆си е҆мꙋ и҆ ѹ҆бїю́тъ м̂ѧ а҆ тебѐ по́имꙋт꙽, рцы̀ ѹ҆бо ꙗ҆ко сестра̀ е҆мꙋ е҆́смь, да и҆ мнѣ добро̀ бꙋ́детъ тебѐ ра́ди. и҆ бꙋ́детъ жива̀ дш҃а моѧ̀ тебѐ ра́ди·

12

Бы́сть же е҆гда̀ вънїиде а҆врам̑ въ е҆гѷпет꙽, и҆ видѣвше е҆гѷптѧне женꙋ̀ е҆го, ꙗ҆ко добра̀ бѧ́ше ѕѣло̀·

13

Ви́дѣша ю҆̀ кн҃ѕи фараѻ҆ни, и҆ похвали́ша ю҆̀ къ фараѻ҆́нꙋ, и҆ въведо́ша ю҆̀ въ до́мъ фараѻ҆́новъ і҆ а҆вра́мꙋ добрѣ бѧ́ше е҆ѧ̀ дѣлѧ·

14

И҆ бы́ша а҆вра́мꙋ ѻ҆вца̀ говѧ́да и҆ ѻ҆слѧта, рабы̀ и҆ рабы́нѧ и҆ мщата и҆и҆ вельблю́ди·

15

И҆ мꙋчи г҃ь мꙋ́ками вели́кими фараѻ҆́на и҆ дом꙽ е҆го, са́ры дѣлѧ жены̀ а҆вра́млѧ.

16

Възва́ же фараѻ҆́нъ а҆вра́ма, и҆ речѐ е҆мꙋ чт̂о сѐ сътвори́ ми, не повѣдав̑҇ ꙗ҆́ко на̀ тѝ е҆сть, почто́ ли ре́че ꙗ҆ко сестра̀ ми е҆сть, поꙗ҆х꙽ ю҆̀ себѣ̀ в женꙋ̀·

17

И҆ нн҃ѣ сѐ жена̀ твоѧ̀ прд̑е тобо́ю пое҆мъ ю҆̀ ѿи҆ди·

18

И҆ повелѣ фараѻ҆нъ мꙋжем̑ а҆вра́ма дѣлѧ, проводи́ти е҆го и҆ женꙋ̀ е҆го, и҆ вс̂е е҆лико бѧ́ше е҆го, и҆ ло́та с ни́мъ