Ostroh Bible❧Перша книга Мойсеєва: Буття, розділ 17

1

Бы́сть же, а҆вра́мꙋ лт̑ѣ ч҃ѳ·

2

І҆ ꙗ҆́ви́сѧ г҃ь а҆вра́мꙋ, и҆ ре́че е҆мꙋ а҆́зъ е҆смь б҃ъ тво́и, бл҃гоѹ҆годѝ предо мно́ю, и҆ бꙋди непоро́ченъ·

3

И҆ положꙋ̀ завт̑ѣ мо́и межд̑ꙋ мно́ю и҆ межд̑ꙋ тобо́ю, і҆ ѹ҆мно́жꙋ т̂ѧ ѕѣло̀·

4

И҆ падѐ а҆вра́мъ на лицы̀ своем̑·

5

И҆ гл҃а е҆мꙋ б҃ъ рекїи, азъ и҆ завѣтъ мо́и с тобо́ю, и҆ бꙋ́деши ѿц҃ъ мно́гимъ ꙗ҆́зы́комъ·

6

И҆ не прозове́тсѧ ктомꙋ̀ и҆́мѧ твоѐ а҆врам̑ н̂о бꙋ́детъ и҆́мѧ твое а҆враа́мъ·

7

Ꙗ҆́ко ѿц҃а мно́гим꙽ ꙗ҆́зы́комъ положих̑ т̂ѧ, и҆ възра́щꙋ т̂ѧ ѕѣло̀ ѕѣло̀ и҆ поста́влю тѧ въ наро́ды, и҆ цр҃и и҆с тебѐ изы́дꙋтъ, и҆ поста́влю завѣт꙽ мо́й межд̑ꙋ мно́ю и҆ межд̑ꙋ тобо́ю, и҆ межд̑ꙋ сѣменемъ твоим̑, по тебѣ̀ в род̑и̑ и҆хъ, въ завѣтъ вѣ́ченъ·

8

И҆ бꙋ́дꙋ тебѣ б҃ъ, и҆ сѣмени твое҆мꙋ по тебѣ, и҆ дам̑ тебѣ и҆ сѣ́мени твое҆мꙋ, землю̀ въ не́йже ты ѻ҆биталъ е҆си, вс̂ю землю̀ ханаа́ньскꙋ, въ ѻ҆дръжа́нїе вѣ́чно, и҆ бꙋ́дꙋ и҆мъ б҃ъ·

9

И҆ рече б҃ъ къ а҆враа́мꙋ, т̂ы же завѣтъ мои сънабдѝ, и҆ сѣмѧ твое с тобо́ю въ родъ их̑, с̂е ес̑҇ завѣт꙽ е҆гоже съблюдеши межд̑ꙋ мно́ю и҆ тобо́ю, и҆ сѣ́менемъ твоим̑ по тебѣ в ро́дѣхъ и҆хъ. ѻбрѣжет꙽ же сѧ всѧк꙽ мꙋ́жескъ полъ, ѻ҆брѣ́жете плоть коне́чнꙋю вашꙋ, и҆ бꙋ́детъ въ зна́менїе завѣтꙋ, междꙋ̀ мно́ю и҆ вами. и҆ младенцы ваши, въ и҃ дн҃ь ѻ҆брѣжете весь мꙋ́жескїи полъ въ ро́дѣ вашемъ·

10

домоча́дець и҆ кꙋ́пленыи, и҆ всѧкъ и҆же нѣста ѿ плода твое҆го ѻ҆брѣ́занїемъ ѻ҆брѣ́жетсѧ, домоча́дець до́мꙋ твое́го и҆ кꙋ́пленыи·

11

И҆ бꙋдеть завѣтъ мои на плоти ва́шеи въ завѣтъ вѣ́ченъ·

12

Неѻ҆брѣ́заныи же мꙋ́жескыи полъ, и҆же не ѻбрѣжет̑ с̂и плоти коне́чныѧ е҆мꙋ въ дн҃ь ѻ́смыи погꙋби́тсѧ дш҃а т̂а ѿ ро́да свое҆го, ꙗ҆ко завѣтъ мои разорѝ·

13

И҆ рече б҃ъ а҆враа́мꙋ са́ра жена твоа, не прозовет̑сѧ ктомꙋ сара. н̂о са́рра бꙋ́ди и҆мѧ е҆й, и҆ блс̑҇влю ю҆̀, и҆ дамъ тебѣ ѿ неа ча́до, и҆ блс̑҇влю е҆̀, и҆ бꙋ́дет̑ въ ꙗ҆́зы́кы. и҆ цр҃и ꙗ҆зы́комъ и҆з него и҆зы́идꙋтъ·

14

Паде же а҆враа́мъ на лицы свое҆мъ, и҆ посмѣѧ́сѧ и҆ помысли въ ѹ҆мѣ своем̑ гл҃ѧ. а҆ще, р҃. лѣтъ мꙋжꙋ родит̑сѧ сн҃ъ, а҆ще же и҆ са́рра, ч҃ лѣтъ сꙋщи родит̑·

15

И҆ рече а҆враа́мъ къ б҃ꙋ. и҆зма́илъ с̂и да живе́тъ пред̑ тобо́ю·

16

Речеж̑ б҃ъ къ а҆враа́мꙋ бꙋ́ди, и с̂е са́рра жена твоа̀ роди́тъ тебѣ сн҃ъ, и҆ нарече́ши и҆мѧ е҆мꙋ і҆саа́къ, и҆ положꙋ завт̑ѣ мой къ немꙋ̀, въ завѣтъ вѣ́ченъ, быти е҆мꙋ въ б҃ъ, и҆ сѣмени е҆го по нем̑ и҆зма́ила же радѝ, с̂е послꙋшх̑а тебе. и҆ блс̑҇вихъ и҆̀, и҆ възвращꙋ и҆̀, и҆ ѹ҆мно́жꙋ и҆̀ ѕѣло. в҃і. ꙗ҆́зы́ка роди́т꙽. и҆ сътворю и҆̀ въ ꙗ҆́зы́къ ве́лїи. и҆ завт̑ѣ мо́и поста́влю къ і҆саа́кꙋ е҆гож̑ роди́тъ тебѣ са́рра, въ врѣмѧ нн҃ѣшнеѐ. въ лѣто второ́е, сконча же б҃ъ гл҃ъ къ а҆враа́мꙋ, и҆ възы́де бг҃ъ ѿ авраа́ма·

17

И҆ поѧ̀ а҆враа́мъ. и҆зма́ила сн҃а свое҆го, и҆ вс̂ѧ домочад̑ца своѧ. и҆ вс̂ѧ кꙋпленыѧ своѧ̀, и҆ ве́сь и҆ мꙋ́жескъ полъ домꙋ свое҆го, и҆ ѻ҆брѣ́за плот̑ коне́чнꙋю их̑, въ врѣмѧ дн҃и того, ꙗ҆коже гл̂а е҆мꙋ б҃ъ·

18

А҆враа́мꙋ же быс̑҇ лѣтъ, ч҃ и҆ ѳ҃. е҆гда ѻ҆брѣ́за плоть коне́чнꙋю е҆мꙋ, въ врѣмѧ дн҃и того ѻ҆брѣ́засѧ а҆враа́мъ, і҆ и҆зма́илъ сн҃ъ е҆го, и҆ вс̂и мꙋжи до́мꙋ е҆го, и҆ вс̂и домочад̑ц́ы. и҆ кꙋ́пленыи, ѿ всѣхъ наро́довъ. ѻ҆брѣза ѧ҆̀·