Ostroh Bible❧Перша книга Мойсеєва: Буття, розділ 49

1

Призва же і҆а́ковъ сн҃ы своѧ̀, и҆ реч̑҇ им̑ събери́тесѧ да повѣм꙽ вамъ чемꙋ быти въ васъ в послѣднѣѧ дн҃и, съвокꙋпи́тесѧ и҆ послꙋш́аите менѐ, сн҃ове і҆а́ковли, послꙋ ш́аите ѿц҃а вашего·

2

Рꙋвим̑ первене́цъ мои, т̂ы крѣпость моа̀ и҆ зача́ло чад̑ моих̑ поро́къ бысть, и҆ поро́къ лютъ и҆ ѹ҆кори́въ и҆ а҆ки вода расплыне́шисѧ. взы́де бо на ло́же ѿц҃а свое҆го, тогда̀ ѻ҆сквернави постелю, и҆дѣже въниде, симеѻ́нъ и҆ левгїи братїа скон꙽ча́ста ѻ҆бидꙋ во́лею своею̀. не прїиди дш҃е моа въ съвѣтъ и҆хъ, и҆ въ ѹ҆став̑҇ и҆хъ, да не прелепи́тсѧ внꙋтренѣа моѧ̀, ꙗ҆́ко гнѣвомъ и҆збиста чл҃кы и҆ по́мысломъ свои҆мъ прерѣ́заста жилы воло́вы. проклѧ́та лю́тость их̑ ꙗ҆́ко лю́та быста, и҆ гнѣвъ и҆хъ, ꙗ҆́ко поро́къ раздѣлю̀ и҆хъ въ і҆а́ковѣ, и҆ разъсѣ́ю и҆хъ въ і҆ил҃и·

3

І҆у҆до тебе похвали́ша братїа тво́а рꙋцѣ твоѝ на плещꙋ̀ врагъ твои҆хъ, покло́нѧт̑ ти сѧ сн҃ове ѿц҃а твое҆го. сн҃ъ і҆ѹ҆да ски́менъ, ѿ лѣторасли сн҃е мои възы́де, възле́гъ и҆ поспа̀ ꙗ҆́ко левъ и҆ ꙗ҆ко ски́менъ, кт̂о възбꙋ́дит꙽ и҆̀·

4

І҆ не скончает̑сѧ кн҃зь ѿ і҆ѹ҆ды ни старѣ́ишина ѿ чре́слъ е҆го. дондеже прїидет̑ намѣне́нїе е҆мꙋ, и҆ то́и чаа́нїе ꙗ҆́зы́комъ привѧза́ѧ къ виногра́дꙋ ѻ҆слѧ̀ свое, и҆ ви́нничїю ѻ҆сли́чищъ свои, и҆спере́тъ ризы своѧ вино́мъ, и҆ во крови гро́зновѣ ѻ҆де́ждꙋ свою, ве́селы ѻ҆́чи е҆мꙋ ѿ вина̀, и҆ бѣлы зꙋбы е҆го паче мле́ка·

5

Завꙋлон̑҇ на бре́гꙋ морѧ да сѧ всели́тъ и҆ на приста́нищи корабле́и, и҆ продолжи́тсѧ до сидо́на·

6

И҆саха́р же доброе помы́сли, почива́ѧ посредѣ предѣлъ. и҆ ви́дѣвъ поко́и ꙗ҆́ко до́бръ и҆ зе́млю ꙗ҆ко бл҃гꙋ, преклонѝ рамѣ своѝ на дѣ́ло и҆ бысть, мж̑ꙋ стѧжа́тель·

7

да́нъ да сꙋ́дитъ людемъ свои҆мъ ꙗ҆́ко е҆ді́но е҆сть племѧ въ і҆ил҃и, и҆ да бꙋ́детъ данъ змїѧ̀ на распꙋтїи сѣдѧ̀ на пꙋтѝ и хаплѧ́а пѧтꙋ ко́ньскꙋ, и҆ спаде́тсѧ ко́нник̑҇ въспѧть сп҃сенїѧ жды́и гдс̑҇нѧ. га́дъ вкꙋсомъ и҆скꙋ́ситъ, тоже и҆скꙋси́ти и҆ за пѧ́ти·

8

А҆си́ръ бл҃гъ е҆го хлб̑҇ѣ се́й б̂о да́сть пищꙋ кн҃зем̑·

9

Неѳталим̑ ꙗ҆́ко лѣторасль пꙋщен̑҇ придаѧ̀ растꙋщ́и добротꙋ садо́вныа вѣтвѣ·

10

І҆ѻ́сифъ сн҃ъ во́зрасли сн҃ъ възрасли зави́стныи, сн҃ъ мо́и ю҆нѣ́ишїи, и҆ ко мнѣ сѧ возвратѝ до него́же завѣща́юще ѻ҆болгахꙋть и҆̀, и҆ спротивлѧ́хꙋсѧ е҆мꙋ госпо́дїе ѹ҆мѣтель стрѣлѧнїа, и҆ сътро́шасѧ ѻ҆долѣ́нїемъ лꙋ́ки их̑, и҆ расла́биша жилы мы́шца и҆хъ. рꙋко́ю си́лнаго і҆а́ковлѧ ѿтꙋдꙋ ѹ҆крѣпѝ тѧ̀ і҆и҆л҃ь ѿ бг҃а ѿц҃а твое҆го. и҆ помо́жет̑ ти бг҃ъ мой, и҆ блс̑҇вит̑ тѧ блс̑҇венїе҆мъ нбнс̑҇ымъ съвы́ше. и҆ блс̑҇ве́нїе земно́е и҆мꙋще вс̂и блс̑҇венїѧ ра́ди сос̑҇цꙋ и҆ ѹ҆тро́бы. блс̑҇ве́нїе ѿц҃а твое҆го, и҆ мт҃ре твое́ѧ, преспѣ́въ блс̑҇венїѧ̀ го́ръ пребыва́ющих̑. и҆ въ блс̑҇ве́нїѝ хол꙽мо́въ вѣ́чныхъ е҆же бꙋ́дꙋтъ на гла́вѣ і҆ѻ́сифовѣ, и҆ на версе е҆го ꙗ҆́же бысть старїѝ братїѧ̀.

11

Веньꙗ҆ми́нъ, во́лкъ, восхища́ѧ заѹ҆тра, ꙗ҆́ды́и е҆ще и҆ на́ вечеръ сокры́е҆тъ пищꙋ·

12

Вс̂и сн҃ове с̂и і҆а́ковли, в҃і, с̂е гл҃а и҆мъ ѿц҃ъ и҆хъ, и҆ блс̑҇вѧ́ а кое҆гождо и҆хъ по блс̑҇венїю свое҆мꙋ блс̑҇венїа и҆ рече и҆мъ·

13

А҆́зъ прилага́юсѧ къ лю́демъ свои҆мъ, погребѣте м̂ѧ съ ѿц҃ы мои́ми въ пеще́рѣ, ꙗ҆́же е҆сть в селѣ е҆фро́новѣ, хетѳеа́нина въ пещерѣ сꙋгꙋ́бѣи прѧмо мам꙽врїи въ землѝ ханаа́ни, ю҆же прикꙋпѝ а҆враам̑ пеще́рꙋ, ѹ҆ е҆фро́на хетѳе́анина на сътворе́нїе гробо́мъ, та́мо погребо́ша а҆враа́ма, и҆ са́ррꙋ женꙋ̀ е҆го. та́мо погребо́ша і҆ и҆саа́ка. и҆ реве́кꙋ женꙋ̀ ег̑҇ и҆ лїю̀ та́може погребо́ша, въ прикꙋпле́нїемъ села̀ и҆ пеще́ры ꙗ҆́же е҆сть въ не́мъ, ѹ҆ сн҃овъ хетѳе́ѻ҆вѣхъ, и҆ ѹ҆молча̀ і҆а́ковъ заповѣ́даѧ сн҃омъ свои҆мъ, и҆ възложѝ і҆а́ковъ но́ѕѣ на ѻ҆дрѣ̀ и҆ ѹ҆́мре, и҆ приложисѧ къ лю́демъ свои҆мъ·