Ostroh Bible❧Книга пророка Ісаї, розділ 10

1

Го́ре пи́шꙋщимъ непра́вдꙋ. пи́шꙋще бо лꙋка́ваѧ пишт̑ꙋ ѹ҆кланѧ́юще сꙋдъ ѹ҆бо́гих̑. и҆ въсхища́юще сꙋдъ ни́щих̑ людїи мои҆хъ. ꙗ҆́коже бꙋдет̑ и҆мъ вдова̀ на въсхище́нїе, и҆ сирота̑ на ѻ҆грабле́нїе. что́ же сътворѧтъ въ дн҃ь присѣще́нїѧ. печа́ль б̂о ва́м꙽ ѿдале́че прїидет̑. и҆ к꙽ комꙋ̀ прибѣ́гнете, да ва́мъ помо́жетъ. гдѣ́ ли ѻ҆ста́вите сла́вꙋ ва́шꙋ, ꙗ҆́ко не въпа́сти въ плѣне́нїе, и҆ под̑ ѹ҆бїеными падꙋтъ. и҆ ѿ всѣхъ сих̑ не ѿврати́сѧ ꙗ҆́рость е҆го, н̂о и҆ е҆ще рꙋка̀ е҆го высо́ка·

2

Го́ре а҆сѷрїемъ, же́злъ ꙗ҆́рости моеѧ, и҆ гнѣвъ е҆сть в рꙋкꙋ и҆хъ. гнѣ́въ мои пꙋщꙋ̀ на странꙋ безако́ннꙋ, и҆ свои҆хъ людїи повелю̀ сътвори́ти плѣнъ и҆ плѣне́нїе. и҆ попра́ти гра́ды, и҆ положи́тї ѧ҆̀ въ прах̑ с̂е же не та́ко помы́слитъ, и҆ дш҃ею не та́ко намени́тъ. н̂и и҆змѣни́тъ ѹ́мъ е҆го, ꙗ҆́коже потреби́ти страны̀ не ма́лы. и҆ а҆ще рꙋкꙋтъ е҆мꙋ, ты́ ли е҆си е҆ді́нъ кнѧ́ѕь, и҆ речет̑. нѣсм꙽ л̂и взѧ́лъ страны̀, ꙗ҆́же вы́ше вавѷло́на, и҆ хала́нъ и҆дѣже сто́лпъ съграже́нъ бѣ. взѧ́лъ е҆смь а҆равїю, и҆ дама́скъ и҆ самарїю. ꙗ҆́коже и҆ сїа взѧх̑ и҆ всѧ страны̀ възмꙋ̀·

3

Въспла́четесѧ и҆зваѧ́нїи въ і҆ерс̑҇лі́мѣ, и҆ въ самарїи, ꙗ҆коже б̂о сътворих̑ самарїи, и҆ рꙋкотворе́ннымъ еѧ̀, та́коже сътворю̀ і҆ерс̑҇лі́мови и҆ кꙋми́ромъ е҆го·

4

И҆ бꙋдетъ е҆гда сконча́етъ г҃ь всѧ̀ тва́ри в горѣ̀ сїѻ́нъ, и҆ въ і҆ерс̑҇лі́мѣ наведе́тъ на смы́слъ вели́каго цр҃ѧ а҆сѷрїиска, и҆ на высотꙋ̀ сла́вы ѻ҆чїю е҆го. рече б̂о, крѣпостїю си́лы моеѧ сътворю̀, и҆ премꙋдростїю ра́зꙋма мое҆го ѿи҆мꙋ̀ предѣ́лы ꙗ҆зы́комъ, и҆ си́лꙋ и҆хъ плѣню̀, и҆ сътрѧсꙋ̀ гра́ды насе́леныѧ. и҆ вселе́ннꙋю всю̀ ѻ҆бои҆мꙋ̀ рꙋко́ю мое҆ю ꙗ҆́ко гнѣздо̀, и҆ ꙗ҆́ко ѻ҆ста́вленыѧ ꙗ҆́ица възмꙋ̀. и҆ не бꙋдет̑ никтоже и҆же ѹ҆бѣжи́тъ менѐ, и҆л̂и ѿвѣща́етъ м̂и съпроти́внѣ·

5

Є҆да просла́витсѧ секи́ра безъ сѣкꙋщаго ею̀, и҆л̂и възнесе́тсѧ пила̀ безъ влача́щаго ю҆̀. та́коже а҆ще кт̂о во́зметъ же́зль и҆л̂и дре́во, и҆ не та́ко. н̂о по́слетъ ѓь саваѻ́ѳъ на твою че́сть безъче́стїе, и҆ въ твое́и сла́вѣ ѻ҆гнь горѧ̀ възгорит̑сѧ. и҆ бꙋдетъ свѣтъ і҆и҆л҃евъ въ ѻ́гнь. и҆ ѻ҆свѣтитъ и҆̀ ѻ҆гне́мъ горѧ́щемъ, и҆ поѧ́сть ꙗ҆́ко сѣ́но ве́щь·

6

Въ то́и дн҃ь ѹ҆га́снꙋтъ го́ры и҆ хо́лми и҆ дꙋбра́вы, и҆ поꙗ҆́сть ѿ дш҃а до пло́ти·

7

И҆ бꙋдетъ бѣжа́и, ꙗ҆́ко бѣжа́нїе ѿ пла́мене горѧ́ща. и҆ ѻ҆ста́вшеи ѿ них̑ бꙋдꙋтъ в число̀, и҆ дѣтищъ впи́шет̑ ѧ҆̀·

8

И҆ бꙋдетъ в то́и дн҃ь, не прило́житсѧ посе́мъ ѻ҆ста́нокъ і҆и҆л҃евъ. и҆ ѹ҆цѣлѣ́вшїи і҆а́ковли, не бꙋдꙋтъ ксемꙋ̀ ѹ҆пова́юще на ѻ҆би́дѣвшаѧ их̑ н̂о бꙋдꙋтъ ѹ҆пова́юще къ б҃ꙋ ст҃омꙋ і҆и҆л҃евꙋ, и҆́стин꙽номꙋ. и҆ бꙋдетъ ѻ҆ста́нокъ і҆а́ковль къ б҃ꙋ крѣ́пкомꙋ·

9

І҆ а́ще бꙋ́дꙋтъ сн҃ове і҆и҆л҃еви ꙗ҆́ко пѣсок̑҇ мор꙽скїи, ѻ҆ста́нокъ и҆хъ сп҃сетсѧ. слово б̂о съврьша́ѧ и҆ съвъкꙋплѧ́ѧ пра́вдою, ꙗ҆́ко сло́во съкраще́но сътвори́тъ г҃ь въ все́и вселе́ннѣи·

10

Сего ради с̂е гл҃етъ г҃ь саваѻ́ѳъ, не бо́итесѧ лю́дїе моѝ ѿ а҆сѷрїи живꙋщеи въ сїѻ́нѣ. ꙗ҆ко жезло́мъ пора́зит̑ т̂ѧ, ꙗ҆звꙋ б̂о наведе́тъ на́ тѧ, ꙗ҆́ко ви́дѣти пꙋть е҆гѷпетьскъ, е҆ще б̂о ма́ло и҆ преста́нетъ гнѣвъ. н̂о ꙗ҆рость моѧ̀ на совѣе и҆хъ·

11

И҆ въста́витъ б҃ъ на́ нѧ ра́нꙋ, ꙗ҆́ко ꙗ҆́звꙋ мадїам̑лю, и҆ ꙗ҆́рость е҆го по пꙋтѝ и҆же по помо́рїю, на пꙋть и҆же въ е҆гѷпетъ·

12

И҆ бꙋ́детъ в то́и дн҃ь. ѿꙗ҆́то бꙋдет̑ вре́мѧ е҆го съ ра́мене твоег̑҇, і҆ и҆́го е҆го ѿ вы́а твое҆ѧ̀, и҆ съгнїет̑ и҆́го ѿ твари е҆ле́а·

13

Прїидет̑ б̂о въ град̑ а҆г꙽га́и, и҆ минет̑ маге́ддаѻ, и҆ в мах̑ма́сѣ поло́житъ сосꙋ́ды своѧ. и҆ минет̑ де́бръ, и҆ прїидетъ въ а҆г꙽га́и. страх̑ прїиметъ ра́ма, гра́дъ саѹ́ловъ пробѣгнетъ дщѝ гали́млѧ, покоритсѧ лаи́са, покори́тсѧ въ е҆нанаѳо́ѳѣ. ѹ҆жасе́сѧ мадеми́на, и҆ живꙋщїи в гѷвинѣ·

14

Ѹ҆тѣшите дн҃есь на пꙋтѝ пребы́ти. ѹ҆тѣшите рꙋко́ю горꙋ̀ дще́рь сїѻ́ню, и҆ хо́лми и҆же въ і҆ерс̑҇лі́мѣ·

15

Сѐ влд̑ка г҃ь саваѻ́ѳъ, смѧтет̑ сла́вныѧ крѣ́постїю, и҆ высо́кїа ѹ҆кори́зною съкрꙋшат̑сѧ, и҆ смирѧт̑сѧ. и҆ падт̑ꙋ высо́цїи мечем̑, дꙋбра́ва же съ высо́кими падет̑сѧ·