Ostroh Bible❧Книга пророка Ісаї, розділ 37

1

И бы́сть внегда̀ слы́ша цр҃ь е҆зекїѧ, растер꙽за̀ ри́зы, и҆ ѻ҆блече́сѧ въ вре́тище, и҆ вни́де въ хра́мъ гн҃ь. и҆ пꙋсти е҆лїаки́ма самчїю, и҆ съмнꙋ̀ кни́гъчїѧ, и҆ ста́рца жре́чески ѻ҆болче́ны въ врѣтища. къ і҆саїи прро̑҇кꙋ сн҃ꙋ а҆мо́совꙋ, и҆ рече е҆мꙋ̀·

2

Се̂ гл҃етъ е҆зекїѧ. дн҃ь печа́ли и҆ ѹ҆кори́зны и҆ ѻ҆бличе́нїѧ и҆ гнѣ́ва въ дне́шнїи дн҃ь. ꙗ҆́ко прїиде бо́лѣзнь ража́ющеи, крѣ́пости же не и҆мꙋщи роди́ти·

3

да ѹ҆слы́шитъ г҃ь б҃ъ твои словеса̀ раѱа́кова, ꙗ҆́же е҆сть пꙋстил̑҇ цр҃ь а҆сѷрїискъ господи́нъ е҆го, ѹ҆корити б҃а жива́го, и҆ ѹ҆кори́ти словесы̀ ꙗ҆́же слы́ша г҃ь б҃ъ твои. и҆ да моли́шисѧ къ гв҃и б҃ꙋ твое҆мꙋ, ѻ҆ ѻ҆ста́вших̑ сих̑·

4

И҆ прїидо́ша ѻ҆́троцы цр҃евы къ і҆саїи. и рече и҆мъ і҆саїа, си́це рцѣте къ господи́нꙋ ва́шемꙋ·

5

Се̂ гл҃етъ г҃ь. не бо́исѧ ѿ слове́съ ꙗ҆́же е҆си слы́шалъ, и҆миже ѹ҆кори́ша м̂ѧ послы̀ цр҃ѧ а҆сѷрїиска·

6

Се̂ а҆зъ вложю̀ во́нь дх҃ъ, и҆ ѹ҆слы́шавъ вѣ́сть възврати́тсѧ на́ землю свою̀, и҆ поразит̑сѧ мече́мъ на свое́и землѝ·

7

И҆ ѻ҆брати́сѧ раѱа́къ, и҆ ѻ҆брѣте цр҃ѧ а҆сѷрїискаго ѻ҆блежа́ща ломна́мъ. и҆ ѹ҆слы́ша цр҃ь а҆сѷрїискъ, ꙗ҆́ко прише́лъ е҆сть ѳарака цр҃ь мѷрскъ вое҆ва́ти на́нь, и҆ ѹ҆слы́шавъ ѻ҆брати́сѧ·

8

И҆ пꙋсти послы̀ къ е҆зекїи гл҃ѧ. си́це рцѣте е҆зекїи цр҃ю жидо́в꙽скꙋ, да не льсти́т꙽ б҃ъ твои тебѐ на негож̑ ѹ҆поваѧ е҆си, гл҃ѧ. ꙗ҆́ко не преда́стьсѧ і҆ерс̑҇лимъ в рꙋ́цѣ цр҃ѧ а҆сѷрїиска. и҆ли нѣ́си слы́шалъ, чт̂о сꙋть сътвори́ли цр҃и а҆сѷрїистїи все́и землѝ, ка́ко погꙋби́ша. е҆да̀ и҆зба́виша страны бо́ѕи их̑, ꙗ҆́же погꙋби́ша ѿт̑ц҃ы мои, гоза́нъ, и҆ харра́нъ, и҆ расемъ, и҆же сꙋть въ стра́нѣ ѳее҆маѳи. гд̂ѣ сꙋть цр҃и е҆маѳови, и҆ а҆рфа́ѳови, и҆ гра́ды е҆сфарꙋма, а҆нагꙋга́нса·

9

И҆ взѧ̀ е҆зекїа кни́ги ѿ посло́въ и҆ прочтѐ ѧ҆̀. и҆ вни́де въ храм̑ гн҃ь, и҆ ѿве́рзе ѧ҆̀ прд̑е гм҃ъ, и҆ помоли́сѧ е҆зекїѧ къ гв҃и гл҃ѧ·

10

Ги҃ саваѻ́ѳе б҃е і҆и҆л҃евъ, сѣдѧ́и на херꙋви́мѣ, т̂ы е҆ді́нъ цр҃ь е҆си всемꙋ̀ цр҃ьствꙋ зе́мномꙋ. т̂ы сътвори нб҃о и҆ зе́млю. приклонѝ г҃и ѹ҆́хо твое, ѹ҆слы́ши г҃и, ѿве́рзи г҃и ѻ҆́чи твоѝ, и҆ при́зри г҃и, и҆ ви́жд̑ь, и҆ слы́ши всѧ̀ словеса̀ ꙗ҆́же пꙋсти́лъ е҆сть сенахерим̑, ѹ҆карѧ́а б҃а жива́го. по и҆́стиннѣ б̂о г҃и, пꙋстꙋ сътвори́ша цр҃и а҆сѷрїистїи всю̀ зе́млю, и҆ стра́ны и҆хъ. и҆ въвръго́ша кꙋми́ры и҆хъ въ ѻ҆́гнь, не бѣша б̂о боѕи, н̂о дѣло рꙋ́къ чл҃чь, дре́во, ка́менїе, и҆ погꙋби́ша ѧ҆̀·

11

Ты же г҃и б҃е нашъ сп҃сы н̂ы ѿ рꙋ́кꙋ и҆хъ, да ѹ҆вѣдѧтъ вс̂ѧ црс̑҇твїѧ зе́мнаѧ, ꙗ҆́ко т̂ы е҆си г҃ь б҃ъ е҆ді́нъ·

12

И҆ пꙋсти́сѧ і҆саїа сн҃ъ а҆мо́совъ къ е҆зекїи, и҆ рече е҆мꙋ·

13

Се̂ гл҃етъ г҃ь б҃ъ і҆и҆л҃евъ, слы́шахъ е҆же моли́сѧ къ мнѣ̀ ѻ҆ сенахери́мѣ цр҃и а҆сѷрїисти·

14

Се̂ сло́во е҆же гл҃а ѻ҆ немъ б҃ъ, похꙋлѝ т̂ѧ и҆ порꙋга́сѧ тебѣ дв҃це дщи сїѻ́нѧ, на тѧ главо́ю покива дщи і҆ерс̑҇лимлѧ. кого ѹ҆кори и҆ разгнѣ́ва, и҆ли к꙽ комꙋ̀ прострѐ гла́съ свои, и҆ не въздви́же на высотꙋ̀ ѻ҆́чїю свое҆ю къ ст҃мꙋ і҆и҆л҃вꙋ ꙗ҆́ко посла́ми ѹ҆кори г҃а. т̂ы бо рече, мно́жествомъ ѻ҆рꙋж́їѧ а҆зъ възыидох̑ на высотꙋ го́ръ, и҆ напослѣ́докъ дꙋбра́вы, и҆ посѣко́хъ высотꙋ̀ е҆ѧ̀, и҆ добротꙋ кѷпари́совꙋ. и҆ внидо́хъ въ высотꙋ ча́сти дꙋбрав꙽ски, и҆ положи́хъ мо́стъ, і҆ и҆скази́хъ во́ды, и҆ весь събо́ръ вод̑ныи·

15

Не слы́шала ли е҆си ѹ҆бо и҆спе́рва, е҆же а҆зъ сътвори́хъ ѿ первыхъ дне́и ѻ҆бѣщахъ. нн҃ѣ же ѹ҆каза́хъ расы́пати страны въ твердынѧхъ и҆хъ. и҆ живꙋщаѧ въ твердыхъ гра́дѣхъ, и҆ѻ҆брати́хъ рꙋ́цы і҆ и҆схо́ша, и҆ бы́ша сꙋси а҆ки сѣ́но на клѣтехъ, и҆ а҆ки тро́скотъ·

16

нн҃ѣ же поко́и твои, і҆ и҆сход̑ твои, и҆ вход̑ твои, а҆зъ съвѣдѣ, и҆ ꙗ҆́рость твою е҆ю́же разгнѣ́васѧ. и҆ гнѣвъ твои взы́иде къ мнѣ̀, и҆ вложꙋ прито́къ в но́здри твоѧ̀, и҆ ѹ҆здꙋ въ ѹ҆ста̀ твоѧ̀, и҆ възвращꙋ т̂ѧ пꙋтемъ и҆́мже е҆си прише́лъ·

17

Се же тебѣ̀ зна́менїе, ꙗ҆́ждь сего лѣта е҆же е҆си всѣ́ѧлъ, а҆ во второ́е лѣто е҆же ѿ себе растет̑, а҆ въ тре́тее насѣѧ́вше пожнете. и҆ насади́те виногра́ды, и҆ снѣ́сте пло́ды и҆хъ. и҆ бꙋдꙋтъ ѻ҆ста́вшеи въ і҆ѹ҆де́и, прони́кнꙋтъ ко́ренїѧ до́лꙋ, и҆ сътворѧтъ съверхꙋ пло́дъ. ꙗ҆́ко ѿ і҆ерс̑҇лима бꙋдꙋт꙽ ѻ҆ста́вленїи, ѿ горы̀ сїѻ́нѧ. рве́нїе г҃а саваѻ́ѳа сътвори́тъ с̂е·

18

Сего рад̑и̑ си́це гл҃етъ г҃ь, на цр҃ѧ а҆сѷрїиска, не вни́детъ в сїи градъ, ни въстрѣлитъ вонь стрѣлы̀, ни възло́жит꙽ нань щи́та, ни ѻ҆гради́тъ ѻ҆́крс̑҇тъ е҆го ѻ҆гражденїѧ. н̂о пꙋтемъ им̑же е҆сть прише́лъ, тѣмже сѧ ѻ҆братит̑ и҆ въ градъ се́и не вни́дет꙽·

19

Сѐ гл҃ет̑ г҃ь. защищꙋ градъ се́и, ꙗ҆́ко спс̑҇ти е҆го мене ради, и҆ дв҃да раба̀ мое҆го·

20

І҆ и҆зы́иде а҆гг҃лъ гн҃ь, і҆ и҆збѝ ѿ пол̑҇ка а҆сѷрїиска, р҃, и҆ п҃, и҆ пѧ́ть ты́сѧщъ. и҆ въста́вше заѹ́тра ѻ҆брѣтоша всѧ̀ телеса̀ ме́ртва. и҆ ѻ҆брати́всѧ ѿи҆де сенахери́мъ цр҃ь а҆сѷрїискъ, и҆ всели́сѧ в ниневїю. и҆ внегда̀ бы́сть покланѧ́тисѧ е҆мꙋ, в домꙋ̀ несереховѣ бо́гꙋ е҆го. а҆драмеле́хъ и҆ сарасаръ, сн҃ове е҆го ѹ҆би́ша и҆̀ мече́мъ. тїи же ѹ҆бѣжа́ша въ а҆рме́нїю. и҆ црс̑҇твова̀ а҆сорда́нъ сн҃ъ е҆го в него мѣсто·