Ostroh Bible❧Книга пророка Ісаї, розділ 65

1

Ꙗвле́нъ бы́хъ не и́щꙋщимъ менѐ, ѻ҆брѣто́хсѧ не вопраша́ющимъ ѻ҆ мнѣ. реко́хъ с̂е е҆смь, странѣ, и҆же не призва́ша и́мени мое҆го. простро́хъ рꙋцѣ своѝ весь дн҃ь, к лю́демъ не покарѧ́ющимсѧ, и҆ проти́вꙋ гл҃ющемъ. и҆же не ходи́ша пꙋте́мъ и҆́стин꙽нымъ, н̂о въ слѣдъ грѣхъ свои҆хъ·

2

Лю́дїе сїи раз꙽гнѣвающеи пред̑ лицемъ мои҆мъ прс̑҇но, тїи требы кладѧхꙋ въ ѻ҆гра́дѣхъ, и҆ кадѧхꙋ въ чре́пѣхъ бѣсомъ и́хже нѣсть. и҆ въ гро́бѣхъ и҆ в пеще́рахъ лежа́тъ со́нїи ради, и҆же ꙗ҆дѧ́тъ мѧ́са свина́ѧ, и҆ ю́хи требъ, ѻ҆скверне́ни сосꙋди и҆хъ всѝ. и҆же гл҃ютъ, ѿи҆дѝ ѿ менѐ и҆ не прикосни́сѧ мнѣ̀, ꙗ҆́ко чи́стъ е҆смь. сѐ ды́мъ ꙗ҆́рости моеѧ, ѻ́гнь гори́тъ в нем̑ всѧ̀ дн҃и. с̂е пи́шетсѧ предо мно́ю. не ѹ҆мол̑҇чю дон꙽деже ѿда́мъ в нѣдра и҆мъ грѣхѝ и҆хъ, и҆ грѣхѝ ѿц҃ъ их̑, гл҃етъ г҃ь. и҆же кажда́хꙋ на гора́хъ, и҆ на холмх̑ѣ ѹ҆кори́ша мѧ. ѿда́мъ дѣлеса и҆хъ в нѣдра и҆мъ·

3

Та́ко гл҃етъ г҃ь. и҆мже ѻ҆бразомъ ѻбрѣта́етсѧ зер̑҇но на гро́знѣ. и҆ рекꙋт꙽, не погꙋбѝ е҆го, ꙗ҆́ко блс̑҇венїе е҆сть в нем̑. та́ко сътворю̀ слꙋжа́щаго м̂и ра́ди, и҆ не и́мамъ погꙋби́ти сего ради всѣхъ. і҆ и҆зведꙋ е҆же и҆зъ і҆а́кова племѧ̀, і҆ и҆же и҆зъ і҆ѹ́ды. и҆ наслѣдѧтъ горꙋ̀ ст҃ꙋю мою, и҆ причастѧ́тъ и҆збраннїи моѝ и҆ рабѝ моѝ, и҆ вселѧ́тсѧ т̂ꙋ. и҆ бꙋдꙋтъ в꙽ дꙋбра́вѣ ѻ҆гра́ды ста́домъ, и҆ де́брь а҆хор꙽скаѧ въ поко́ище говѧ́дом̑ людїи моих꙽, и҆же в꙽зыска́ша мене·

4

Вы́ же ѻ҆ста́вившеи м̂ѧ, и҆ забы́вшей горꙋ ст҃ꙋю мою. и҆ готоваю҆щеи бѣсом̑ трапе́зꙋ, и҆сполнѧ́юще кꙋми́ромъ растворе́нїѧ. а҆зъ преда́мъ ва́съ въ ѻ҆рꙋжїе, всѝ в̂ы сѣче́нїем̑ падетѐ·

5

Ꙗ҆́ко зва́хъ васъ и҆ не послꙋшасте, гл҃ахъ и҆ преслꙋшасте. и҆ сътвори́сте лꙋка́вое предо мно́ю, и҆ егоже не въсхотѣхъ и҆зво́листе·

6

Сего ради тако гл҃етъ г҃ь. с̂е рабо́тающеи ми наꙗ҆дѧт̑сѧ, вы́ же въза́лчете. с̂е рабо́таю҆щеи ми напїютсѧ, вы́ же въжа́жд̑ете. с̂е работающеи ми възра́дꙋют̑сѧ вы́ же посрамитесѧ. с̂е рабо́тающеи ми възвеселѧ́тсѧ въ весе́лїи срд̑ца, вы́ же възопїете въ бо́лезни срд̑ца ва́шего, и҆ ѿ съкрꙋше́нїѧ дх҃ꙋ въспла́четесѧ. ѻ҆ста́нетъ б̂о и҆́мѧ ва́ше въ насыще́нїе и҆з꙽бра́ннымъ мои҆мъ, ва́съ же и҆збїетъ г҃ь·

7

Рабо́тающим̑ же е҆мꙋ прозове́тсѧ и́мѧ но́во. е҆же блс̑҇витсѧ на землѝ, блс̑҇вѧтъ б̂о б҃а и҆стин꙽на. и҆ кленꙋщеисѧ на землѝ, кленꙋтсѧ бм҃ъ и҆́стин꙽нымъ. забꙋдꙋтъ б̂о печа́ль свою прьвꙋю, и҆ не възы́идетъ и҆мъ на срд̑це·

8

Бꙋ́дет̑ б̂о нб҃о но́во, и҆ землѧ̀ но́ва, и҆ не помѧнꙋтъ прьвыхъ. и҆ не възы́идетъ на срд̑це и҆хъ, н̂о ра́дость и҆ весе́лїе ѻ҆брѧ́щт̑ꙋ на не́и·

9

Ꙗ҆́ко с̂е а҆зъ творю̀ і҆ерс̑҇ли́мꙋ весе́лїе, и҆ лю́демъ мои҆мъ ра́дость. и҆ весе́лїе бꙋдꙋ къ і҆ерс̑҇ли́мꙋ, и҆ възра́дꙋюсѧ ѻ҆ лю́дехъ мои҆хъ. и҆ ксемꙋ не ѹ҆слы́шитсѧ в немъ гла́съ пла́ча, ни гласъ во́плѧ. и҆ не бꙋдет꙽ т̂ꙋ младе́нецъ ни ста́рецъ, и҆же не наплънитъ лѣтъ свои҆хъ, бꙋдет̑ б̂о ю́ныи ста лѣтъ, ѹ҆мира́ѧи же грѣшникъ ста лѣтъ. и҆ про́клѧтъ бꙋдетъ·

10

И҆ съградѧ́тъ домы̀, и҆ вселѧ́тсѧ. и҆ насадѧт̑ виногра́ды, и҆ тїи и҆зъꙗ҆дѧт̑ жита̀ и҆хъ, и҆ не соградѧ́тъ, и҆ни вселѧт̑сѧ. и҆ не наса́дѧтъ, і҆ и҆ни и҆зъꙗ҆дѧ́т꙽·

11

Под ним̑ б̂о дре́ва животнаго бꙋдꙋтъ людїи моих̑ дѣлеса̀, трꙋдъ свои҆хъ ѻ҆бет꙽шат̑. і҆ и҆збра́ннїи моѝ не трꙋдѧтсѧ вот̑ще и҆ не поро́дѧтъ ча́дъ на проклѧ́тїе. ꙗ҆́ко племѧ̀ блс̑҇вено е҆сть бм҃ъ, и҆ внꙋцы и҆хъ с ни́ми бꙋдꙋтъ. и҆ бꙋдетъ преже възва́нїѧ и҆хъ, а҆зъ послꙋшаю и҆хъ. е҆ще гл҃ещемъ и҆м꙽, рекꙋ что е҆сть·

12

Тогда̀ во́лци и҆ а́гньцы напасꙋтсѧ вкꙋпѣ, и҆ ле́въ ꙗ҆́ко во́лъ и҆з꙽зо́блетъ плѣвы. змїѧ̀ зе́млю ꙗ҆́ко хлѣбъ. не вредѧ́тъ ни и҆сказѧт̑ въ горѣ̀ ст҃ѣи моеи, гл҃етъ г҃ь·