Ostroh Bible❧Книга пророка Ісаї, розділ 7

1

И бы́сть въ дн҃и а҆ха́зовы, і҆ѻ҆а҆ѳа́млѧ, сн҃а і҆ѻ҆ѕїина, цр҃ѧ і҆ѹ́дина. взы́иде раі҆си́мъ, цр҃ь а҆ра́мль. и҆ факе́и, сн҃ъ ромелїе́въ, цр҃ь і҆и҆л҃евъ, на і҆ерс̑҇лим꙽, вое҆ва́ти на́нь, и҆ не мого́ша вое҆ва́ти на́нь. и҆ съвѣсти́ша в до́мъ двд҃овъ гл҃ющемъ, съвѣща́лсѧ е҆сть а҆ра́мъ съ е҆фре́мом̑. і҆ ѹ҆жасе́сѧ дш҃а е҆го, и҆ дш҃а людїи е҆го. ꙗ҆́коже в дꙋбра́вѣ дꙋ́бъ вѣтромъ поколѣбле́тсѧ·

2

И҆ рече г҃ь къ і҆са́їи, и҆зыиди въ срѣте́нїе а҆ха́зово т̂ы, и҆ ѻ҆ста́выи и҆а҆сꙋ́въ сн҃ъ твои, къ кꙋпелѣ вы́шнѧго пꙋтѝ села̀ гнаѳе́ѻ҆ва. и҆ рече́ши е҆мꙋ снабди́сѧ и҆ ѹ҆молкнѝ, и҆ не бо́исѧ, и҆ да не ѻ҆слабѣ́ет꙽ дш҃а твоѧ̀ ѿ дво́ю древесꙋ главе́ннꙋю кꙋрѧ́щꙋсѧ. е҆гда б̂о гнѣ́въ ꙗ҆́рости мое҆ѧ̀ бꙋ́детъ па́ки и҆сцѣлю̀. сн҃ъ же а҆ра́мль, и҆ сн҃ъ ромелїевъ, ꙗ҆́ко совѣща́ста совѣтъ зо́лъ ѻ҆ тебѣ гл҃ще·

3

взы́идемъ въ і҆ѹ҆де́ю, и҆ съгл҃авше с ни́ми ѻ҆брати́мъ ѧ҆̀ к себѣ̀, и҆ въцр҃им̑ в ни́хъ сн҃а тавелїева·

4

Се̂ гл҃етъ г҃ь саваѻ́ѳъ. не събꙋ́детсѧ совт̑ѣ се́и, ни ѹ҆ста́витсѧ. н̂о глава̀ а҆ра́мꙋ дама́скъ, а҆ глава̀ дама́скꙋ раа҆сим̑. н̂о е҆ще ше́стьдесѧ́тъ и҆ пѧ́ть лт̑ѣ, ѻ҆скꙋдѣ́етъ црс̑҇тво е҆фре́мово ѿ людїи. глава̀ же е҆фрем́ови сама́ръ, и҆ глава̀ сама́рска сн҃ъ ромелїѻ́въ. и҆ а́ще не вѣ́рꙋете, и҆ не и҆́мате разꙋмѣти·

5

И҆ приложи г҃ь гл҃ати къ а҆ха́зꙋ, рекїи. просѝ себѣ̀ зна́менїѧ ѿ г҃а б҃а твое҆го, въ глꙋбинꙋ и҆ли въ высотꙋ·

6

И҆ рече а҆ха́зъ, не прошꙋ ниже и҆скꙋшꙋ г҃а·

7

И҆ рече і҆са́їа, слы́ши ѹ҆бо до́ме двд҃овъ. е҆да̀ ма́лъ вам̑ е҆сть трꙋ́дъ даѧ́ти чл҃комъ, т̂о ка́ко гв҃и даете трꙋ́дъ·

8

Сего ради да́сть г҃ь самъ зна́менїе вамъ·

9

Се дв҃ца въ чре́вѣ за́́чнетъ, и҆ роди́тъ сн҃ъ, и҆ прозове́ши и҆мѧ е҆мꙋ е҆м꙽манꙋи҆лъ·

10

Ма́сло и҆ ме́дъ снѣ́сть, пре́жде да́же не разꙋмѣ́етъ, и҆ не и҆зво́литъ ѕл̂а, и҆ събере́тъ бл҃гое. занѐ пре́же ѹ҆вѣде́нїа дѣтищꙋ бл҃га и҆ ѕл̂а, ѿи҆детъ ѕло́ба ꙗ҆́ко и҆збра́ти бл҃гое·

11

І҆ и҆збꙋдт̑е землѧ̀ е҆ѧ́же т̂ы бои҆шисѧ ѿ лица сею̀ дво́ю цр҃ю·

12

Но наведе́тъ г҃ь на́ тѧ, и҆ на лю́ди твоа, и҆ на до́мъ ѿц҃а твое҆го дн҃и. и҆же не сꙋть е҆щѐ пришлѝ, ѿ негоже дн҃е ѿи҆метъ е҆фре́ма ѿ і҆ѹ́ды цр҃ь а҆сѷрїиск꙽·

13

И҆ бꙋ́детъ в то́и дн҃ь, позвиждетъ г҃ь мꙋхамъ, и҆же владѣ́ютъ ча́стїю рѣкѝ е҆гѷпет̑скїѧ, и҆ пче́лы ꙗ҆́же е҆сть въ стра́нѣ а҆сѷрїистѣ. и҆ прїидꙋтъ вс̂и и҆ почї́ютъ на гра́динах̑ стра́нъ, и҆ в пеще́рахъ, и҆ въ все́и рас꙽сѣ́линѣ, и҆ въ всѧ́комъ дре́ве·

14

В то́и же дн҃ь побръснетъ г҃ь бри́чемъ вели́комъ, и҆ напое́номъ ѻ҆б꙽ ѻ́нꙋ стра́нꙋ рѣкѝ цр҃ѧ а҆сѷрїиска. главꙋ̀ и҆ вла́сы но́жныѧ, и҆ бра́дꙋ ѻ҆стриже́тъ·

15

И҆ бꙋ́детъ въ то́и дн҃ь, кормѧ́и чл҃къ ю҆́нцꙋ ѿ воло́въ и҆ дв̂ѣ ѻ҆вцы. и҆ бꙋ́детъ ѿ мно́жества мле́чнаго ма́сло и҆ ме́дъ ꙗ҆́сти, всѧ́къ ѻ҆ста́выи на землѝ·

16

И҆ бꙋ́детъ в то́и дн҃ь, всѧ́ко мѣ́сто и҆дѣж́е а҆ще бꙋ́детъ ты́сѧща ло́зъ виногра́да, по ты́сѧщи вѣ́дръ, цѣли́зною бꙋ́дꙋтъ и҆ те́рнїемъ. съ стрела́ми стрѣлѧ́юще вни́дꙋтъ во́нь. ꙗ҆́ко цѣли́зною и҆ те́рнїемъ бꙋдетъ вс̂ѧ землѧ̀·

17

И҆ всѧ́ка гора̀ ѻ҆ре́маѧ въз꙽ѻре́тсѧ, и҆ не на́идетъ та́мо стра́хъ. бꙋдетъ б̂о по цѣли́знѣ и҆ по те́рнїю па́ства ѻ҆вцѝ, и҆ попра́нїе волꙋ́е·