Ostroh Bible❧Книга пророка Єремії, розділ 1

1

Словеса̀ і҆е҆ремїи прро̑҇ка, сн҃а хел̑҇кїева, ѿ сщ҃ен꙽ник꙽ и҆же быша̑ въ а҆наѳотѣ, в꙽ землѝ венїами́новѣ·

2

И҆же бы́сть сло́во гн҃е к немꙋ въ дн҃и ѻ҆сїѧ, сн҃а а҆ммо́нѧ цр҃ѧ і҆ѹ́дина, въ г҃і, лѣто црс̑҇тва е҆го·

3

И҆ бы́сть въ дн҃и і҆ѻ҆а҆ки́ма сн҃а ѻ҆сїина, цр҃ѧ і҆ѹ́дина. даж̑ до сконча́нїѧ а҃і лѣта, седекїѧ цр҃ѧ і҆ѹ́дина. да́же до преселе́нїѧ і҆ерс̑҇лим̑скаго. въ мс̑҇ць, е҃·

4

И҆ бы́сть сло́во гн҃е къ мнѣ̀ рекꙋщи·

5

Пре́же не́же създах̑ т̂ѧ въ чре́вѣ познахъ т̂ѧ, и҆ пре́же не́же и҆зы́идеши ѿ ма́тери с̂и ѻ҆ст҃их̑ т̂ѧ, и҆ прро̑҇ка въ ꙗ҆зы́ки да́хъ т̂ѧ. и҆ реко́хъ, сыи влд̑ко г҃и, с̂е не вѣмъ гл҃ати и҆же ѻ҆́трокъ е҆смь. и҆ реч̑҇ г҃ь къ мнѣ̀, не моѕѝ гл҃ати и҆же ѻ҆́трокъ е҆смь. ꙗ҆́ко на всѧ̀ и҆же послю̀ т̂ѧ и҆де́ши, и҆ всѧ̀ е҆ли́ка же повелю̀ тебѣ̀ гл҃еши. не ѹ҆бо́исѧ ѿ лица̀ их̑, ꙗ҆́ко с тобо́ю е҆смь да и҆зба́влю т̂ѧ, рече г҃ь. и҆ посла̀ г҃ь рꙋкꙋ свою̀ и҆ прикоснꙋсѧ ѹ҆сто́мъ мои҆мъ, и҆ рече къ мнѣ̀. се да́хъ словеса моѧ̀ въ ѹ҆ста̀ твоѧ̀. и҆ се поста́вихъ т̂ѧ дне́сь на ꙗ҆зы́ки и҆ на црс̑҇тва. да и҆стор꙽гнеши и҆ разори́ши, и҆ расточи́ши и҆ раз꙽дрꙋши́ши, и҆ съзида́еши и҆ насади́ши·

6

И҆ бы́сть сло́во гн҃е къ мнѣ̀ рекꙋщи, чт̂о т̂ы ви́диши і҆е҆ремїа·

7

И҆ реко́хъ, же́злъ бдѧ́щь а҆зъ ви́жꙋ. и҆ реч̑҇ г҃ь къ мнѣ̀, бл҃го ви́дѣлъ е҆си, и҆же хощꙋ аз̑ бдѣти на словеси мое҆мъ да сътворю т̂о·

8

И҆ быс̑҇ сло́во гн҃е ко мнѣ в꙽торицею гл҃ѧ, чт̂о т̂ы ви́диши. и҆ реко́хъ, горне́ць кипѧ́щь а҆зъ ви́жꙋ, и҆ лице е҆го ѿ лица̀ сѣвера. и҆ рече г҃ь къ мнѣ̀, ѿ сѣвера ꙗ҆ви́тсѧ лꙋка́во на вх̑сѣ ѻ҆бита́ющих̑ на землѝ. зане с̂е а҆зъ съзовꙋ всѧ̀ племе́на црс̑҇твъ сѣ́верных̑, рече г҃ь. и҆ прїидꙋтъ и҆ поста́витъ е҆дінъ ко́жд̑о престо́лъ свои, въ вхо́дѣхъ вра́том꙽ і҆е҆рлс̑҇мꙋ, и҆ на всѣхъ стѣна́хъ е҆го ѻ҆́крестъ, и҆ на всѣхъ гра́дѣхъ і҆ѹ́диныхъ. и҆ въз꙽гл҃ю сꙋди моѝ с ни́ми на всѧ̀ лꙋка́в꙽ства и҆хъ, и҆же ѻ҆ста́виша м̂ѧ. и҆ пожро́ша бого́мъ чю́ждим꙽ и҆ поклони́шасѧ дѣ́ломъ рꙋ́кꙋ свое҆ю·

9

Ты же препоѧши чре́сла твоѧ и҆ ста́ни, и҆ гл҃и к ним̑ всѧ̀, и҆же а҆зъ заповѣ́даю тебѣ̀. не ѹ҆бо́исѧ ѿ лица̀ и҆хъ, ни б̂о боѧ́тисѧ тебѣ сътворю̀ лица̀ и҆хъ. а҆зъ б̂о да́хъ т̂ѧ дне́сь въ гра́дъ твердъ, и҆ въ сто́лпъ желѣ́зныи, и҆ въ стѣны мѣ́дѧны на все́и землѝ цр҃їи і҆ѹ́динъ, нача́л꙽ницы е҆го и҆ сщ҃енницы, и҆ лю́ди зе́мъстїи, и҆ бранѧ́тсѧ на́ тѧ и҆ не премо́гꙋт꙽. и҆же с тобо́ю а҆зъ е҆смь рече г҃ь, да и҆зба́влю т̂ѧ·