Ostroh Bible❧Книга пророка Єремії, розділ 24

1

Показа мн̂ѣ г҃ь, и҆ с̂е дв̂ѣ ко́шницы полны смоквїи поста́влены пред̑ хра́момъ гн҃им̑. понеже провелъ навходоносо́ръ цр҃ь вавѷло́нъскїи е҆хонїю сн҃а і҆ѻ҆а҆ки́мова цр҃ѧ і҆ѹ́дина и҆ нача́лники е҆го, и҆ златокꙋзньца и҆ затвори́телѧ ѿ і҆ерс̑҇лима, преведе их̑ въ вавѷло́нъ·

2

Ко́шница е҆ді́на смо́кви добры̀ и҆мѣ́ющи ѕѣло, ꙗ҆́ко ѻ҆бы́чаи смо́квемъ бы́ти прьвыхъ вре́менъ. и҆ ко́шница е҆ді́на смокви злы̀ ѕѣло, и҆хже ꙗ҆́сти не можа́хꙋ того ради и҆же бѣхꙋ злѝ·

3

И҆ рече г҃ь къ мнѣ, чт̂о ты̀ ви́диши і҆еремїе. и҆ рекох꙽ смо́кви. смокви бл҃ги, бл҃ги ѕѣло, и҆ ѕлїи ѕлѝ ѕѣло, и҆хже ꙗ҆́сти не можа́хꙋ, сего ради и҆же сꙋть ѕлѝ.

4

И҆ бысть слово гн҃е къ мн̂ѣ рекꙋщи, сїѧ рече г҃ь б҃ъ і҆и҆л҃евъ. ꙗ҆́коже смокви сїѧ бл҃ги, та́ко позна́ю преселе́нїе і҆ѹ́дино, их̑же послах̑ ѿ мѣста сего в꙽ землю халдѣискꙋ въ бл҃го. и҆ поста́влю ѻ́чи моѝ на нихъ на ѹ҆тѣше́нїе, и҆ преведꙋ и҆хъ паки в꙽ зе́млю сїю, и҆ съзи́ждꙋ их̑ и҆ не разорю̀. и҆ насажд̑ꙋ и҆хъ, и҆ не и҆сторгнꙋ. и҆ дамъ и҆м꙽ срд̑це да ѹ҆вѣдѧтъ м̂ѧ ꙗ҆ко а҆зъ е҆смь г҃ь·

5

И҆ бꙋдꙋтъ мн̂ѣ в лю́ди, и҆ а҆зъ бꙋдꙋ и҆мъ въ б҃а. и҆же ѻ҆братѧтсѧ къ мн̂ѣ всѣмъ срд̑цемъ свои҆мъ·

6

И ꙗ҆́коже смо́кви злѣиши и҆хже ꙗ҆сти не можа́хꙋ, сего ради и҆же сꙋть ѕлѝ.

7

Сїѧ ре г҃ь. та́ко да́мъ седекїю цр҃ѧ і҆ѹ́дина, и҆ нача́лники е҆го, и҆ ѻ҆ста́вшихъ ѿ і҆ерс̑҇лима и҆же ѻ҆ста́ша въ градѣ семъ, і҆ и҆же ѻ҆бита́ют꙽ въ землѝ е҆гѷпетъстеи·

8

И҆ дамъ и҆х꙽ въ востꙋжанїе и҆ ѻ҆злобле́нїе, всѣмъ црс̑҇твомъ земнымъ въ поноше́нїе и҆ въ при́тчю, и҆ въ пререка́нїе и҆ въ проклѧ́тїе въ всх̑ѣ мѣстѣхъ, ѿ которых̑ и҆звергох̑ и҆х꙽. и҆ послю на ни́хъ мечь и҆ гладъ и҆ па́гꙋбꙋ, дон̑҇деже и҆стлѧт̑сѧ ѿ землѧ̀ ю҆же дахъ и҆мъ и҆ ѿц҃ем꙽ их̑