Ostroh Bible❧Книга пророка Єремії, розділ 30

1

Сло́во бы́вшее къ і҆е҆ремїи ѿ г҃а гл҃ѧ. та́ко реч̑҇ г҃ь б҃ъ і҆и҆л҃ев̑҇. въпиши всѧ̀ словеса̀ въ кни́ги, ꙗ҆́же въписахъ а҆зъ к тебѣ. ꙗ҆́ко се дн҃їе грѧдт̑ꙋ рече г҃ь, и҆ въз꙽вращꙋ и҆с꙽селе́нїе людїи мои҆хъ і҆и҆л҃ѧ і҆ и҆ѹ́ды, рече г҃ь. и҆ възвращꙋ ѧ҆̀ на́ землю ю́же да́хъ ѿц҃емъ и҆хъ, и҆ съвладꙋть е҆ю·

2

и҆ си словеса ꙗ҆́же гл҃тъ г҃ь ѻ҆ і҆и҆л҃и и҆ ѻ҆ і҆ѹ́дѣ, та́ко рече г҃ь. гласъ стра́шенъ ѹ҆слы́шите, стра́хъ и҆ нѣсть мира. въпраша́ите и҆ ви́дѣте, а҆ще сѧ е҆сть родилъ мꙋжескь полъ. и҆ ѻ҆ стра́сѣ и҆мже и҆мꙋтъ чресла̀ и҆х꙽ сп҃сенїе. и҆мже ви́дѣхъ всего чл҃ка, и҆ рꙋцѣ е҆го на чреслехъ его, и҆з꙽врати́шасѧ лица въ златени́цꙋ. ѽ люте ꙗ҆́ко великъ дн҃ь тои, и҆ нѣсть подо́бна е҆мꙋ. и҆ вре́мѧ тѣсно е҆сть і҆а́ковꙋ, и҆ потомъ сп҃сетсѧ·

3

В то́и дн҃ь рече г҃ь, съкрꙋшꙋ ꙗ҆ре́мъ с вы́ѧ и҆хъ, и҆ ѹ́зы и҆хъ растор꙽꙽гнꙋ. и҆ не послꙋжатъ тїи ктомꙋ чюжд̑имъ, н̂о послꙋжатъ тїи г҃ꙋ б҃ꙋ свое҆мꙋ. и҆ дв҃да цр҃ѧ въста́влю и҆мъ. сего рад̑и̑ т̂ы не бо́исѧ ра́бе мои і҆а́кове гл҃етъ г҃ь, ни ѹ҆страша́исѧ і҆и҆л҃ю. ꙗ҆́ко с̂е а҆зъ и҆зведꙋ т̂ѧ и҆з꙽ землѝ да́лнеѧ, и҆ племѧ твое из̑ земли плѣненїѧ их̑·

4

и҆ въз꙽врати́тсѧ па́ки і҆а́ковъ и҆ почїетъ, и҆ всего добра̀ и҆сполнь бꙋдет̑·

5

и҆ не бꙋдетъ ѹ҆страша́ѧи т̂ѧ. ꙗ҆́ко а҆зъ с тобо́ю е҆смь гл҃етъ г҃ь, сп҃са́аи т̂ѧ. ꙗ҆́ко сътвори́хъ сконча́нїе въ всѣхъ странах̑ в нѧже разсѣах̑ т̂ѧ. тебе же не сътворю въ сконча́нїе, н̂о накажꙋ т̂ѧ в сꙋдꙋ, дабы не бы́лъ ви́дѣнъ себѣ невин꙽ныи. ꙗ҆ко та́ко гл҃ет̑ г҃ь, неи҆сцѣлно съкрꙋше́нїе твое, преѕла̀ ра́на твоѧ. нѣсть сꙋдїѧ сꙋда твое҆го на бо́лѣзнь и҆з꙽врачева́сѧ ползы нѣсть тебѣ. всѝ дрꙋзи твоѝ забы́ша т̂ѧ. ни въпро́сѧтъ т̂ѧ, ꙗ҆́ко ꙗ҆́звою вра́жїею порази́хъ т̂ѧ наказа́нїемъ ѹ҆тверженомъ. мно́жества ради непра́вды твоеѧ ѹ҆мно́жишасѧ грѣси твоѝ. чт̂о въпїеши ѻ҆ съкрꙋше́нїи свое́мъ. неи҆сцѣлна е҆сть бо́лѣзнь твоѧ, мно́жества̑ ради непра́вды твоеѧ, и҆ тве́рдыхъ ради грѣхъ твои҆хъ сътвори́хъ т̂и сїѧ всѧ. того ра́ди всѝ ꙗ҆дꙋщеи тѧ̀ и҆зъе҆дени бꙋдꙋтъ, и҆ всѝ вра́зи твоѝ въ плѣненїе ѿведꙋтсѧ. и҆ погꙋблѧ́ющеи т̂ѧ погꙋбѧтсѧ. и҆ бꙋдꙋтъ разъграблѧ́ющеи т̂ѧ въ раз꙽грабле́нїе. ꙗ҆́ко ѻ҆бѧжꙋ срамъ твои, и҆ ѿ ꙗ҆́звъ твои҆хъ и҆з꙽врачꙋю т̂ѧ рече г҃ь. ꙗ҆́ко и҆зверженꙋ называ́хꙋ тѧ сїѻне, с̂е е҆сть сеи и҆же не имѣ възыска́ющаго е҆го·

6

Та́ко гл҃ет̑ г҃ь, с̂е а҆зъ възвраще́нїе и҆с꙽селе́нїѧ і҆а́ковлѧ, и҆ плѣн꙽ники е҆го поми́лꙋю. и҆ въз꙽гради́тсѧ град̑ въ высотꙋ̀ свою и҆ хра́мъ по чинꙋ̀ е҆го ѹ҆твердитсѧ. і҆ изыидꙋтъ и҆з него поющеи, глас̑҇ и҆гра́ющихъ. и҆ ѹ҆мно́жꙋ ѧ҆̀, и҆ не ѹ҆малѣ́ютъ. и҆ вни́дꙋтъ сн҃ове и҆хъ ꙗ҆́ко и҆ прежде, и҆ свѣдѣнїѧ и҆хъ пред̑ лицемъ мои҆мъ и҆спра́вѧтсѧ. и҆ посѣщꙋ на всѧ̀ стꙋжа́ющаѧ и҆мъ. и҆ бꙋдетъ крѣплѣ́иши е҆го на́ нѧ, и҆ кнѧѕь е҆го и҆з него и҆зы́идетъ. и҆ съберꙋ ѧ҆̀ и҆ ѻ҆братѧт̑сѧ къ мн̂ѣ. кто́ бо е҆сть тои и҆же приложитъ срд̑це свое ѻ҆брати́тисѧ къ мн̂ѣ рече г҃ь·

7

И҆ бꙋдете м̂и в люди, и҆ а́зъ ва́мъ бꙋдꙋ въ б҃а. ꙗ҆́ко гнѣвъ гн҃ь и҆зыиде ꙗ҆́ръ, и҆зыиде гнѣвъ ѻ҆браща́емъ на нечести́выѧ прїидетъ. и҆ не ѿвратит̑сѧ гнѣвъ ꙗ҆́рости гн҃ѧ, дондеже сътворитъ и҆ въста́витъ мышле́нїѧ срд̑ца̑ е҆го. въ послд̑ѣнѧѧ дн҃и позна́ете ѧ҆̀·