Ostroh Bible❧Книга пророка Єремії, розділ 33

1

И бы́сть сло́во гн҃е къ і҆еремїи второе, то́и же бѧ́ше е҆щѐ свѧ́занъ въ ро́вѣ темничнем̑ гл҃ѧ·

2

Та́ко рече г҃ь, творѧ́и зе́млю, и҆ простира́ѧ ю҆̀ ꙗко и҆спра́вити ю҆̀, г҃ь и҆мѧ е҆мꙋ·

3

възопїи къ мнѣ̀ и҆ ѿвѣща́ю ти, и҆ совѣстꙋю тебѣ вели́ко и҆ крѣп꙽ко, е҆гоже нѣси разꙋмѣлъ. ꙗ҆́ко та́ко рече г҃ь б҃ъ і҆и҆л҃евъ ѻ҆ домохъ гра́да сего, и҆ ѻ҆ хра́мѣхъ цр҃ѧ і҆ѹ́дина, растерзаныхъ на ѻ҆стро́гъ и҆ на забра́ла. ꙗ҆кож̑ проти́витисѧ къ халдѣ́емъ, и҆ наполни́ти и҆̀ мр҃твъ чл҃къ, ꙗ҆́же побих̑ въ гнѣ́вѣ мое҆м꙽, и҆ въ ꙗ҆́рости мое́и. и҆ ѿвратих̑ лице свое ѿ них̑, ѻ҆ всх̑ѣ ѕлобах̑ и҆хъ·

4

Се а҆́зъ наведꙋ на нѧ срастенїе, і҆ и҆сцѣленїем̑ из̑врачюю ѧ҆̀. и҆ ꙗ҆влю и҆мъ послꙋшати і҆ и҆зврачю́ю ѧ҆̀, и҆ сътворю и҆мъ ми́ръ и҆ вѣрꙋ. и҆ ѻ҆бращꙋ и҆с꙽селе́нїе і҆ѹ́дино, і҆ и҆с꙽селенїе і҆ерс̑҇ли́мле, и҆ съгражд̑ꙋ ѧ҆̀ ꙗ҆́ко и҆ прежд̑е. и҆ ѻ҆чищꙋ ѧ҆̀ ѿ всѣхъ непра́вдъ и҆хъ ꙗ҆́же съгрѣши́ша ми. и҆ млс̑҇тивъ бꙋдꙋ всм̑ѣ непра́вдамъ их̑, и҆миже ѿстꙋпи́ша ѿ мене, и҆ погордѣша мно́ю. и҆ бꙋдет꙽ въ веселїе и҆ въ хва́лꙋ, и҆ въ величїе всѣмъ лю́демъ землѧ̀. ꙗ҆́же ѹ҆слы́шатъ вс̂ѧ бл҃готы, ꙗ҆́же а҆зъ творю. и҆ ѹ҆боѧт̑сѧ и҆ разгнѣвают̑сѧ ѻ҆ всх̑ѣ бл҃готах̑, и҆ ѻ҆ всем̑ мире, и҆же аз̑ творю им̑·

5

Та́ко рече г҃ь, е҆ще ѹ҆слы́шитсѧ в семъ мѣсте, е҆мꙋже в̂ы гл҃ете, пꙋсто е҆сть ѿ чл҃къ и҆ ѿ скота въ гра́дѣхъ і҆ѹ́динѣхъ, и҆ внѣ і҆ерс̑҇ли́ма ѻ҆пꙋстѣвшихъ, понеже нѣсть чл҃ка н̂и скота. гла́съ веселїѧ, и҆ гла́съ ра́дости. глас̑҇ женѧ́щагосѧ, и҆ гла́съ невѣстенъ·

6

гла́съ гл҃ющих̑ и҆сповѣда́итесѧ гв҃и вседръжи́телю ꙗ҆ко бл҃гъ г҃ь, ꙗ҆́ко в꙽ вѣкъ млс̑҇ть е҆го. и҆ принесꙋтъ да́ры похваленїѧ въ дом̑ гн҃ь, ꙗ҆́ко възвращꙋ вс̂е и҆с꙽селе́нїе землѧ тоѧ̀ по пе́рьвомꙋ, рече г҃ь·

7

Та́ко гл҃етъ г҃ь си́лъ, е҆щѐ бꙋдетъ на се́мъ мѣстѣ пꙋстѣмъ, и҆́мже нѣсть чл҃ка н̂и скота̀, въ всх̑ѣ градх̑ѣ е҆го ѻ҆бителницъ, пастх̑ꙋ поставлѧ́ю҆щь па́ствы, а҆ въ градх̑ѣ горных̑, и҆ въ градх̑ѣ по́льских̑, и҆ въ градх̑ѣ наге́въ, и҆ въ землѝ венїаминѣ, и҆ въ ѻ҆крс̑҇тъныхъ і҆ерс̑҇ли́ма, и҆ въ гра́дѣхъ і҆ѹ́динѣхъ, е҆щѐ поидꙋтъ ѻ҆́вца къ рꙋцѣ чтꙋщаго, гл҃ет г҃ь·

8

Се дн҃їе грѧдт̑ꙋ рече г҃ь, и҆ въставлю сло́во бл҃го, е҆же гл҃ахъ къ домꙋ і҆и҆л҃евꙋ, и҆ къ до́мꙋ і҆ѹ҆динꙋ. въ тѣхъ дн҃ехъ и҆ въ то́и час̑҇, с꙽плоди́тисѧ повелю двд̑вꙋ пло́дꙋ пра́вед̑нꙋ, и҆ сътворитъ сꙋдъ и҆ пра́вдꙋ на землѝ. въ тѣхъ дн҃ехъ спасенъ бꙋ́етъ і҆ѹ́да, і҆и҆л҃ь пребꙋдет̑ въ наде́жди. и҆ с̂е е҆сть и҆мѧ, и҆́мже нарекꙋтъ и҆̀, г҃ь пра́ведныи на́шъ·

9

Та́ко б̂о рече г҃ь, не погибнет̑ ѿ дв҃да мꙋжъ сѣдѧ́и на прс̑҇тлѣ до́мꙋ і҆и҆л҃ева. и҆ ѿ жрецъ и҆ ѿ левѷтовъ не поги́бнет꙽ мꙋжъ ѿ лица мое҆го, приносѧи всесож̑женїе и҆ ѻ҆сщ҃ен꙽наѧ, и҆ побѣднаѧ приношенїѧ по всѧ̀ дн҃и·

10

И҆ бы́сть сло́во гн҃е къ і҆еремїи гл҃ѧ. та́ко гл҃етъ г҃ь, мо́жетъ л̂и прерꙋшитисѧ завѣтъ мо́и съ дн҃емъ, и҆ завѣт꙽ мо́и съ нощїю, е҆же не бы́ти дн҃ю и҆ но́щи въ ча́съ свои. и҆ завѣтъ мо́и бꙋдет꙽ мощѝ прерꙋшитисѧ съ дв҃домъ рабом̑ мои҆м꙽, е҆же не бы́ти ѿ него̀ сн҃ꙋ цр҃ьствꙋ́ющꙋ на прс̑҇тлѣ е҆го, и҆ левѷти и҆ сщ҃ен꙽ници рабѝ моѝ. ꙗ҆́коже сочтены бы́ти не могꙋтъ ѕвѣзды нбс̑҇ныѧ, н̂и и҆змѣренъ бы́ти пѣсок꙽ мор꙽скїи. та́ко ѹ҆мно́жꙋ сѣмѧ раба̀ мое҆го дв҃да, и҆ левѷты слꙋже́бники моа̀·

11

И҆ бы́сть сло́во гн҃е къ мнѣ̀ гл҃ѧ, е҆да̀ не ви́дѣлъ е҆си чт̂о рекоша лю́дїе сїи гл҃юще. дв̂а наро́да их̑же и҆зволи г҃ь завержены сꙋть, и҆ люд̑ми мои́ми погор꙽дѣша. сего ради ꙗ҆́ко да не бꙋдет̑ ктомꙋ народ̑ пред̑ ними·

12

Та́ко рече г҃ь не положихъ л̂и ѹ҆бо завѣта межд̑ꙋ дн҃емъ и҆ но́щїю, и҆ зако́новъ нб҃ꙋ и҆ землѝ. тогда̀ сѣмѧ і҆а́ковле, и҆ двд̑а раба̀ мое҆го ѿвръгꙋ. е҆же не прїѧ́ти ѿ сѣмене е҆го кнѧѕеи сѣмене а҆враам̑лѧ, і҆ и҆а́ковлѧ. ꙗ҆́ко па́ки приведꙋ ѻ҆бращенїе и҆хъ, и҆ поми́лꙋю ѧ҆̀·