Ostroh Bible❧Книга Йова, розділ 13

1

Все с̂е ви́дѣ ѻ҆́ко мое, и҆ слы́ша ѹ҆хо мое, и҆ вѣдѣ е҆ли́коже и҆ в̂ы вѣ́сте·

2

И҆ не неразꙋмв̑҇ѣ е҆смь въ вас̑҇ ника́кожд̑е же. н̂о а҆зъ къ г҃ꙋ мое҆мꙋ воз̑г҃лю, ѻ҆бличю же пред̑ ни́мъ, а҆ще хо́щет̑·

3

Вы̂ же е҆сте вра́чеве неправди́ви, и҆ цѣли́теле злы́хъ, бꙋ́ди же вамъ молъча́ти, и҆ събꙋ́детсѧ вамъ въ премꙋ́дрость·

4

Слы́шите ѻ҆бличе́нїе ѹ҆́стъ мои҆хъ, сꙋдꙋ же ѹ҆стнꙋ моею вънми́те·

5

Коѐ ѹ҆бо пред̑ бм҃ъ лѝ гл҃ите, и҆ пред̑ ним̑ вѣща́ете лꙋка́во. и҆ли сꙋмните́сѧ, в̂ы са́ми сꙋдїѧ бꙋдете, добро б̂о а҆́ще и҆слѣдит̑ вас̑҇. а҆ще б̂о всѐ творѧ́щеи прело́житесѧ ем̑, ничто́же мнѣи ѻ҆бличи́те в̂ы, а҆щеж̑ и҆ та́и лицемъ съѹ҆диви́тесѧ. коѐ ѹ҆бо, не движенїе л̂и е҆го ѹ҆стра́шит̑ ва́съ самѣхъ·

6

Бо́ѧзнь же ѿ него нападетъ на́ вы, ѿи́дет꙽ же велича́нїе ва́ше ра́вно пепелꙋ, тѣло же бер꙽нено. ѹ҆млъчи́те да и҆спо́лнюсѧ и҆ почїю ѿ гнѣ́ва, прїимъ плоти своѧ́ зꙋбы, и҆ дш҃ꙋ же мою положꙋ въ рꙋ́цѣ·

7

А҆ще м̂ѧ и҆́метъ си́лныи понеже и҆ нача, а҆ще же гл҃ю и҆ ѻ҆бличю пред̑ ним̑, и҆ с̂е ми сѧ съблюдетъ на сп҃се́нїе, не внидет̑ б̂о пред̑ ним̑ лесть·

8

Послꙋша́ите гл҃ъ мои҆хъ, възвѣщꙋ б̂о ва́мъ слы́шащем̑. с̂е а҆зъ бли́зь е҆смь сꙋ́да мое҆го, вѣдѣ аз̑ ꙗ҆́ко пра́веденъ ꙗ҆́влю́сѧ·

9

Кт̂о бо̀ е҆сть ѻ҆би́денъ мно́ю, ꙗ҆́ко нн҃ѣ ѹ҆молчю і҆ и҆щезнꙋ. дво́е же м̂и сътвориши, тогда ѿ лица̀ твое҆го не съкры́юсѧ. и҆ рꙋкꙋ ѿ менѐ ѹ҆да́ли, стра́х же тво́и да не ѹ҆жасает̑ м̂ѧ·

10

Посе́м же възовеши, а҆́з же т̂ѧ ѹ҆слы́шꙋ. и҆ли воз꙽гл҃еши, аз̑ же т̂и дам̑ ѿвѣтъ. коли́ки сꙋть грѣхѝ моѝ и҆ безаконїѧ моѧ̀, наѹ҆чи мѧ коѝ сꙋть·

11

Почто̀ та́иши ѿ менѐ, мни́ши же м̂ѧ проти́вна сꙋща тебѣ. или ꙗ҆ко ли́стъ дви́жемъ вѣтромъ бои́шисѧ, и҆ли ꙗ҆́ко вѣтвїю носи́мꙋ вѣтромъ противлѧ́еши ми сѧ·

12

Ꙗ҆́ко писа́лъ е҆си на́ мѧ ѕл̂о, ѻ҆бложил̑҇ же м̂и е҆си ю҆́ностьныѝ грѣхи, положил̑҇ же м̂и е҆си но́гꙋ на възбра́ненїе, съхрани́лъ же м̂и е҆си дѣ́ла вс̂ѧ, в коренїѧ же но́гꙋ мое́ю прїиде. и҆же ѻ҆бет̑ша́етъ ра́вно мѣхꙋ, и҆ли ꙗ҆ко ри́за мо́льми и҆зъꙗ҆де́на·