Ostroh Bible❧Книга Йова, розділ 4

1

Ѿвѣща́ же е҆лиѳа́съ фема́нитинъ гл҃ѧ. е҆гда̀ мно́жицею гл҃ано т̂и бысть въ трꙋдѣхъ. крѣпость же гл҃ъ твои҆хъ кто̀ стерпи́тъ. а҆ще бо ты̀ наѹ҆чилъ е҆си мно́ги, и҆ рꙋцѣ немо́щнаго ѹ҆тѣшилъ е҆си. немо́щныѧ же въздви́глъ е҆си словесы, колѣнома же немо́щныхъ дръзостїю ѻ҆бложи́лъ е҆си. нн҃ѣ же прїиде на́ тѧ бо́лезнь и҆ коснꙋ ти сѧ, тыж̑ потща́сѧ. коѐ ѹ҆бо не страх̑ л̂и твои е҆сть въ безꙋмїе, и҆ наде́жа твоѧ̀ и҆ злоба пꙋти твое҆го. помѧни́ же ѹ҆бо кт̂о чи́стъ сы́и поги́бе, и҆л̂и когда̀ и҆́стиннїи вс̂и и҆с корене поги́боша̑, ꙗ҆́коже видх̑ѣ ѻ҆рꙋщихъ зло́бою, и҆ сѣ́ющїи же ѧ҆̀ печа́ли по́жнт̑ꙋ себѣ̀. ѿ повелѣнїѧ гн҃ѧ поги́бнꙋт꙽. ѿ дх҃а гнѣва е҆го и҆счезнꙋтъ. сила львова, гла́съ же льви́ца, хвале́нїе же змїево ѹ҆гасѐ·

2

Мравїи льва погꙋбѝ, зане же не и҆мѣа́ше бра́шна. лви́чищаж̑ львовы ѻ҆ста́виша дрꙋ́гъ дрꙋга. а҆ще л̂и гл҃ъ кїи и҆́стиненъ б̂ѣ въ словесѣхъ твои҆хъ. никое҆ же ѹ҆бо ѿ сих̑ бы т̂ѧ срѣло ѕло́е. коѐ ѹ҆бо не прїиметъ ли м̂и ѹ҆́хо вла́сти, ѿ него́же стра́хомъ и҆ гла́сомъ но́щнымъ напада́ѧ стра́хъ на чл҃кы. гроза же м̂ѧ срѣте и҆ трепетъ, и҆ ѕѣло ко́сти моа сътрѧсѐ·

3

И҆ дх҃ъ на лице м̂и наи҆де. ѹ҆страшиша же ми сѧ вла́си и҆ плъти, въстах̑ и҆ не разꙋмх̑ѣ. видх̑ѣ и҆ не бѣ̀ ѻ҆бличїѧ пред̑ ѻ҆чима мои́ма, н̂о дх҃ъ и҆ глас̑҇ слы́шах̑. чт̂о б̂о е҆гда̀ чи́стъ бꙋдетъ чл҃къ пред̑ бм҃ъ. и҆л̂и ѿ дѣлъ своихъ бес поро́ка мꙋжъ·

4

А҆ще на рабы̀ своа не вѣрꙋет̑, на а҆гг҃лы своѧ жестоко. чт̂о помы́слилъ на живꙋщих же въ берныхъ хлѣвинах̑, ѿ них̑ же и҆ сами ѿ того же бернїа е҆смы̀. порази и҆хъ ꙗ҆́коже мо́лїе, и҆ ѿ ѹ҆тра да́же до́ вечера ꙗ҆́ко не сꙋть. зане же не мого́ша себѣ помощѝ погибо́ша. дꙋ́нꙋ же ѹ҆бо на нѧ і҆ и҆схоша. погибо́ша зане же не и҆мѣѧхꙋ премꙋдрость·