Ostroh Bible❧Книга пророка Малахії, розділ 1

1

Бг҃осмышле́нїе словесе гн҃ѧ на і҆и҆л҃ѧ в рꙋ́кꙋ а҆гг҃ла е҆го. положи́те с̂е на срд̑цых̑ ваших̑, възлюби́хъ в̂ы гл҃етъ г҃ь. и҆ рѣ́сте, ѻ҆ чемъ възлюбил̑҇ е҆си н̂ы. не брат̑ ли б̂ѣ і҆са́въ і҆а́ковꙋ, гл҃етъ г҃ь, и҆ возлю́бихъ і҆а́кова, а҆ і҆са́ва възненави́дѣхъ. и҆ ѹ҆чиних̑ предѣ́лы е҆го въ и҆щезнове́нїе, и҆ достоѧ́нїе е҆го въ ны́рища пꙋсты́нна. занѐ а҆ще речет̑ и҆дꙋме́ѧ разорихсѧ, и҆ ѻ҆брати́мсѧ и҆ възижд̑емъ ѻ҆пꙋстѣвшаѧ е҆ѧ̀·

2

Си́це гл҃етъ г҃ь вседръжи́тель, сами възи́ждꙋтъ, и҆ а́з꙽ разорю. и҆ нарече́тсѧ и҆мъ предѣ́лъ безако́нїѧ, и҆ лю́дїе на нѧ́же ѻ҆полчит̑сѧ г҃ь до́ вѣка. и҆ ѻ҆чеса ваша ви́дѧт̑, и҆ в̂ы речете, възвели́чисѧ г҃ь превы́ше предѣ́лъ і҆и҆л҃въ·

3

Сн҃ъ сла́витъ ѿц҃а, и҆ ра́бъ г҃а свое҆го ѹ҆бои́тсѧ. т̂о а҆ще ѿц҃ъ е҆смь а҆зъ, т̂о гд̂ѣ сла́ва моѧ. и҆ а́ще г҃ь е҆смь а҆зъ, т̂о гдѣ е҆сть бо́ꙗ҆знь моѧ̀. гл҃етъ г҃ь вседръжи́тель на́ вы сщ҃еннїи ѻ҆злобꙋ́ющеи и҆мѧ мое. и҆ рѣ́сте, ѻ҆ чемъ ѻ҆злоби́хомъ и҆мѧ твое. приносѧ́ще къ ѻ҆лтареви мое҆мꙋ хлѣ́бы скве́рны. и҆ рѣ́сте, ѻ҆ чесо́мъ ѻ҆скверни́хомъ ѧ҆̀. гл҃етсѧ вамъ, трапе́за гн҃ѧ ѹ҆ничиже́на е҆сть, и҆ над̑ложе́наѧ бра́шна ѹ҆ничижи́ли е҆сте. занѐ а҆ще приведете слѣ́по на жрътвꙋ, не ѕло л̂и·

4

и҆ а́ще приведете хро́мо ли недꙋ́жно, т̂о не ѕло л̂и. приведи е҆̀ кн҃ѕю свое҆мꙋ е҆да̀ по́иметъ е҆̀, а҆ще ѻ҆бинет꙽сѧ лица твое҆го, гл҃етъ г҃ь вседръжи́тель·

5

И҆ нн҃ѣ ѻ҆цы́ститесѧ прд̑е лицемъ бг҃а вашего, и҆ моли́тесѧ е҆мꙋ да поми́лꙋетъ в̂ы. в рꙋ́ки ваша бы́ша с̂и, а҆ще ѻ҆бинꙋсѧ ли́ць ваших̑, гл҃етъ г҃ь вседръжи́тель·

6

Занѐ и҆ ѿ васъ затво́рѧтсѧ две́́ри, и҆ не възгнѣтитѐ ѻ҆лтаре́ви мое҆мꙋ тꙋне. нѣсть во́лѧ моѧ въ вас̑҇, гл҃етъ г҃ь вседержи́тель, и҆ жрътвы не прїимꙋ ѿ рꙋ́къ вашихъ. занѐ ѿ восток̑҇ слн҃ца и҆ до за́падъ е҆го и҆мѧ моѐ сла́витсѧ в ꙗ҆зы́цехъ, и҆ на всѧ́комъ мѣ́стѣ ѳемїа́мъ прино́ситсѧ и҆мени мое҆мꙋ и҆ жертва чи́ста. занѐ ве́лїе и҆мѧ мое въ ꙗ҆зы́цехъ, гл҃етъ г҃ь вседержи́тель. вы же скверните е҆̀, гл҃юще, трапе́за гн҃ѧ ѻ҆скверне́на е҆сть, и҆ над̑лага́ющаѧсѧ бра́шна е҆го ѹ҆коре́на бы́ша. и҆ рѣ́сте, с̂и ѿ стра́сти бы́ша. и҆ ѿдꙋнꙋхъ ѧ҆̀, гл҃етъ г҃ь вседержи́тель. и҆ ѹ҆вѣ́си хище́нїѧ и҆ хро́ма и҆ ѕло дѣ́ющасѧ, и приведо́сте ѧ҆̀ на жертвꙋ, н̂о не прїимꙋ и҆хъ ѿ рꙋ́къ вашихъ, гл҃етъ г҃ь вседержи́тель. и҆ проклѧ́тъ и҆же б̂ѣ си́ленъ и҆ б̂ѣ въ ста́дѣ е҆го мꙋжескь по́лъ, и҆ моли́тва е҆го на́нь и҆ жре́тъ растлѣ́вшаѧ гв҃и. занѐ цр҃ь ве́лїи а҆зъ е҆смь, гл҃етъ г҃ь вседержи́тель, і҆ и҆мѧ мое просвѣще́нно въ ꙗ҆зы́цех̑·