Ostroh Bible❧Четверта книга Мойсеєва: Числа, розділ 1

1

И гл҃а г҃ь къ моѷсїю, въ пꙋсты́ни сина́истѣи, въ хра́мѣ свѣдѣ́нїѧ, въ а҃ дн҃ь, мцс̑҇а втора́го, втора́го лѣта, по и҆зъше́ствїи их̑, ѿ землѧ̀ е҆гѷпетьскїѧ·

2

Гл҃ѧ възмѣте съчтенїе всего со́ньма сн҃овъ і҆и҆л҃въ по роже́нїѧх̑ и҆хъ, и҆ по домо́мъ ѻ҆ч҃ьства и҆хъ, и҆ по числꙋ̀ и҆ме́нъ и҆хъ, всѧ́къ мꙋжескъ полъ, по глава́мъ и҆хъ·

3

ѿ дво́юдесѧтѝ лѣт꙽ и҆ вы́ше, и҆ всѧк̑҇ и҆ды́и съ си́лою і҆и҆л҃вою, съглѧда́ти и҆хъ по си́ле и҆хъ, т̂ы, і҆ а҆а҆ро́нъ, съзира́ите и҆хъ·

4

И҆ с ва́ми да бꙋ́дꙋт꙽ по си́ле и҆хъ ко́ждо и҆хъ. кождо по племе́ни, ка́ждого ѿ кн҃ѕеи, по домо́м꙽ ѿч҃ьства да бꙋ́детъ·

5

И҆ сїѧ и҆мена̀ мꙋже́и, и҆же ста́нꙋтъ с ва́ми. ѿ рꙋви́ма, е҆лисꙋръ, сн҃ъ седиѹ҆́ровъ·

6

И҆ ѿ симеѻ́на, салами́иль, сн҃ъ сꙋрисада́и·

7

И҆ ѿ і҆ю́ды, наа҆ссо́нъ, сн҃ъ а҆минада́вль·

8

И ѿ и҆саха́ръ, наѳанаи҆ль, сн҃ъ сога́ровъ·

9

и҆ ѿ заѹ҆ло́на, елиав̑҇, сн҃ъ хело́нь·

10

ѿ сн҃ов꙽ и҆ѻ́сифль и҆ ѿ е҆фрѣмль, е҆лиса́мъ, сн҃ъ семиѹ҆́довъ·

11

И҆ ѿ манасі́ѧ гамалі́илъ, сн҃ъ фадасꙋровъ·

12

и҆ ѿ веньа҆ми́на, а҆вида́нъ, сн҃ъ гедеѻ́нов̑҇·

13

И҆ ѿ да́на а҆хезеръ сн҃ъ а҆м꙽мисадаев̑҇·

14

и҆ ѿ а҆си́ра, фага́и҆лъ, сн҃ъ е҆храновъ·

15

ѿ га́да е҆лиса́фъ, сн҃ъ рагꙋ́иловъ·

16

И҆ ѿ неѳали́ма, а҆хире́и сн҃ъ е҆на́нь·

17

Сїѝ нарече́нїи со́ньма, кн҃ѕи ѿ племе́нъ, по ѿч҃ьства́хъ и҆хъ, ты́сꙋщницы і҆и҆л҃вы сꙋть·

18

И҆ поѧ̀ моѷсїи і҆ а҆а҆ро́нъ мꙋжа сїѧ нарече́ныѧ и҆менемъ·

19

Ве́сь же со́ньм꙽ събра́ша въ а҃ дн҃ь мцс̑҇а, втора́го, втора́го лѣта·

20

И҆ съглѧ́даша ѧ҆̀ по роже́нїѧхъ и҆хъ, и҆ по ѿч҃ьства́хъ и҆хъ, и҆ по числꙋ и҆мени и҆хъ ѿ к҃ лѣтъ и҆ вы́ше, всѧ́къ мꙋжескъ полъ по глава́мъ и҆хъ, ꙗ҆́коже повелѣ г҃ь моѷсїю, съглѧда́ша сїѝ въ пꙋсты́ни сина́истѣи·

21

И҆ бы́ша сн҃ове рꙋви́мли прьве́нца, і҆и҆л҃ва, по роже́нїю и҆хъ, и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆мен̑҇ и҆хъ, и҆ по погла́вїю и҆хъ, всѧ́къ мꙋжескъ полъ ѿ к҃ лѣтъ и҆ вы́ше, всѧ́къ и҆ды́и съ си́лою съглѧда́нїѧ их̑ ѿ племе́ни рꙋви́млѧ·

22

҂м҃, ҂ѕ҃, и҆ е҃, со́тъ·

23

Сн҃овъ же симеѻ́новыхъ, по роже́нїю и҆хъ и҆ по соньмо́мъ и҆хъ, и҆ по домо́мъ ѿч҃ьства их̑, и҆ по числꙋ̀ и҆менъ их̑, и҆ по погла́вїю и҆хъ, всѧ́к꙽ мꙋже́скъ полъ ѿ к҃, лѣт꙽ и҆ вы́ше, всѧ́къ и҆ды́и съ си́лою съглѧда́нїе их̑ ѿ племе́ни симеѻ́нѧ. ҂н҃, ҂ѳ҃, и҆ т҃·

24

Сн҃овъ і҆ю́дины́хъ по роже́нїю и҆хъ, и҆ по соньмо́мъ и҆хъ, и҆ по домом̑ ѿч҃ьства и҆хъ, и҆ по числꙋ̀ и҆ме́нъ их̑, и҆ по погла́вїю и҆хъ, всѧ́къ мꙋжескъ полъ, ѿ к҃ лѣтъ и҆ вы́ше, всѧ́къ и҆ды́и съ си́лою, съглѧда́нїѧ и҆хъ, ѿ племе́ни і҆ю́дина ҂ѻ҃, ҂д҃, и҆ х҃·

25

И҆ ѿ сн҃овъ и҆саха́ровъ, по роже́нїю их̑, и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескъ полъ, ѿ к҃ лѣтъ и҆ вы́ше, всѧ́къ и҆ды́и съ си́лою, съглѧда́нїе и҆хъ ѿ племе́ни и҆саха́рова, ҂н҃, и҆ ҂д҃, и҆ у҃·

26

И҆ ѿ сн҃овъ заѹ҆лонь по роженїю и҆хъ, и҆ по со́ньмомъ и҆х꙽, и҆ по домом̑ ѿч҃ьства их̑ по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескъ полъ, ѿ к҃, лѣт꙽ и҆ вы́ше, всѧ́къ и҆ды́и съ си́лою съглѧда́нїе и҆хъ, ѿ племе́ни заѹ҆ло́нѧ, ҂н҃, и҆ ҂з҃, и҆ у҃·

27

И҆ ѿ сн҃овъ и҆ѻ҆сифль, и҆ сыновъ е҆фрѣмль, по роже́нїю и҆хъ, и҆ по сонмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ всѧ́къ мꙋжескъ полъ, ѿ к҃, лѣт꙽ и҆ вы́ше всѧ́къ и҆ды́и съ си́лою съглѧда́нїе их̑, ѿ племе́нъ е҆фрѣмль, ҂м҃, и҆ е҃ сот̑·

28

И҆ ѿ сн҃овъ манасі́инъ по роже́нїю их̑, и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ всѧ́къ мꙋжескъ пол̑҇ и҆хъ, ѿ к҃, лѣтъ и҆ вы́ше, всѧ́къ и҆ды́и съ си́лою съглѧда́нїе и҆хъ ѿ племе́ни манасі́ина, ҂л҃, и҆ ҂в҃, и҆ с҃·

29

И҆ ѿ сн҃овъ веньа́минъ, по роже́нїю их̑ по соньмо́мъ и҆хъ, по домо́м꙽ ѻ҆ч҃ьства и҆хъ по числꙋ̀ и҆ме́нъ и҆хъ, по погла́вїю̀ и҆хъ, всѧ́къ мꙋжескъ полъ их̑, ѿ к҃ лѣтъ и҆ вы́ше, всѧ́къ и҆ды́и съ си́лою, съглѧда́нїе и҆хъ ѿ племе́ни веньѧ́мина, ҂л҃, и҆ ҂е҃ и҆ у҃·

30

И҆ ѿ сн҃ов꙽ га́довъ по роже́нїю и҆хъ, по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескїи полъ и҆хъ, ѿ к҃, лѣтъ, и҆ вы́шеи, всѧ́къ и҆ды́и съ си́лою съглѧда́нїе и҆хъ ѿ племе́ни га́дова, ҂м҃, ҂е҃, и҆ х҃, и҆ н҃·

31

И҆ ѿ сн҃въ да́новъ по роже́нїю и҆хъ, и҆ по соньмо́мъ и҆хъ, и҆ по домо́мъ ѻ҆ч҃ьства и҆хъ, по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескъ полъ и҆хъ, ѿ к҃ лѣт꙽ и҆ вы́ше, всѧк̑҇ и҆ды́и съ си́лою, съглѧда́нїе и҆хъ, ѿ племе́ни да́нова, ҂ѯ҃, и҆ ҂в҃, и҆ з҃ сот̑·

32

И҆ ѿ сн҃овъ а҆си́ровъ по роженїю и҆хъ, и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, по погла́вїю и҆хъ, всѧ́къ мꙋжескъ полъ и҆хъ ѿ к҃ лѣтъ и҆ вы́ше, всѧк̑҇ и҆ды́и съ си́лою съглѧда́нїе и҆хъ, ѿ племе́ни а҆сі́рова ҂м҃, и҆ ҂а҃, и҆ е҃ сот̑·

33

И҆ ѿ сн҃овъ неѳалимль по роже́нїю и҆хъ и҆ по соньмо́мъ и҆хъ, и҆ по домо́мъ ѿч҃ьства и҆хъ, и҆ по числꙋ̀ и҆ме́нъ и҆хъ, и҆ по погла́вїю и҆хъ, всѧ́къ мꙋжескъ полъ и҆хъ ѿ к҃ лѣтъ и҆ вы́ше, всѧ́к꙽ и҆ды́и съ си́лою съглѧда́нїе и҆хъ, ѿ племе́ни неѳали́млѧ, н҃, и҆ ҂г҃, и҆ у҃·

34

Сїѧ съглѧда́нїѧ е҆же глѧда́ша моѷсїи съ а҆а҆ро́номъ, и҆ кн҃зи і҆и҆л҃вы, в҃і мꙋжїи. мꙋжъ е҆ді́нъ ѿ племе́ни е҆ді́наго, ѿ племе́ни до́мꙋ ѿч҃ьства и҆хъ. и҆ бысть всего съглѧда́нїѧ, сн҃въ і҆и҆л҃въ, съ си́лою и҆хъ, ѿ к҃ лт̑ѣ и҆ вы́ше, всѧ́къ и҆сходѧ́и въполча́тисѧ въ і҆и҆л҃ви, х҃, ты́сꙋщь и҆ ҂г҃, и҆ е҃ со́тъ, и҆ н҃·

35

Леви́ти же ѻтъ племе́ни ѻ҆ч҃ьства и҆хъ, не съглѧда́шасѧ въ сн҃охъ і҆ил҃выхъ·

36

И҆ рече г҃ь къ моѷсїю вѣждь племѧ̀ левгі́ино, да не съглѧда́еши е҆̀, и҆ числа̀ и҆хъ да не прїимеши средѝ сн҃овъ і҆и҆лвъ·

37

Ты́ же приста́ви леви́ты къ хра́мꙋ свѣдѣнїѧ, и҆ къ всѣмъ съсꙋ́домъ е҆го и҆ къ всемꙋ е҆ли́коже е҆сть в не́мъ·

38

да въздви́жꙋтъ сїѝ хра́мъ, и҆ вс̂ѧ съсꙋды е҆го, и҆ да слꙋжатъ в немъ, и҆ ѻ҆крс̑҇тъ хра́ма да сѧ въполча́тъ·

39

И҆ вънегда̀ въздви́гнꙋти хра́мъ, да разрꙋша́тъ леви́ты, и҆ вънегда̀ поста́вити хра́мъ да поста́вѧтъ, а҆ и҆ноплеме́ник̑҇ прикасаѧ́сѧ да ѹ҆́мрет̑·

40

И҆ да въполча́тсѧ сн҃ове і҆и҆л҃вы, мꙋж꙽ въ свое҆мъ чинꙋ̀, и҆ мꙋжъ въ свое҆мъ старѣи́шинъствѣ, съ си́лою свое҆ю·

41

Леви́ти же да сѧ въполча́тъ съпротивъ ѻ҆крс̑҇т꙽ хра́ма свѣдѣ́нїѧ, и҆ да не бꙋ́детъ съгрѣше́нїѧ въ сн҃охъ і҆и҆л҃выхъ, и҆ да снабдѧ́тъ леви́ти са́ми, снабдѣ́нїе хра́ма свѣдѣ́нїѧ·

42

И҆ сътвори́ша сн҃ве і҃и҆л҃вы по всемꙋ̀, е҆ли́коже заповѣда̀ г҃ь моѷсїю, та́ко сътвори́ша·