Ostroh BibleОб'явлення св. Івана Богослова, розділ 22
Шрифт:
Запис:
1
И показа м̂и чи́стꙋ рѣкꙋ, воды̀ живо́тныѧ, свѣтлꙋ ꙗ҆́ко криста́лъ, и҆сходѧ́щꙋ ѿ прс̑҇тла бж҃їа и҆ а҆́гньча. просреди стогны е҆го. и҆ ѻ҆ба полы рѣкы дре́во животное, и҆же творитъ плод̑ дванадесѧте, на кыиждо мс̑҇ць въздаѧ плод̑ свои·
2
И҆ ли́ствїе дре́вꙋ въ и҆сцѣленїе ꙗ҆́зы́комъ. и҆ всѧ́ка а҆наѳе́ма не бꙋдетъ ктомꙋ. и҆ престолъ бж҃їи и҆ а҆́гнечь бꙋ́детъ в нем꙽. и҆ рабы̀ е҆го послꙋжатъ е҆мꙋ, и҆ ѹ҆зрѧт̑ лицѐ е҆го, и҆ і҆мѧ е҆го на челѣхъ и҆хъ·
3
И҆ но́щи не бꙋдетъ тамо, и҆ не потребꙋютъ свѣта ѿ свѣти́лника, ни свѣта слн҃чнаго. ꙗ҆́ко г҃ь б҃ъ просвѣща́етъ ѧ҆̀, и҆ въцр҃ѧтсѧ въ вѣки вѣкомъ·
4
И҆ рече м̂и. с̂и словеса̀ вѣ́рна и҆ і́стинна. и҆ г҃ь, б҃ъ ст҃ыхъ прро̑҇къ посла̀ а҆гг҃ла свое҆го показа́ти рабом̑ своим̑, и҆мже е҆сть быти вскорѣ·
5
Се̂ прїидꙋ ско́ро блаженъ съблюдаѧѝ словеса̀ проро́чества книги сеѧ̀·
6
И҆ а҆́зъ і҆ѻ҆а́нъ видѣхъ сїа и҆ слы́шахъ·
7
И҆ е҆гда слы́шахъ и҆ видѣхъ, падохъ поклони́тисѧ на́ ногꙋ а҆́гг҃лꙋ показꙋ́ющемꙋ м̂и с̂е, и҆ гл҃а м̂и, ви́ждь, н̂и, клевретъ твои ѹ҆бо е҆смь, и҆ братїѧ твоеѧ прро̑҇къ, и҆ съблюда́ющихъ словеса книги сеѧ̀, б҃ꙋ поклони́сѧ·
8
И҆ гл҃а м̂и, не запечатлѣй словесъ пророчествїа книги сеѧ, ꙗ҆́ко времѧ близ̑ е҆сть·
9
ѻ҆бидѧѝ, да ѻ҆бидит̑ е҆щѐ. и҆ скве́рныи, да скве́рнитсѧ е҆щѐ, и҆ пра́ведныи, пра́вдꙋ да творит̑ е҆щѐ·
10
И҆ ст҃ыи, да ст҃и́тсѧ е҆щѐ. и҆ с̂е грѧдꙋ ско́ро, и҆ мзда моѧ̀ съ мно́ю, въздати комꙋж́до по дѣ́ломъ е҆го·
11
А҆зъ е҆смь, а҆лфа и҆ ѡ. нача́ток̑҇ и҆ конецъ первыи и҆ послѣднїи·
12
Блаже́ни творѧ́щеѝ за́повѣди е҆го, да бꙋ́дет꙽ ѻ҆́бласть и҆мъ на́ древо животное, и҆ враты̀ вни́дꙋтъ въ градъ·
13
Внѣ же ѱы҆ и҆ чародѣ́е, и҆ любодѣ́и, и҆ ѹ҆бїица, и҆ і҆долослꙋжители, и҆ всѧкъ любѧѝ и҆ творѧѝ лж̀ꙋ·
14
А҆́зъ і҆с҃ послах̑ а҆гг҃ла мое҆го засвѣдѣтельствовати вамъ сїа̀ въ цр҃квахъ·
15
А҆зъ е҆смь ко́рень и҆ родъ двд̑въ·
16
И҆ звѣзда ѹ҆́тренѧѧ и҆ денни́ца. и҆ дх҃ъ и҆ невѣ́ста гл҃ѧѝ, прїидѝ. и҆ слы́шаѝ да гл҃ет̑, прїидѝ. и҆ жаждаѝ да прїидетъ, и҆ хотѧѝ да прїиметъ во́дꙋ животнꙋю тꙋне. свѣдѣтельствꙋю б̂о всѧкомꙋ слы́шащемꙋ словеса̀ прро̑҇чества кни́ги сеѧ̀. а҆ще кт̂о приложитъ на нихъ, наложитъ б҃ъ на него ꙗ҆́звъ напи́саных̑ въ книзѣ се́й. и҆ а҆ще кт̂о ѿи́метъ словесъ сꙋщихъ прро̑҇чествїа въ кни́зе се́й, ѿи́метъ б҃ъ часть е҆го ѿ кни́ги живо́тныѧ, и҆ ѿ града ст҃го, ꙗ҆же напи́сана въ кни́зѣ се́й·
17
Гл҃етъ свѣдѣтельствꙋѧѝ сїѧ̀, е́й прїидꙋ ско́ро·
18
А҆ми́нь е́й грѧди г҃и і҆с҃е. бл҃годать г҃а на́шего і҆с҃ х҃а съ всѣми ва́ми. а҆ми́нь·
19
Конецъ а҆покали́ѱисꙋ ст҃аго і҆ѻа́нна бг҃осло́ва.
20
И́мать в себѣ, глв̑҇а, к҃в·
Джерела
