Ostroh Bible❧Книга пророка Захарії, розділ 2

1

И възведох̑ ѻ҆́чи моѝ и҆ ви́дѣх꙽. и҆ с̂е мꙋжъ, и҆ въ рꙋцѣ е҆го ѹ҆́же землемѣрно. и҆ рѣхъ к немꙋ, гдѣ̀ грѧдеши т̂ы. и҆ рече къ мнѣ̀, размѣрити і҆ерс̑҇ли́ма, и҆ ви́дѣти т̂о коли́ка широта е҆го е҆сть и҆ коли́ка дол꙽гота. и҆ с̂е а҆гг҃лъ гл҃ѧи въ мнѣ̀ стои́т꙽, і҆ и́нъ а҆гг҃лъ и҆схожда́ше въ стрѣтенїе е҆мꙋ. и҆ рече к немꙋ гл҃ѧ, теци и҆ гл҃и къ ю́ноши ѻ҆́номꙋ, гл҃ѧ, плод̑на всели́тисѧ і҆ерс̑҇ли́мꙋ ѿ мно́жества чл҃чьска и҆ скот̑ и҆же посредѣ е҆го. и҆ а́зъ бꙋдꙋ е҆мꙋ, гл҃етъ г҃ь, стѣна ѻ҆́гнена ѻ҆́крс̑҇тъ, и҆ в꙽ сла́вꙋ бꙋдꙋ посредѣ е҆го. ѿбѣга́ите ѿ лица сѣвера, гл҃етъ г҃ь. зане ѿ четы́рь вѣтръ нбс̑҇ных꙽ съберꙋ в̂ы, гл҃етъ г҃ь. въ сїѻ́нъ воз̑враща́итесѧ живꙋщеи въ дщере вавѷлон꙽стѣ·

2

Зане си́це гл҃етъ г҃ь вседръжитель, въ слд̑ѣ сла́вы посла м̂ѧ на ꙗ҆зы́ки и҆спровръг꙽шаѧ вас̑҇. зане каса́ѧйсѧ ва́съ, ꙗ҆́ко каса́ѧйсѧ въ ѕѣницꙋ ѻ҆́ка свое҆го. зане а҆зъ нанесꙋ рꙋкꙋ мою̀ на́ нѧ, и҆ бꙋдꙋтъ коры́сть и҆спроверг꙽шимъ е҆го. и҆ разꙋмѣ́ете ꙗ҆́ко г҃ь вседръжи́тель посла м̂ѧ·

3

Ѹ҆краша́исѧ и҆ весели́сѧ дщ̂и сїѻ́нѧ, зане а҆зъ прїидꙋ, и҆ вселюсѧ посредѣ тебе, гл҃етъ г҃ь. и҆ прибѣгнꙋтъ ꙗ҆зы́цы мно́ѕи къ г҃ꙋ въ то́и дн҃ь, и҆ бꙋдꙋтъ е҆мꙋ в лю́ди, и҆ вселѧ́тсѧ посредѣ тебе, и҆ разꙋмѣ́еши ꙗ҆́ко г҃ь вседръжи́тель посла м̂ѧ к тебѣ̀. и҆ закононаслѣдитъ г҃ь і҆ѹ́дꙋ ѹ҆ча́стїе е҆го на ст҃ꙋю землю, і҆ и҆зволи́тъ е҆щѐ і҆ерс̑҇ли́мꙋ, да говѣ́етъ всѧ́ка пло́ть ѿ лица гн҃ѧ, ꙗ҆́ко въста̀ и҆зъ ѻ҆бла́къ ст҃ыхъ свои҆хъ·