Книга пророка Єзекіїля, розділ 19Острозька Біблія
Шрифт:
Запис:
Ты́ же возмѝ пла́чь на кн҃ѕѧ і҆и҆л҃евы. и҆ рече́ши к нимъ, мт҃и твоѧ льви́ца, средѣ левъ почѝ, средѣ левъ ѹ҆мно́жи льви́чища своѧ·
И҆ ѿско́чи е҆ді́нъ ѿ льви́чищъ еѧ̀, и҆ бысть ле́въ. и наѹ҆чи́сѧ въсхита́ти въсхита́нїа, и҆ чл҃ки и҆зъꙗ҆́сть. и҆ слы́шаша ѻ҆ немъ страны̀, и҆ ꙗ҆́тъ бысть в꙽ расы́панїи свое҆мъ, и҆ приведоша и҆̀ въ ѹ҆здѣ̀ въ е҆гѷпетъ·
И҆ ви́дѣ ꙗ҆́ко ѿведенъ бысть ѿ неѧ, и погиба́ше бытїе еѧ̀. и҆ поѧ̀ и҆нъ ѡ льви́чищъ свои҆хъ и҆ ле́въ ѹ҆чинѝ и҆̀. и҆ живѧ́ше средѣ ле́въ, левъ бы́сть. и҆ наѹ҆чи́сѧ въсхита́ти въсхище́нїѧ, и҆ чл҃ки и҆зꙗ҆́сть. и҆ пасѧшесѧ в лю́тости свое́и. и҆ гра́ды и҆хъ пꙋсты поста́ви, и҆ погꙋбѝ землю и҆ конець еѧ̀ гла́сомъ рыка́нїѧ е҆го·
И да́сть нань страны ѻ҆́крс̑҇тъ ѿ земль, и҆ пропѧ на́нь мрежа и҆хъ и҆ ꙗ҆тъ быс̑҇. и҆ положи́ша и въ ѹ҆здѣ и҆ в꙽ъ пꙋтѣ, и҆ приведо́ша и҆̀ къ цр҃ю вавѷлон̑҇скꙋ, и҆ въврьгоша и҆̀ в темни́цꙋ. ꙗ҆ко да сѧ не слы́шитъ гла́съ е҆го потомъ в꙽ гора́хъ і҆и҆л҃евахъ·
Ма́ти твоѧ ꙗ҆́ко виногра́дъ, и҆ ꙗ҆́ко цвѣтен̑҇ ши́пчанъ на водѣ в꙽саженъ, и҆ ѿра́сль е҆го бысть ѿ воды̀ мно́ги. и҆ бы́сть е҆мꙋ же́злъ крѣпости въ племени старѣишинъсте, и҆ възнесе́сѧ в꙽ вели́чїи свое҆мъ средѣ ло́зїѧ. и҆ ви́дѣ вели́чество свое въ мно́жествѣ ло́зїа свое҆го·
И҆ ѻ҆бломи́сѧ въ ꙗ҆́рости, и҆ на́ землю поврьженъ бы́сть, и҆ вѣтръ зно́инъ посꙋшѝ ѻ́вощъ е҆го. ѹ҆свѧднꙋша и҆ ѻ҆пꙋстѣша жезли крѣпости е҆го, ѻ́гнь посꙋшѝ и҆̀, ѻ҆гнь потреби и҆̀ въ пꙋсты́ни·
И҆ нн҃ѣ насади́ша и҆̀ на землѝ безъче́стнѣ и҆ без̑во́днѣ. і҆ и҆зы́иде ѻ́гнь ѿ жезла̀ и҆ ѻ́вощевъ е҆го, и҆ поꙗ҆дѐ и҆̀·
И҆ не бꙋдетъ в немъ жезла̀ крѣпости племени хорꙋгве, ꙗ҆кож̑ владѣти им̑. въ прит̑чю пла́чнꙋю е҆сть, и҆ бꙋдет̑ въ пла́чь·
Джерела
