Книга пророка Ісаї, розділ 12❧Острозька Біблія

И речеши в то́и дн҃ь блс̑҇влю т̂ѧ г҃и, и҆мже раз̑гнѣвасѧ на́ мѧ. и҆ ѿвратѝ ꙗ҆́рость свою ѿ мене и҆ поми́лова м̂ѧ·

Се б҃ъ мои сп҃съ мои г҃ь, ѹ҆пова́ѧ бꙋдꙋ к немꙋ, и҆ не ѹ҆бою́сѧ. занѐ сла́ва моѧ и҆ хвала̀ г҃ь, быс̑҇ м̂и на сп҃сенїе·

Почерпѣте во́дꙋ съ весе́лїем꙽, ѿ и҆сточникъ сп҃сенїѧ·

И҆ рече́ши в то́и дн҃ь, хвали́те г҃а, въспо́ите и҆мѧ е҆го. възвѣсти́те въ ꙗ҆зы́цехъ сла́внаѧ е҆го, помина́ите ꙗ҆́ко възнесе́сѧ и҆мѧ е҆го. хвалите и҆́мѧ гн҃е, ꙗ҆́ко высо́каѧ сътворѝ. възвѣсти́те с̂е вс̂е по всеи землѝ·

Весели́тесѧ и҆ ра́дꙋитесѧ живꙋщїи в сїѻ́нѣ, ꙗ҆́ко възнесе́сѧ ст҃ыи і҆и҆л҃въ посреди тебе·