Книга Ісуса Навина, розділ 20Острозька Біблія
Шрифт:
Запис:
И рече г҃ь къ і҆сꙋсꙋ гл҃ѧ, гл҃и сн҃омъ і҆и҆л҃евымъ рекїи. дади́те гра́ды ѹ҆бѣже́нїѧ ꙗ҆́же реко́хъ къ вамъ моѷсиѻ҆мъ·
да ѹ҆бежи́тъ та́мо ѹ҆би́вшїи дш҃ꙋ не вѣ́дѧ, и҆ да бꙋдꙋтъ вамъ гра́ди ѹ҆бѣжища. и҆ да не ѹ҆́мретъ ѹ҆бїица ѿ възыска́ю҆щаго кро́ве, до́ндеже поста́витъ пред꙽ со́нмомъ на сꙋдѣ·
И҆ а́ще кт̂о въбѣгнетъ въ е҆ді́нъ гра̑ сихъ, и҆ да ста́нетъ въ вра́тѣхъ гра́да е҆го і҆ и҆сповѣсть въ ѹ́ши ста́рцем̑ гра́да того̀ словеса̀ своѧ, и҆ прїимꙋтъ е҆го въ гра́дъ къ себѣ̀, и дадѧ́тъ е҆мꙋ мѣсто жити с ни́ми·
И҆ ꙗ҆ко прибѣже въ слѣдъ възыска́ѧ кро́ве е҆го. да не дадꙋтъ ѹ҆би́вшаго въ рꙋцѣ е҆го ꙗ҆ко невѣдыи ѹ҆бивъ бли́жнѧго е҆го, и҆ не ненави́дѧи е҆го ѿ вчера̀ и третїаго дн҃и· и҆ да всели́тсѧ въ то́и град̑ до́н꙽деже ста́нетъ пред̑ лице́мъ сонмища на сꙋдѣ. и҆л̂и до́ндеже ѹ҆́мретъ жрец̑҇ вели́кїи, и҆же бꙋдетъ въ ты́и дн҃и. тогда̀ да сѧ ѻ҆брати́тъ ѹ҆бїица , и҆ прїидетъ въ град̑ свои и҆ въ до́м꙽ свой и҆ въ град̑ ѿню́дꙋже е҆сть и҆збѣглъ там̑ ѿ ѹ҆жики кро́ве·
И҆ ѿлꙋчи́ста на се кеде́съ, въ галиле́и, въ горѣ̀ неѳали́мли·
И҆ сихе́мъ въ горѣ̀ е҆фрм̑ѣли и҆ грд̑а а҆рво́ль. сїи е҆сть хевро́нь въ горѣ̀ і҆ѹ́динѣ·
И҆ ѻ҆бо́нꙋ странꙋ̀ і҆ерихо́на і҆ѻ҆рда́на на восто́къ. даша восо́ръ въ пꙋсты́ни в ра́вни ѿ племе́ни рꙋви́млѧ. и рамо́ѳъ въ галаа́дѣ ѿ племе́ни га́дова. и҆ гаваа́нь въ санити́дѣ ѿ племе́ни манасїина·
Сїи гра́ди и҆збра́ни бы́ша всѣмъ сн҃омъ і҆и҆л҃евымъ·
И прише́лцꙋ прилежа́щꙋ е҆мꙋ въ нихъ, ѹ҆бѣжа́нїе тамо всемꙋ̀ ѹ҆бива́ющемꙋ дш҃ꙋ невѣ́дѧ. да не ѹ҆́мретъ ѿ рꙋкꙋ ѹ҆жи́цѣ кро́ви до́ндеже ста́нет̑ пред̑ со́нмом̑ на сꙋдѣ·
Джерела
