Ostroh BibleПерша книга хронік, розділ 12
Шрифт:
Запис:
1
Тїи же прїидо́ша къ дв҃дꙋ въ сикела́и е҆гда е҆щѐ бѣ́гаше саѹ́ла сн҃а ки́сова, и҆ сїи бѣхꙋ крѣп꙽ча́иши помага́юще і҆ и҆збран꙽нїи бои́цы·
2
Напрѧза́юще лꙋ́къ. и҆ ѻ҆бѣ́ю же рꙋкꙋ пращами ка́менїе мета́юще. и҆ ѹ҆правлѧ́юще стрѣ́лы. и҆ бы́ша ѿ бра́тїи саѹ́ловыхъ, ѿ колѣна венїами́нѧ·
3
Кнѧ́ѕь и҆хъ а҆хїезе́ръ. і҆ и҆ѻ҆а́съ сн҃ъ сама́ѧ, гаваѳи́та, и҆ а҆зїи҆ль. и҆ фали́ѳъ сн҃ове замо́ѳъ. и҆ вараха́и, і҆ и҆ѹ́ѧ и҆ а҆наѳоѳити́съ·
4
Самаи҆а́съ же гаваѻ҆ни́тисъ силнѣ́ишїи посредѣ три́десѧти. и҆ над̑ тридесѧти. і҆е҆ремїѧ і҆ и҆е҆зекиль і҆ и҆ѻ҆а́н꙽на́нъ, і҆ и҆зава́ѳъ гадираѳитис̑҇·
5
И҆ е҆лиѻ҆ѳїи, і҆ и҆е҆римꙋ́ѳъ. и҆ ваа҆лїа, и҆ самарїа, и҆ саѳатїа, арꙋфꙋтис̑҇·
6
И҆л꙽кана, и҆ е҆сїѧ, і҆ и҆е҆лїи́лъ. і҆ и҆е҆зааръ, и҆ е҆зваа́мъ, ѿ кареи́ма·
7
И҆ ѻ҆и́ла, и҆ зава́дїѧ, сн҃ове и҆роа́мъ ѿ хедо́ра·
8
И҆ ѿ гад̑ди прибѣго́ша къ дв҃дꙋ, е҆гда таѧ҆шесѧ въ пꙋсты́ни мꙋ́жїе крѣп꙽ча́иши и҆ бойцы нарочи́ти дер꙽жа́щїи щи́тъ, и҆ ко́пїе. лица же и҆хъ, ꙗ҆́ко лица льво́ва. и҆ ско́ры ꙗ҆́ко ко́зы въ гора́хъ·
9
А҆зе́ръ въ первых̑ а҆в꙽дїѧ вторыи, а҆лїадъ тре́тїи·
10
Мазманъ четве́ртыи, и҆е҆рмїа пѧ́тыи·
11
И҆е҆ѳ꙽фїѧ ше́стыи. е҆лїи́лъ сед̑мы́и·
12
Иѻ҆нанъ, и҃. е҆льзеве́ль, ѳ҃·
13
И҆е҆ремїѧ, і҃. махавенаи, а҃і·
14
Сїи бы́ша ѿ сн҃овъ гадовъ кнѧ́ѕи во́искїе послѣ́днїи и҆ ме́ншїи, ҂р҃. и҆ бо́лши над꙽ ты́сащїю·
15
Сїи сꙋть и҆же преидо́ша і҆ѻ҆рда́нъ мцс̑҇а перваго и҆ се́и напол꙽ненъ, въ всеи си́лѣ е҆го. і҆ и҆згнаша всѣхъ и҆же живѧ́хꙋ в꙽ долх̑ѣ къ въсто́чнѣи странѣ и҆ запад꙽нѣи·
16
Прїидо́ша же ѿ венїами́на и҆ ѿ і҆ѹ́ды на по́мощъ дв҃дꙋ·
17
І҆ и҆з꙽шед̑ дв҃дъ сꙋпроти́въ и҆мъ. и҆ рече и҆мъ, а҆́ще ми́рно прїидо́сте къ мнѣ. да бꙋдет̑ срд̑це моѐ по семꙋ́ же къ вамъ. и҆ а́ще предати м̂ѧ сꙋпоста́томъ мои҆мъ е҆гда и҆́зъ безако́нїѧ в рꙋкахъ мои҆хъ не и́мамъ. да ви́дитъ б҃ъ ѿц҃ъ нашихъ и҆ сꙋ́дитъ·
18
И҆ ѻ҆блече дх҃ъ гн҃ь а҆масїю кнѧ́ѕѧ над̑ тридесѧтїю и҆ реч̑҇. и҆ди дв҃де сн҃ꙋ и҆ес꙽се́ѻ҆въ и҆ лю́дїе твоѝ въ ми́рѣ. ми́ръ тебѣ. и҆ ми́ръ помо́щникомъ твои҆мъ. тебѣ б̂о помага́етъ б҃ъ твои. и҆ въспрїѧ́тъ их̑ дв҃дъ и҆ положи и҆хъ кн҃ѕеи си́лных̑·
19
И҆ па́ки ѿ манасїѧ прибѣго́ша къ дв҃дꙋ, е҆гда и҆дѧ́ше съ и҆ноплеме́н꙽ники на саѹ́ла на́ брань и҆ не помо́же и҆мъ дв҃дъ·
20
Ꙗ҆́ко совѣтова́вше ѻ҆тосла́ша е҆го кнѧ́ѕи и҆ноплеме́нничестїи, гл҃юще. съ глава́ми на́шими ѻ҆братит̑сѧ къ господи́нꙋ свое҆мꙋ саѹ́лꙋ·
21
И҆ е҆гда б̂о възврати́сѧ въ сикела́гъ. прибѣго́ша к немꙋ ѿ манасїѧ, е҆дънай. и҆ ѻ҆зава́ѳъ, и҆ е҆дїи́ль, и҆ михаи́лъ. и҆ ѻ҆сафа́ѳъ и҆ е҆лиѹ҆̀, и҆ сала́ѳи. кн҃ѕи ты́сꙋщникомъ сꙋть ѹ҆ манасїю·
22
Сїи възда́ша по́мощъ дв҃дꙋ на разбо́иничиковъ вс̂и б̂о тїи мꙋжїи крѣпча́иши. и҆ бѣша крѣ́пки нача́лницы въ во́инахъ·
23
Занѐ ко́ждо дн҃и прихожда́хꙋ къ дв҃дꙋ. на пособле́нїе е҆го. да́же сътвори́сѧ ве́лїе съчте́нїе ꙗ҆́ко во́и бж҃їи·
24
Тоже е҆сть съчте́нїе кн҃ѕемъ во́искимъ и҆же прїидо́ша къ дв҃дꙋ въ хевро́нѣ да възвратѧ́тъ црс̑҇тво саѹ́лово к немꙋ по словеси гн҃ю·
25
Сн҃ове і҆ѹ́дини носѧ́щїи щи́тъ и҆ ко́пїе. ҂ѕ҃, и҆ и҃, со́тъ. ѹ҆правле́ны къ ѻполче́нїю. и҆ ѿ сн҃овъ симеѻ́нь мꙋже́и силнѣ́ишихъ къ бра́ни. ҂з҃, и҆ р҃·
26
И҆ ѿ сн҃овъ лев꙽вѷи. ҂д҃. и҆ х҃·
27
І҆ и҆ѻд̑да же кн҃ѕь ѿ колѣ́на аа҆ро́нѧ. и҆ с ни́мъ. ҂г҃, и҆ з҃ со́тъ·
28
И҆ садо́къ ѻ҆́трокъ и҆збра́нъ преспѣва́ющїи, и҆ до́мъ ѿц҃а е҆го кн҃ѕи, к҃в·
29
ѿ сн҃ов꙽ же венїами́нь бра́тїи саѹ́лѧ. ҂г҃. и҆ е҆ще бо́лшїѧ ча́сть их̑ въслѣдова́ше до́мꙋ саѹ́лю·
30
И҆ па́ки ѿ сн҃овъ е҆фрѣмль. ҂к҃, и҆ и҃, со́тъ. крѣпча́и҆ши хра́бростїю мꙋж́и и҆менова́нїи по племе́немъ ѿч҃ествъ и҆хъ·
31
И҆ ѿ по́лꙋ племе́ни манасїи҆на, ҂и҃. кожд̑о по и҆мене́мъ свои҆мъ прїидоша. да поста́вѧтъ цр҃ѧ дв҃да·
32
И҆ ѿ сн҃овъ и҆саха́ръ мꙋж́и ѹ҆че́ни и҆же познава́хꙋ въ времен на размышле́нїю чт̂о сътвори́ти и҆́мать і҆и҆л҃ь. въ нача́ла и҆хъ, с҃, и҆ бра́тїа их̑ с ни́ми·
33
Па́ки ѿ заѹ҆ло́на прїидо́ша къ ѻ҆полче́нїю, бра́ни, съ всѧ́кими ѻ҆рꙋж́їи бра́н꙽ными. ҂н҃. въ по́мощъ дв҃дꙋ не съ пра́зными рꙋка́ми·
34
И҆ ѿ неѳали́ма кн҃ѕе́и, ҂а҃. и҆ с ни́ми ѹ҆чени щит̑цы, и҆ сꙋ́лицами, ҂л҃, и҆ ҂з҃·
35
И҆ ѿ да́на ѹ҆гото́вани къ ѻ҆полченїю. ҂к҃, и҆ ҂и҃ и҆ х҃. и҆ ѿ а҆си́ра сходѧ́щїи помощѝ къ бра́ни. ҂м҃·
36
И҆ съ ѻ́ныѧ страны̀ і҆ѻ҆рда́на ѿ сн҃овъ рꙋви́мовъ и҆ ѿ гад̑довыхъ, и҆ ѿ по́лꙋ племе́ни манасїи҆на. наѹ҆ченїи ѻ҆рꙋж́їи бра́нїи. ҂р҃, и҆ ҂к҃·
37
Всѣ сїи мꙋ́жи бра́ннїи ѹ҆правле́ни къ ѻ҆полче́нїю срд̑цемъ съвръше́номъ. прїидо́ша въ хевро́нъ. да поста́вѧт̑ цр҃ѧ дв҃да над̑ всѣмъ і҆и҆л҃емъ. н̂о и҆ вс̂и про́чїи ѿ і҆и҆л҃ѧ е҆ді́но срд̑це бѧ́хꙋ да цр҃ь бꙋ́детъ дв҃дъ·
38
Бы́ша же т̂ꙋ съ дв҃дом̑ трїе дн҃и. ꙗ҆дꙋще, и҆ пїю́ще. ѹ҆гото́ваша б̂о и҆мъ бра́тїѧ и҆хъ·
39
Но и҆же бли́зъ и҆хъ бѧ́хꙋ до и҆саха́ра. и҆ заѹ҆ло́на и҆ неѳали́ма. принесо́ша и҆мъ хлѣ́бы на ѻ҆́слѣхъ и҆ вельбꙋдѣхъ и҆ м꙽ска́хъ и҆ во́лѣхъ на ꙗ҆де́нїе мꙋкꙋ̀ перевѧсла смо́кви и҆ гро́здїе сꙋхо́е вино, і҆ е҆ле́и. и҆ волы̀ и҆ ѻ́вны. къ всемꙋ̀ мно́жествꙋ. ра́дость б̂о бы́сть въ і҆и҆л҃и·
Джерела
