Ostroh Bible❧Перша книга хронік, розділ 11

1

Собра́ же сѧ ѹ҆бо ве́сь і҆и҃ль къ дв҃дꙋ, въ хевро́нъ гл҃ющи, с̂е ко́сть твоѧ е҆смы̀ и҆ плоть твоа̀·

2

Вчера же и҆ прежде третїѧ́го. е҆гда е҆ще црс̑҇твоваше саѹ́лъ. т̂ы бѣа́ше и҆же и҆зводѧше и҆ въводѧ́ше і҆и҃лѧ. и҆ тебѣ̀ реч̑҇ г҃ь б҃ъ тво́и. т̂ы ѹ҆пасе́ши лю́ди моѧ̀ і҆и҆л҃ѧ. и҆ т̂ы бꙋ́деши кнѧ́ѕь над̑ люд̑ми мои́ми і҆и҃лемъ·

3

И҆ прїидо́ша вс̂и ста́рцы і҆и҃леви къ цр҃ю въ хеврон̑҇. и҆ ѹ҆твръди дв҃дъ с ни́ми миръ пред̑ гм҃ъ. и҆ пома́заша е҆го цр҃емъ надъ і҆и҃лем̑ по словесѝ гн҃ю, ꙗ҆́же гл҃а въ рꙋкꙋ само́ила·

4

І҆ и҆дѐ цр҃ь двд̑ъ и҆ весь і҆и҃ль въ і҆ерс̑҇лим̑. и҆ сїѧ е҆сть е҆в꙽вꙋкъ. гдѣ̀ бѣхꙋ е҆вꙋсе́и жи́тель землѝ. реко́ша же, и҆же ѻ҆бита́ша въ е҆вꙋсѣ къ дв҃дꙋ не вни́деши здѣ̀. и҆ взѧ̀ преди дв҃дъ ѻ҆бъдръжащее҆сѧ сїѻ́на ꙗ҆́же е҆сть град̑ дв҃двъ·

5

Реч̑҇ же дв҃дъ всѧкъ и҆же ѹ҆бїе҆тъ е҆вꙋсеѧ въ прьвыхъ бꙋдетъ кнѧ́ѕь и҆ вое҆во́да. и҆ възы́иде на́нь прежде і҆ѻ҆а́въ сн҃ъ сарꙋ́ие҆въ. и҆ бы́сть кнѧ́ѕемъ. ѻ҆бита́ше же дв҃дъ въ ѻ҆бъдръжа́нїи с̂е. и҆ сего рад̑и̑ и҆менова́нъ е҆сть град̑ двд҃въ·

6

Созда ж̑ град̑ въ ѻ҆́крꙋгъ ѹ҆глꙋбле́нъ да́же до ѻ҆крꙋженїа. і҆ѻ҆а́въ же про́чее гра́да състро́и, и҆ вое҆ва и҆ взѧ̀ гра́дъ·

7

Преспѣва́ше же двд̑ъ і҆дꙋщи и҆ растꙋщи и г҃ь вседръжи́тель б̂ѣ с ним̑·

8

Сїи же кнѧ́ѕи мꙋж́їи си́лныхъ двд҃выхъ, и҆же помага́хꙋ е҆мꙋ да цр҃ь бꙋ́детъ над̑ всѣмъ і҆и҆л҃емъ, по словесѝ гн҃ю ꙗ҆́же гл҃а къ і҆и҆л҃ю·

9

И҆ сїе сочте́нїе крѣпъкимъ двд҃вымъ. и҆сваа́лъ сн҃ъ а҆хама́нъ, нача́лник̑҇ ме́ждꙋ тридесѧти. то́й въздвизаше сꙋлицꙋ свою̀, на три́ста. и҆ поби их̑ е҆ді́нокра́тъ·

10

И҆ по немъ е҆леа҆за́ръ сн҃ъ додаи́ѧ, ѻ҆хахїева, се́й б̂ѣ по́средѣ трех̑ си́лных̑.

11

Се́й бы́сть съ двд҃омъ в꙽ фасадоми́не и҆дѣже и҆ноплеме́ницы събра́ны бы́ша̑ к꙽ мѣ́стꙋ томꙋ на ѻ҆пол̑҇ченїе. и҆ б̂ѣ по́ле страны̀ то́ѧ по́лно ꙗ҆чме́ни. побѣго́ша же лю́дїе ѿ лица̀ и҆ноплемен̑҇ник꙽·

12

Сїи же ста́ша посредѣ по́лѧ, и҆ ѻ҆щити́ша е҆го, і҆ и҆зби́ша и҆ноплеме́нник̑҇ и҆ дасть г҃ь сп҃сенїе ве́лїе лю́дем̑ своим̑·

13

Сїи же трїе ѿ тридесѧ́ти кнѧ́ѕь снїидо́ша къ ка́меню къ дв҃дꙋ въ пеще́рꙋ ѻ҆дол꙽ла́млю. и҆ноплеме́нницыж̑ быша ѻ҆бъстоа́ще в до́лꙋ гигантов̑҇·

14

дв҃дъ же б̂ѣ въ ѻ҆блеже́нїи па́ки. стра́жа же и҆ноплемен̑҇ническа во виѳлее́ме·

15

И҆ въжа́жде дв҃дъ и҆ реч̑҇. ѽ кт̂о да́сть мн̂ѣ во́дꙋ ѿ кла́дѧзѧ и҆же въ виѳлїемѣ и҆же е҆сть въ вра́тх̑ѣ·

16

И҆ трїе тїи прои҆до́ша по́средѣ ѻ҆бъстоа́нїѧ и҆ноплеме́нническа. и҆ почръпъше во́дꙋ ѿ кла́дѧзѧ и҆же въ виѳлїемѣ, и҆же б̂ѣ во вратх̑ѣ. и҆ принесо́ша къ дв҃дꙋ да пїетъ. и҆ не хотѧ́ше дв҃дъ пи́ти е҆ѧ̀ и҆ возлїѧ ю҆̀ гв҃и·

17

И҆ реч̑҇ сохрани́ мѧ г҃и да не сътворю̀ гл҃ъ се́й, а́ще кровь мꙋжїи тх̑ѣ пїю. и҆же въ бѣдѣ дш҃ъ свои҆хъ принесоша ю҆̀. и҆ сїѧ рад̑и̑ ве́щи не хотѣ̀ пи́ти еѧ̀. сїе сътвори́ша трїе крѣп꙽ча́ишїе·

18

А҆ве́са и҆же брат̑ і҆ѻ҆а́вовъ то́й б̂ѣ прьвыи въ трїехъ. и҆ то́й въздвиѕа́ше сꙋ́лицꙋ свою проти́вꙋ, тре́юсо́тъ мꙋж́їи, въ е҆дин̑҇ ча́съ и҆ ѹ҆би и҆х꙽. и҆ то́й б̂ѣ по́средѣ трехъ и҆менитъшїи·

19

ѿ трїехъ ме́ждꙋ двѣма пресла́вныи, бѣ б̂о им̑ нача́лникъ. ѻ҆баче даже къ тремъ прьвымъ не пришелъ·

20

И҆ ванѣѧ сн҃ъ и҆ѻ҆да́евъ мꙋжа крѣ́пкаго и҆же мно́га дѣ́ла сътворѝ ѿ васаи́лѧ то́и ѹ҆бѝ дво́ю, а҆рїи́лево моа́въскихъ. и҆ то́й сни́де и҆ ѹ҆бѝ льва̀ ѹ҆ кла́дѧзѧ въ времѧ снѣ́га·

21

И҆ то́и ѹ҆би мꙋжа е҆гѷптѧнина е҆мꙋже во́зрастъ бѣ̀, е҃, лако́тъ. и҆мѣа́ше сꙋ́лицꙋ е҆гѷптѧнинъ се́й ꙗ҆́ко врати́ло ткꙋщ́ихъ. сни́де ѹ҆бо к немꙋ ванѣѧ съ же́злом̑ и҆ въсхитѝ ра́тище е҆же ношаа́ше въ рꙋцѣ. и҆ ѹ҆бѝ е҆го ра́тищемъ е҆го·

22

Сїе сътворѝ ванѣѧ́ сн҃ъ и҆ѻ҆да́евъ, и҆ б̂ѣ и҆мени́тъ по́средѣ трехъ крѣп꙽ча́ишихъ·

23

Посредѣ тридесѧ́ти пр́ьвыхъ сихъ и҆мени́тшїи. ѻ҆баче къ трои́мъ не прїиде. положи же е҆го дв҃дъ къ ѿч҃ествꙋ е҆го·

24

Па́ки крѣпча́иши мꙋжи въ вои҆нѣ. а҆саи́лъ брат̑ і҆ѻ҆а́въ. и҆ е҆леа́нанъ сн҃ъ додїевъ ѿ виѳлее҆ма·

25

Сам꙽моѳъ а҆д꙽ди́тѧнинъ. хелкїи а҆фело́ни·

26

ѻ҆ре́и сн҃ъ ѿ ки́са ѳекꙋйскїи. и҆ а҆вїезеръ, а҆наѳоѳьскїи·

27

Сохова́и, а҆саѳїи, и҆ли ѻ҆ а҆хо́и, воѻ҆ра́и сн҃ъ нетофаѳїевъ, е҆лїаѳъ сн҃ъ ваи҆на́ковъ, неѻ҆фа́ѳи·

28

И҆ра́и сн҃ъ риваи, ѿ горы̀ венїами́нѧ. вениса́съ сн҃ъ фараѳонїев̑҇·

29

Ѹ҆́рїи, ѿ неа́ли, галъс авїи́лъ и҆же ѿ а҆раве́ѳи·

30

А҆зъмо́ѳъ, а҆рсамїевъ, е҆лиа́ва салавонїевъ, и҆ра́съ гои҆ни, і҆ѻ҆наѳа́нъ сн҃ъ сагїевъ, ѻ҆ра́ри, а҆хикаа́мъ, сн҃ъ саха́ровъ, а҆ра́рїи. зифаа́лъ сн҃ъ соро́въ, а҆фер̑҇, мехꙋра́ѳи, а҆хїа, а҆фелонїи, а҆зра́и ѻ҆марме́ли, ноѻ҆ра́и, сн҃ъ а҆вдїевъ, и҆ѻ҆и́ль, бра́тъ наѳа́новъ, и҆варъ сн҃ъ таи҆е҆въ. сего̀ли́къ а҆м꙽мо́ни, наа҆ра́и, ѿ виро́ѳи, и҆же носилъ ѻ҆рꙋжїе і҆а́вово, сн҃а рꙋи҆е҆ва, и҆расъ, и҆ѳе́ри, гари́ѳъ, ѳерїи, ѹ҆́рїѧ хет꙽ѳе́искїи, ваза́ѳъ, сн҃ъ ѻ҆ѻ҆лїевъ, а҆дина̀, са́ха, рови́мовъ кнѧ́ѕь. и҆ ѹ҆ не́го, л҃, а҆но́нъ сн҃ъ маа҆ха́евъ и҆сафа́тꙋ. фаѳа́ни, ѻ҆зїѧ, а҆сѳаро́ѳе, са́м꙽ма, и҆е҆ѻ́ль. сн҃ы хоѳа́ни а҆рарїи, и҆е҆дїилъ, сн҃ъ самери, і҆ и҆ѻ҆за́е бра́тъ е҆го. ѳоса́и, е҆лїилъ, маѻ҆и҆нъ, и҆а҆ри́ва. и҆ѻ҆соі҆ѧ сн҃ъ е҆го и҆е҆наа́мъ, и҆е҆ѳе́ма, моа҆ви́тъскїи, а҆лїи́лъ, и҆ а҆видъ, и҆ е҆сїи́лъ, месофїѧ·