Ostroh BibleПерша книга хронік, розділ 14
Шрифт:
Запис:
1
Посла же хирам̑ цр҃ь тѷрьскїи послы̀ ко дв҃дꙋ и҆ древа ке́дрова, и҆ ѹ҆модѣ́лникъ стѣнамъ и҆ дре́водѣлѧ. да соѕи́ждт̑ꙋ е҆мꙋ до́мъ·
2
И҆ позна двд̑ъ ꙗ҆́ко ѹ҆крѣпи е҆го г҃ь цр҃емъ над̑ і҆ил҃ем̑·
3
і҆ и҆же въздви́жено е҆сть црс̑҇тво е҆го на лю́ди е҆го і҆и҆л҃ѧ·
4
Поѧ́тъ же дв҃дъ и҆́ныѧ же́ны въ і҆ерс̑҇лимѣ. роди же е҆щѐ сн҃ы и҆ дще́ри·
5
И҆ сїѧ и҆мена и҆хъ, и҆же роди́шасѧ въ і҆ерс̑҇ли́мѣ. самаѹ҆̀ и҆ совавъ и҆ наѳанъ, и҆ соло́монъ. и҆ е҆веа́съ, и҆ е҆лисꙋ, и҆ е҆лифаа́ѳъ·
6
и҆ нафагъ, и҆ е҆лисама, и҆ валїада, и҆ ельфалетъ·
7
Слы́шаша же и҆ноплеме́нницы и҆же пома́занъ бысть дв҃дъ въ цр҃ѧ над̑ всѣмъ і҆ил҃емъ. і҆ и҆зыидо́ша вс̂и и҆ноплеме́нницы да възы́щꙋтъ дв҃да. и҆ е҆гда слы́ша дв҃дъ и҆зы́иде проти́вꙋ и҆хъ·
8
И҆ноплеме́нницы же грѧдꙋщїи разлїѧшасѧ въ ѹ҆до́лъ гига́нтовъ·
9
И҆ въпросѝ дв҃дъ б҃а гл҃ѧ. а҆́ще сни́дꙋ на и҆ноплеме́нники. и҆ а́ще предасѝ их̑ въ рꙋкꙋ мою̀. и҆ реч̑҇ е҆мꙋ б҃ъ, сни́ди и҆ дам̑ и҆хъ въ рꙋ́кꙋ твою·
10
И҆зы́иде въ ваал̑҇фарасїнъ. и҆ пораѕи и҆хъ т̂ꙋ дв҃дъ, и҆ реч̑҇ дв҃дъ раздѣли б҃ъ враги моа̀ под̑ рꙋкꙋ мою̀. ꙗ҆́ко раздѣлѧ́ютсѧ во́ды и҆ сего ради наречено бы́сть и҆́мѧ мѣстꙋ томꙋ̀, раз꙽сѣченїе фараи́ма·
11
И҆ ѻ҆ста́виша т̂ꙋ бо́ги своѧ и҆ноплеме́нницы, и҆хже дв҃дъ повелѣ сожещи, и҆ приложи́ша е҆щѐ и҆ноплеме́нн꙽ицы, и҆ ста́ша е҆щѐ въ ѹ҆до́ли гига́нтовъ·
12
И҆ вопросѝ паки дв҃дъ б҃а, и҆ рече е҆мꙋ б҃ъ не и҆сходи за ни́ми ѿврати́сѧ ѿ них̑ и҆ прїидеши проти́вꙋ и҆мъ ѿ сꙋпротив̑҇ грꙋше́и·
13
Є҆гда же ѹ҆слы́шиши шм̑ꙋ вер꙽сѣхъ грꙋше́и, тогда̀ и҆зы́идеши къ брани. ꙗ҆́ко и҆зы́идетъ б҃ъ предъ тобо́ю да поразитъ пол꙽ки и҆ноплеме́н꙽нически·
14
И҆ сътвори дв҃дъ ꙗ҆ко повелѣ е҆мꙋ б҃ъ. и҆ порази полки филисти́мом̑ ѿ гаваѻ́на даже до гази́ра·
15
И҆ прослави́сѧ и҆́мѧ двд҃во въ всх̑ѣ странах̑, и҆ г҃ь дас̑҇ страх̑ е҆го на всх̑ѣ ꙗ҆зыцх̑ѣ·
Джерела
