Ostroh BibleПерша книга хронік, розділ 15
Шрифт:
Запис:
1
Сътвори́ же себѣ̀ дом̑ въ гра́дѣ двд҃вѣ. и҆ созда̀ мѣсто кїѻ́тꙋ бж҃їю. и҆ сътвори е҆мꙋ жили́ще·
2
Тогда реч̑҇ двд̑ъ. неподобно е҆сть да ѿ всѧ́кого но́ситисѧ кїѻ́тꙋ бж҃їю токмо ѿ левѷтъ, и҆хже и҆збра̀ г҃ь къ ноше́нїю кїѻ́та е҆го, и҆ къ слꙋженїю себѣ даждь въ вѣ́ки·
3
Собра же дв҃дъ весь і҆и҆л҃ь въ і҆ерс̑҇ли́мъ, да внесе́тъсѧ кїѻ́тъ бж҃їи въ мѣсто своѐ ꙗ҆же ѹ҆гото́ва е҆мꙋ·
4
И҆ собра̀ дв҃дъ сн҃овъ а҆а҆ро́новъ левѷты·
5
И҆ ѿ сн҃овъ каа́ѳовъ, ѹ҆рїель нача́лникъ бысть и҆ бра́тїа е҆го, р҃к, и҆ ѿ сн҃овъ мерари́нъ. а҆саїѧ нача́лник̑҇ и҆ бра́тїѧ е҆го, с҃н, и҆ ѿ сн҃ов̑҇ гер꙽соних̑ і҆ѻ҆и҆ль нача́лник̑҇ и҆ бра́тїа е҆го, р҃л·
6
И҆ ѿ сн҃ов̑҇ е҆лисафан̑҇ семе́їѧ нача́лник̑҇ и҆ братїѧ е҆го, с҃·
7
И҆ ѿ сн҃овъ хевромов̑҇. е҆лїиль нача́лникъ, и҆ бра́тїѧ е҆го п҃·
8
И҆ ѿ сн҃овъ ѻ҆зїилевъ, а҆минада́въ, нача́лникъ и҆ бра́тїа е҆го, рв҃і·
9
И҆ призва̀ дв҃дъ садо́ка и҆ а҆вїаѳара сщ҃енницы, и҆ левѷты. ѹ҆рїилѧ, а҆гаі҆анъ и҆ѻ҆и́ль, семеи҆а҆нъ, и҆ е҆лїиль, и҆ а҆минада́ва·
10
И҆ рече к ни́мъ. в̂ы е҆сте нача́лницы ѻби́телемъ левѷт꙽ским̑, ѻ҆ст҃и́тесѧ в̂ы съ бра́тїею ва́шею. и҆ принесете кїѻ́тъ г҃а б҃а і҆и҆л҃ева. на мѣсто и҆же ѹ҆гото́вано е҆сть е҆мꙋ·
11
Ꙗ҆́ко въ прь́вое в̂ы не бѣсте готовы.
12
Раздѣли насъ г҃ь. въ на́съ ꙗ҆́ко не възыскахом̑ е҆го по раз̑сꙋжде́нїю·
13
И҆ ѻ҆ст҃ишасѧ сщ҃ен꙽ницы и҆ левѷти. да внесꙋтъ кїѻ́тъ г҃а б҃а і҆и҆л҃ева·
14
И҆ взѧ́ша сн҃ове левѷтинїе кїѻ́тъ бж҃їи. ꙗ҆́ко повелѣ моѷсїи по словесѝ гн҃ю, по зако́нꙋ раме́ны свои́ми на носи́лахъ·
15
Рече же дв҃дъ нача́лником̑ левѷтомъ. да поста́вѧт̑ ѿ бра́тїи свои҆хъ пѣв꙽цовъ въ ѻ҆рганѣхъ, пѣснехъ мꙋсикїискихъ. Ѱалтырехъ. въ гꙋ́сли. и҆ кѷм꙽валы. да воз꙽гласѧт̑ въ вы́шнихъ глас̑҇ веселїѧ·
16
Поста́виша же левѷти е҆м꙽мана сн҃а и҆ѻ҆и҆лева. и҆ ѿ бра́тїѧ е҆го а҆сафа сн҃а варахїи҆на. и҆ ѿ сн҃въ мера́ри и ѿ бра́тїи их̑, е҆ѳа́на сн҃а кисеѻ́ва·
17
И҆ с ни́ми бра́тїѧ и҆хъ. въ втором̑ чи́нꙋ заха́рїѧ·
18
і҆е҆и҆и́ль, и҆ семерамо́ѳъ. и҆ ѻ҆зїѧ две́рницы·
19
Паки пѣвцы, е҆м꙽манъ, а҆са́ѳъ, и҆ е҆ма́ѳъ. въ кѷм꙽валы мѣдѧны въз꙽глаша́ющи въ слꙋша́нїе·
20
Заха́рїѧ же и҆ ѻ҆зїиль. и҆ семирамоѳ̑҇, е҆і҆и҆ль, и҆ а҆нанїѧ, и҆ е҆лїа́въ. и҆ масїа҆съ, и҆ макенїѧ. съ ѱалъты́рѧми ти́хо гла́сно поѧ́хꙋ·
21
Па́ки маѳаѳїасъ, и҆ е҆лифа́лꙋ, и҆ макенїѧ, и҆ а҆вдедом꙽, і҆ еи҆и҆ль. и҆ ѻ҆зїѧ врат̑ницы, ѱалмопѣ́вци·
22
Є҆манасаф̑҇. и҆ е҆ѳан̑҇, въ кѷм꙽валы мѣ́дѧны да сътвори́т꙽ слы́шано·
23
Заха́рїѧ, и҆ ѻ҆зїиль, и҆ семирамо́ѳъ, и҆ е҆и҆ль, и҆ а҆нани, и҆ е҆лїа́въ, а҆мосїѧ, и҆ ванаїѧ, въ ѱал̑҇тыри, тихо гла́сно·
24
И҆ маѳаѳїѧ е҆лифалеа́съ, и҆ макенїѧ, и҆ а҆вдедом̑, і҆ и҆еи́ль, и҆ ѻ҆зїѧ, в꙽ кини́ры шꙋмѧще под̑тверди́ти·
25
А҆хонїѧ же нача́лник̑҇ левѷтомъ кнѧ́ѕь пѣва́ющихъ слад̑кимъ гла́сом̑, бы́сть б̂о ѕѣ́ло мꙋдръ и҆ варахїѧ, и҆ е҆лка́на, дверницы кїѻ́та·
26
Паки саве́нїѧ, і҆ѻ҆сафатъ и҆ наѳанаи́ль, и҆ а҆масїѧ, и҆ захарїа и҆ вана́и. и҆ е҆лїазаръ сщ҃енницы трꙋбѧхꙋ трꙋба́ми пред̑ кїѻ́томъ бж҃їим̑, и҆ а҆ведо́мъ, і҆ е҆їѧ, бѣхꙋ двер꙽ницы кїѻ́та гн҃ѧ·
27
дв҃дъ же б̂ѣ и҆ вс̂и старѣ́ишїи і҆и҆л҃еви и҆ тысꙋщники. и҆дꙋщїѝ ко вношенїю кїѻ́та завѣта гн҃ѧ, ѿ до́мꙋ, а҆вдонѧ съ веселїем̑·
28
И҆ бысть е҆гда помага́ше б҃ъ левѷтом̑ и҆же ношахꙋ кїѻ́тъ завѣта гн҃ѧ. и҆ жрѧхꙋ, з҃ ю́нецъ. и҆ з҃, ѻ҆́венъ·
29
дв҃дъ же бѧ́ше ѻ҆дѣѧн̑҇ ри́зою синею. и҆ вс̂и левѷти и҆же ношахꙋ кїѻ́тъ завѣта гн҃ѧ. пѣвцы же і҆ и҆ хоненїѧ началникъ пѣ́снеи пою́щихъ. на дв҃дѣ же б̂ѣ е҆фꙋдъ лнѧныи·
30
Весь же і҆и҆л҃ь и҆звожа́хꙋ кїѻ́тъ завѣта гн҃ѧ съ восклицанїмъ и҆ шꙋмомъ ди́вным̑, и҆ трꙋбнымъ. и҆ кѷм꙽валы и҆ въ гꙋсли глаша́ющи·
31
И҆ е҆гда прїиде кїѻ́тъ завѣта гн҃ѧ даже до града дв҃два. и҆ мельхола дщ̂и саѹ́лѧ смотрѧше во ѻ҆кно, и҆ видѣ цр҃ѧ дв҃да скачꙋща і҆ и҆гра́юща. и҆ поноси е҆го въ срд̑ци свое҆мъ·
Джерела
