Ostroh BibleПерша книга хронік, розділ 18
Шрифт:
Запис:
1
Бысть же посе́мъ поразѝ двд̑ъ и҆ноплеме́нники и҆ смирѝ их̑. и҆ взѧ̀ ге́ѳъ и҆ предѣлы е҆го ѿ рꙋкꙋ и҆ноплеме́нникъ·
2
И҆ поразѝ дв҃дъ моа́ва, и҆ бѧ́хꙋ моа҆ви́ти рабѝ дв҃дꙋ приносѧ́ще е҆мꙋ да́нь·
3
И҆ поразѝ дв҃дъ е҆ще а҆драза́ра цр҃ѧ сꙋ́вска страны̀ е҆ма́ѳъ когда про́иде да распространит̑ црс̑҇тво свое даже до рѣки е҆фра́та·
4
И прїѧт̑ ѿ него дв҃дъ ты́сѧщꙋ колесни́цъ. и҆ ҂з҃, ко́н꙽никъ. и҆ ҂к҃, мꙋже́и пѣшецъ. и҆ разбѝ дв҃дъ вс̂ѧ колесница ѻ҆ста́ви же ѿ ни́хъ. р҃, колесни́цъ, и҆хъже въздержа̀ себѣ·
5
И҆ прїиде а҆сѷръ ѿ дама́ска да по́мощъ въздас̑҇ а҆драза́рю цр҃ю сꙋ́вскꙋ. и҆ поразѝ двд̑ъ и҆ сѷровыхъ, ҂к҃, и҆ ҂в҃, мꙋжъ·
6
И҆ постави тысѧщ꙽ники въ сѷрїи и҆же бли́зꙋ дама́скꙋ, и҆ бѧхꙋ дв҃дꙋ въ рабы̀ приносѧ́ще да́ни, и҆ помо́же дв҃дꙋ г҃ь въ всѣхъ на не́же и҆зы́иде·
7
Прїѧ́т же дв҃дъ тꙋ́лы златы и҆же и҆мѣша рабѝ а҆драза́ровы, и҆ принесѐ ѧ҆̀ въ і҆ерс̑҇ли́мъ·
8
Та́коже ѿ метавеѳ̑҇ і҆ и҆збра́нныхъ гра́довъ а҆драза́ровых꙽ мѣ́ди множество в꙽зѧ̀, и҆з неѧ́же сътворѝ соло́монъ мо́ре мѣ́дѧно, и҆ столпы̀ и҆ съсꙋды мѣденыѧ·
9
Є҆гда слы́ша ѳеѹ́и цр҃ь е҆ма́ѳъскїи ꙗ҆ко поразѝ дв҃дъ вс̂ѧ во́и а҆драза́ра цр҃ѧ сꙋ́вска·
10
И҆ посла̀ а҆дꙋра́ма сн҃а свое҆го къ цр҃ꙋ дв҃дꙋ, да въпро́ситъ ꙗ҆же ѻ҆ ми́рѣ, и҆ блс̑҇вити е҆го, сего рад̑и̑ ꙗ҆же сътворѝ а҆драза́рю и҆ поразѝ е҆го. сꙋпроти́вникъ бо бысть ѳеѹ́и а҆драза́рь. и҆ принесѐ вс̂ѧ сосꙋды зла́тыа и҆ сре́бреныѧ и҆ мѣ́дѧныѧ и҆ ѻ҆ст҃и ѧ҆̀ дв҃дъ цр҃ь г҃ꙋ съ сребро́мъ и҆ зла́томъ ꙗ҆́же взѧ̀ ѿ всѣхъ ꙗ҆зы́къ, ѿ и҆дꙋме́ѧ и҆ моа́ва, и҆ сн҃овъ а҆м꙽мо́нь и҆ ѿ и҆ноплеме́нник̑҇ и҆ а҆мм꙽али́ка·
11
А҆ви́сай же сн҃ъ сарꙋ́ие҆въ поразѝ и҆дꙋме́ѧне въ ѹ҆долѣ и҆ноплеме́нникъ, ҂и҃і·
12
И҆ поста́ви въ е҆до́мѣ нача́лники въево́ды и҆ бѣша вс̂и и҆дꙋме́ѧне рабѝ дв҃дꙋ. и҆ сп҃се г҃ь дв҃да въ в꙽сѣхъ нанеж̑ и҆зы́иде·
13
Црс̑҇твова́ же дв҃дъ над̑ всм̑ѣ і҆и҆л҃емъ. и҆ бѣ творѧ̀ сꙋдъ и҆ пра́вдꙋ в꙽сѣмъ лю́демъ свои҆мъ·
14
И҆ѻ҆а́в же сн҃ъ сарꙋ́ие҆въ бы́сть над̑ во́и. і҆ и҆ѻ҆сафа́тъ сн҃ъ а҆л꙽хилꙋ́довъ паметопи́сца·
15
И҆ садокъ же сн҃ъ а҆хи́товъ и҆ а҆вимеле́хъ сн҃ъ а҆вїа҆ѳа́рь сщ҃ен꙽ницы і҆ сꙋса книгочїй·
16
И҆ ванѣѧ же сн҃ъ і҆ѻ҆да́евъ, над̑ копѣйниками, и҆ надъ стрелца́ми. сн҃ове же двд҃вы прь́вїи ѿ рꙋкꙋ цр҃ѧ·
Джерела
