Ostroh Bible❧Перша книга хронік, розділ 17

1

Єгда́ же ѻ҆бита́ше дв҃дъ въ домꙋ̀ свое҆мъ, рече къ наѳа́нꙋ про̑҇ркꙋ, сѐ а҆зъ живꙋ̀ в домꙋ̀ ке́дровѣ. кїѻ́тъ же завѣта гн҃ѧ подъ ко́жами е҆́сть·

2

И҆ рече наѳа́нъ къ дв҃дꙋ. вс̂ѧ и҆же сꙋть въ срд̑ци твое҆мъ сътворѝ, г҃ь б̂о с тобо́ю е҆сть·

3

Сего ра́ди но́щи тоѧ̀ бы́сть сло́во гн҃е къ наѳа́нꙋ гл҃ющи·

4

Поидѝ и҆ гл҃и дв҃дꙋ рабꙋ̀ мое҆мꙋ, сїѧ рече г҃ь. не съѕи́ждеши т̂ы мн̂ѣ до́мꙋ на ѻ҆бита́нїе·

5

Не пребы́хъ б̂о в домꙋ̀ ѿ того̀ вре́мени въ не́же и҆зведо́хъ і҆и҆л҃ѧ ѿ землѧ̀ е҆гѷпет꙽скїѧ даже до дн҃е сего̀. н̂о бы́хъ всегда̀ премѣнѧ́ющи мѣ́ста жили́щъ. и҆ в꙽ шатрѣхъ пребыва́ю҆щи·

6

І҆ и҆дѣже ходи́хъ съ всѣмъ і҆и҆л҃емъ. а҆ще гл҃ахъ кое҆мꙋ̀ сꙋдїѝ колѣнꙋ і҆и҆л҃евꙋ и҆́мже повелѣхъ. да пасꙋтъ лю́ды моѧ̀ гл҃ющи. чт̂о рад̑и̑ не съзи́ждеши мн̂ѣ до́мꙋ ке́дрова·

7

Нн҃ѣ б̂о та́ко гл҃еши рабꙋ̀ мое҆мꙋ двд̑ꙋ сїѧ рече г҃ь вседръжи́тель. а҆зъ и҆зѧх̑ т̂ѧ е҆гда в꙽ па́ствѣ въслѣдова́лъ е҆си ста́дꙋ. да бы́лъ е҆си во́ждъ лю́дем꙽ мои҆мъ і҆и҆л҃ю·

8

И҆ бы́хъ с тобо́ю и҆деже когда̀ походи́лъ е҆си. и҆ потреби́хъ вс̂ѧ врагѝ твоѧ̀ пред̑ тобо́ю. сътвори́хъ же тебѐ и҆мени́та ꙗ҆́ко е҆ді́наго вели́ких꙽, и҆же и҆менꙋ́ютсѧ на землѝ·

9

И҆ дахъ мѣ́сто лю́демъ мои҆мъ і҆и҆л҃ю. и насади́хъ ѧ҆̀ и҆ ѻ҆бита́ютъ в꙽ немъ. и҆ да не въскорбѧ́т꙽ ктомꙋ̀. н̂и сн҃ове безако́нїѧ приложа́тъ попра́ти и҆хъ ꙗ҆́ко ѿ нача́ла·

10

И҆ ѿ дн҃їи и҆хже да́хъ сꙋдїѧ̀ лю́демъ мои҆мъ і҆и҆л҃ю, смири́хъ вс̂ѧ врагѝ твоѧ̀. и҆ възвѣща́ю т̂и ꙗ҆́ко съзи́ждетъ т̂и г҃ь до́мъ·

11

Єгда́ же и҆спо́лниши дн҃и твоѧ̀ да и҆де́ши къ ѿц҃емъ твои҆м꙽. въздви́гнꙋ сѣмѧ твое по тебѣ̀ и҆же бꙋдетъ ѿ сн҃овъ твои҆хъ. и҆ въста́влю црс̑҇тво е҆го·

12

И҆ се́и съзи́ждетъ мн̂ѣ до́мъ, и҆ а́з꙽ ѹ҆крѣплю̀ прс̑҇тлъ е҆го да́же до́ вѣка·

13

А҆зъ бꙋдꙋ е҆мꙋ въ ѿц҃а и҆ то́и бꙋдет꙽ мн̂ѣ въ сн҃а. и҆ млс̑҇ть мою̀ не ѿи҆мꙋ̀ ѿ него. ꙗ҆́ко ѿѧх̑ ѿ сего̀ и҆же прежде тебѐ бы́сть·

14

И҆ ѹ҆вѣрю̀ е҆го в домꙋ̀ мое҆мъ. и҆ въ црс̑҇твїи мое҆мъ даже до́ вѣка, и҆ прс̑҇толъ е҆го бꙋдетъ и҆справле́нъ въ вѣки·

15

По всѣхъ словесех꙽ сихъ. и҆ по всемꙋ̀ видѣнїю семꙋ̀. тако гл҃алъ е҆сть наѳа́нъ къ дв҃дꙋ·

16

И҆ прїиде цр҃ь дв҃дъ, и҆ сѣде пред̑ гм҃ъ и҆ рече. кт̂о а҆зъ е҆смь г҃и бж҃е мо́и, и҆ чт̂о до́мъ мои ꙗ҆́ко възлюбѝ м̂ѧ въ вѣки, да подасѝ мн̂ѣ такова́ѧ. н̂о и҆ то̀ ма́ло ви́дѣно бы́сть пред̑ тобо́ю бж҃е. и҆ гл҃ал̑҇ е҆си на до́мъ раба̀ твое҆го е҆щѐ въ бꙋдꙋщее, и҆ сътвори́лъ м̂ѧ е҆си честна над̑ всѣми чл҃ки, г҃и бж҃е мо́и·

17

Чт̂о бо́лѣе приложи́тъ двд̑ъ гл҃ати тебѣ̀. е҆гда̀ та́ко просла́виши раба̀ твое҆го и҆ позна́еши е҆го·

18

Ги҃ раба̀ твое҆го ради по срд̑цꙋ твое҆мꙋ сътвори́лъ е҆си вс̂ѧ вели́чествїѧ сїа. и҆ зна́ема бы́ти сътвори́лъ е҆си вс̂ѧ вели́чїѧ твоѧ·

19

Ги҃ нѣ́сть подо́бен̑҇ тебѣ, и҆ нѣ́сть б҃а ра́звѣ тебе по в꙽сѣхъ же и҆же слы́шахомъ ѹ҆ши́ма на́шима·

20

И҆ нѣсть ꙗ҆́ко лю́дїе твоѝ і҆и҆л҃ь ꙗ҆зы́къ е҆ді́нъ на землѝ, е҆гоже ради про́иде б҃ъ да и҆зба́витъ и҆ сътвори́тъ лю́ди себѣ, и҆ вели́чеством̑ свои҆мъ и҆ стра́шнымъ и҆згонѝ ро́ды ѿ лица̀ людїи их̑же и҆зба́ви ѿ е҆гѷпта·

21

И҆ положи́лъ е҆си люди твоѧ̀ і҆и҆л҃ь тебѣ̀ в лю́ди даже до́ вѣка, и҆ ты̀ г҃и бы́сть б҃ъ и҆хъ·

22

И҆ нн҃ѣ г҃и сло́во и҆мъже гл҃алъ е҆си рабꙋ твое҆мꙋ, и҆ на до́мъ е҆го, да ѹ҆вѣрит̑сѧ въ вѣки и҆ сътворѝ ꙗ҆́ко гл҃алъ е҆си·

23

И҆ ѹ҆вѣри́тсѧ и҆ възвели́читсѧ и҆́мѧ твое даже въ вѣки, гл҃ющихъ г҃и г҃и вс̂едръжи́телю б҃ъ і҆и҆л҃евъ, и҆ до́м꙽ раба̀ е҆го да бꙋдет̑ и҆справле́нъ пред̑ тобо́ю·

24

Ты́ бо г҃и бж҃е мо́и ѿвръзлъ е҆си ѹ́хо раба̀ твое҆го, създа́ти е҆мꙋ до́мъ, и҆ сего ради ѻ҆брѣте ра́бъ твои ѹ҆вѣре́нїе, да мо́литсѧ пред̑ лицем̑ твоим̑·

25

И҆ нн҃ѣ г҃и ты̀ е҆си са́мъ б҃ъ и҆ гл҃алъ е҆си къ рабꙋ̀ твое҆мꙋ. толи́ка добро̀творе́нїѧ сїѧ·

26

И҆ нн҃ѣ начнѝ блс̑҇вити до́мъ раба̀ твое҆го да бꙋдет̑ въ вѣки пред̑ тобо́ю. ꙗ҆́ко ты̀ г҃и блс̑҇вилъ е҆си и҆ блс̑҇венъ бꙋдетъ въ вѣки·