Ostroh Bible❧Перша книга хронік, розділ 20

1

Бысть же по лѣтѣ въ времѧ и҆схоже́нїѧ цр҃їи къ бра́ни. събра̀ і҆ѻ҆а́въ вс̂ѧ во́и и҆ си́лныѧ ты́сѧщники. и҆ ѻ҆пꙋстѣ̀ землѧ̀ сн҃овъ а҆м꙽мо́нь прїидоша же и҆ ѻ҆бсѣдо́ша рам꙽ма̀. дв҃дъ же пребыва́ше въ і҆ерс̑҇лимѣ и҆ѻ҆а́въ же побѝ рам꙽ма̀ и҆ разорѝ е҆го·

2

Взѧ́ же дв҃дъ вѣнецъ молхо́новъ цр҃ѧ и҆хъ ѿ главы̀ е҆го, и҆ ѻ҆брѣте́сѧ в немъ зла́та в꙽ мѣрꙋ тала́нтъ и҆ в не́мъ ка́мень драгїи. и҆ бѣ̀ на главѣ̀ двд҃вѣ. плѣны же град̑ски мно́ги взѧ̀·

3

Лю́дїе же и҆же бѣхꙋ в не́мъ и҆зведѐ и҆ расто́рга ѧ҆̀ въ растръза́нїе сосꙋды желѣзными въ сокрꙋше́нїе, та́ко сътворѝ дв҃дъ всѣмъ рабо́мъ сн҃овъ а҆м꙽мо́нь, и҆ възврати́сѧ съ всѣми людмѝ свои́ми въ і҆ерс̑҇лимъ·

4

И҆ бы́сть посе́мъ нача́тсѧ бра́нь е҆ще въ газе́рѣ съ и҆ноплеме́нники. тогда̀ поразѝ сова́ха и҆ ѹ҆саѳїѧ, сафꙋѧ́, ѿ сн҃овъ щꙋдьскихъ и҆ смирѝ и҆хъ·

5

И҆́на ꙗ҆же брань сътворе́нна е҆сть проти́вꙋ и҆ноплеме́нникъ. не и҆́же ѹ҆бѝ е҆леа҆но́нъ сн҃ъ и҆а҆и́ръ лаѻ҆мїѧ бра́та голїа́ѳова хет̑ѳе́искаго е҆мꙋже ра́тище древѧ́ное бы́сть ꙗ҆́ко врати́ло т꙽кꙋщихъ·

6

Но и́наѧ слꙋчи́сѧ бра́нь в꙽ геѳѣ в не́иже бы́сть чл҃къ дол꙽жа́ишїи, ше́сть и҆мѣ́ющи прьстовъ, и҆же е҆сть в꙽кꙋпѣ, к҃д, и҆же то́и бѣ̀ ѿ колѣ́на гига́н꙽това·

7

И҆ поносѝ і҆и҆л҃ѧ, и҆ поразѝ е҆го и҆ѻ҆а҆ѳам̑ сн҃ъ сама́евъ брата двд҃ва·

8

Сїи роди́шасѧ рафа́ю, гига́н꙽тꙋ въ ге́ѳѣ и҆ всѣ́хъ и҆хъ б̂ѣ, д҃, гига́н꙽ты. и҆же падо́ша в рꙋ́цѣ дв҃дꙋ и҆ в рꙋкꙋ рабо́мъ е҆го·